Phŭn Blŭng 27
27
Isă br̂ơi Yakô̆p klơi nŭk-nua
1Tơl Isă tha boih, ta ñu kơnăm, bĭ thâo ƀôh tah, nŭn ñu iâo Êsao nă phŭn ñu: «Ơ nă!» Êsao til glaĭ: «Yĕt, ma?» 2Ñu laĭ: «Nêne kâo tha boih, bĭ thâo kr̂ăn ôh r̂ơi pă kâo ti djai. 3Nĭng nŭn yơh, br̂ơi ih mă hr̂ă mă gơjŏ ƀr̂ŏm, biă nao pơ čol pơnah br̂ơi kâo čĭm, 4jr̂ŏng nŭn ngă br̂ơi kâo djăm ăm tui kâo hăt ƀŏng, ba r̂ai pơ kâo, br̂ơi kâo ƀŏng, nŭn kâo ti pha br̂ơi ih klơi nŭk-nua, bih mơ̆ng bŭt-tai kâo, hlâo kâo ti djai.»
5Plai Rêƀêka dŏng, ñu hmĭ klơi Isă pơhiăp hr̂ŏm Êsao nă ñu. Tơl Êsao biă nao pơ čol čiăng pơnah čĭm ba glaĭ, 6nŭn Rêƀêka r̂ă br̂ơi Yakô̆p nă ñu: «Hmĭ kâo wŏ! Kâo hmĭ ma ih pơhiăp hr̂ŏm Êsao yŏng ih, ñu laĭ: 7“Br̂ơi ih nao pơnah čĭm, ba glaĭ ngă djăm ăm br̂ơi ma ƀŏng, ma ti pha br̂ơi ih klơi nŭk-nua ti năp Yêhôwa, hlâo ma ti djai.” 8Nĭng nŭn yơh, ơ nă, br̂ơi ih hmĭ wŏ boh hiăp kâo pơtă br̂ơi ih. 9Br̂ơi ih nao pơ phung be, tô̆ nă be hiam dua dr̂ơi, ba glaĭ pơ kâo, jr̂ŏng nŭn kâo ti ngă djăm ăm br̂ơi ma ih, tui ñu hăt ƀŏng. 10Jr̂ŏng nŭn br̂ơi ih ba nao br̂ơi ma ih ƀŏng, nŭn ñu mơ̆ng pha br̂ơi ih klơi nŭk-nua, hlâo ñu ti djai.» 11Jr̂ŏng nŭn Yakô̆p til glaĭ pơ Rêƀêka mĭ ñu: «Ep wŏ! Yŏng kâo Êsao ñu mơnuih hmâo blâo sĭng bŏ dr̂ơi-jĕn, plai kâo dŏng mơnuih khnăl blao hla ne. 12Ai-ñu, ma ti lơwa kâo mă, nŭn ñu ti khư̆t laĭ kâo pơmat ñu. Jơ̆ ngă nĭng nŭn, kâo ti ngă br̂ơi kâo pô tô̆ klơi hơtŏm mơ̆ng ñu, bĭ djơ̆ tô̆ klơi nŭk-nua ôh.» 13Jr̂ŏng nŭn mĭ ñu til glaĭ: «Ơ nă, br̂ơi klơi hơtŏm nŭn lĕ r̂ai pơ kâo wŏ! Ih thâo kăn hmĭ tui boh hiăp kâo pơtă br̂ơi ih đơč. Br̂ơi ih nao tô̆ nă be ba r̂ai pơ kâo wŏ.» 14Nĭng nŭn yơh, ñu nao tô̆ nă be ba glaĭ pơ mĭ ñu, jr̂ŏng nŭn mĭ ñu ngă djăm ăm tui ma ñu hăt ƀŏng. 15Jr̂ŏng nŭn Rêƀêka tô̆ khô ao Êsao nă phŭn ñu, khô ao hiam hloh, a čr̂oh tăm sang, ba r̂ai buh br̂ơi Yakô̆p nă nŭč ñu. 16Ñu tô̆ klĭ be pŏn mơ̆ng ngan Yakô̆p wŏt mơ̆ng tơkoi ñu he mơ̆n. 17Jr̂ŏng nŭn, ñu tô̆ djăm ăm ñu ngă dăp nŭmpăng, br̂ơi pơ Yakô̆p nă ñu.
18Jr̂ŏng nŭn Yakô̆p nao pơ ma ñu, ñu laĭ: «Ơ ma.» Nŭn ma ñu til glaĭ: «Yĕt lĕ, nă? Nă pă ne?» 19Jr̂ŏng nŭn Yakô̆p til glaĭ pơ ma ñu: «Kâo Êsao nă phŭn ih yơh. Kâo ngă tui hla ti klơi ih pơđơi kâo boih. Br̂ơi ih gŭ ben wŏ, ƀŏng djăm čĭm kâo pơnah ne, ih mơ̆ng pha br̂ơi kâo klơi nŭk-nua, bih mơ̆ng bŭt-tai ih.» 20Jr̂ŏng nŭn Isă kơña nă ñu: «Ơ nă, yĕt lĕ ih sem tăñ hmâo jat hah?» Nŭn Yakô̆p til glaĭ: «Yua buă ne Yêhôwa yang ih ngă br̂ơi kâo tăñ hmâo.» 21Plai Isă pơhiăp hr̂ŏm Yakô̆p: «Ơ nă, r̂ai jĕ pơ kâo wŏ, kâo ti lơwa lăng ih, čiăng thâo kr̂ăn laĭ, ih Êsao nă kâo dơdi ah.» 22Jr̂ŏng nŭn Yakô̆p nao jĕ pơ Isă ma ñu, nŭn ma ñu lơwa lăng, dăp pơhiăp laĭ: «Hiăp ih, hiăp Yakô̆p, plai ngan ih dŏng, ngan Êsao.» 23Isă bĭ thâo kr̂ăn Yakô̆p ôh, yua ngan ñu hmâo blâo hla ti ngan Êsao yŏng ñu mơ̆n. Yua nĭng nŭn yơh, Isă mơ̆ng pha br̂ơi ñu klơi nŭk-nua. 24Isă kơña laĭ: «Ih Êsao nă kâo ah?» Yakô̆p til glaĭ: «Ơ̆, kâo yơh.» 25Jr̂ŏng nŭn, Isă laĭ: «Ba r̂ai djăm pơanah pơ kâo wŏ, kâo ti ƀŏng djăm čĭm nă kâo pơnah. Nĭng nŭn yơh, kâo ti pha br̂ơi ih klơi nŭk-nua, bih mơ̆ng bŭt-tai kâo.» Nŭn Yakô̆p ba nao djăm čr̂oh jĕ ma ñu, jr̂ŏng nŭn ma ñu ƀŏng, Yakô̆p ba nao dăp pai boh ƀâo mơ̆n, nŭn ma ñu ñŭm hĕ. 26Jr̂ŏng nŭn, Isă ma ñu laĭ dŏng: «Ơ nă, r̂ai jĕ čô̆m kâo wŏ!» 27Jr̂ŏng nŭn Yakô̆p nao jĕ, čô̆m ma ñu. Pah anŭn Isă ƀâo khô ao ñu, jr̂ŏng nŭn ñu pha br̂ơi nă ñu klơi nŭk-nua, ñu laĭ: «Ơ̆, ne yơh, ƀâo nă kâo, ƀâo čol, čol Yêhôwa pha br̂ơi klơi nŭk-nua.
28Dueh mơ̆ng Ơi Adai pha br̂ơi ih ia lĭng mơ̆ng adai dih,
Br̂ơi kơnah hmâo boh-tr̂oh dr̂oh đĭ,
Hmâo dai lơbeh-lơbai wŏt pai boh ƀâo phr̂âo he mơ̆n.
29Br̂ơi nă plơi lan ngă hlŭn ih,
Br̂ơi môt sô̆n-sat pơkŏn-pơkŏn bon ti năp ih mơ̆n.
Br̂ơi ih ngă khua mơ̆ng yŏng dơi ih,
Br̂ơi nă-bă ha mĭ bon ti năp ih mơ̆n.
Lơi hiăp hơtŏm ih,
Pô nŭn ti tô̆ klơi hơtŏm mơ̆n,
Lơi br̂ơi ih klơi nŭk-nua,
Pô nŭn ti tô̆ klơi nŭk-nua mơ̆n.»#An Phŭn 12:3.
Êsao ñă klơi nŭk-nua
30Tơl Isă pha br̂ơi Yakô̆p klơi nŭk-nua jr̂ŏng boih, pah anŭn yŏng ñu Êsao glaĭ r̂ai mơ̆ng pơnah čĭm, nŭn Yakô̆p biă đuĕ mơ̆ng ma ñu Isă iă ti bĭ hmao. 31Jr̂ŏng nŭn Êsao dŏng, ñu ngă djăm ăm ba nao pơ ma ñu mơ̆n, nŭn Êsao pơhiăp hr̂ŏm ma ñu: «Ơ ma, gŭ đĭ wŏ, br̂ơi ih ƀŏng djăm čĭm kâo pơnah ne, ih mơ̆ng pha br̂ơi kâo klơi nŭk-nua, bih mơ̆ng bŭt-tai ih.» 32Isă ma ñu kơña laĭ: «Lơi ih?» Ñu til glaĭ: «Kâo Êsao, nă phŭn ih noh!» 33Pah anŭn Isă tơtĭ-djĭl kơtang jat, dăp kơña laĭ: «Jơ̆ nĭng nŭn, lơi pơnah čĭm ba r̂ai pơ kâo mơ̆ng klơi? Kâo ƀŏng lôi djăm nŭn boih, hlâo ih ka tơl r̂ai, nŭn kâo pha br̂ơi ñu klơi nŭk-nua yơh. Klơi nŭk-nua kâo pha br̂ơi ñu nŭn, ti dŏ klep hr̂ŏm ñu hayoh!» 34Tơl Êsao hmĭ hiăp ma ñu, nŭn ñu wă bŭt hang-hik, dăp hia ôl đĭ kơtang jat. Jr̂ŏng nŭn ñu pơhiăp hr̂ŏm ma ñu: «Ơ ma, gah kâo dŏng, hiư̆m pă lĕ? Ih pha br̂ơi kâo klơi nŭk-nua he wŏ!» 35Nŭn Isă til glaĭ: «Adơi ih r̂ai plĕč ƀlơl lôi kâo boih. Ñu pơƀiă tô̆ klơi nŭk-nua ih yơh.» 36Jr̂ŏng nŭn Êsao laĭ: «Nĭng nŭn yơh, a iâo ƀŏ ñu “Yakô̆p,”#27:36 Ƀŏ Yakô̆p keng-keng boh hiăp Hêbrơ laĭ «Djă kơđôl le» he, keng-keng boh hiăp Hêbrơ laĭ plĕč ƀlơl he mơ̆n. yua ñu plĕč ƀlơl lôi kâo dua wŏt ne boih. Ñu tô̆ sĭt yŏng phŭn ha wŏt,#An Phŭn 25:29-34. ep wŏ, nêne, ñu pơƀiă tô̆ klơi nŭk-nua kâo dŏng!» Jr̂ŏng nŭn, Êsao laĭ: «Hiư̆m ma, ih bĭ hmâo dŏng tah, klơi nŭk-nua ha tô̆ pr̂ăp čr̂oh br̂ơi kâo?»
37Jr̂ŏng nŭn Isă til glaĭ pơ Êsao: «Ep wŏ, kâo bơdŏ br̂ơi ñu ngă khua ih boih, wŏt bih-tih yŏng dơi ñu, kâo br̂ơi gơñu ngă hlŭn ñu mơ̆n. Kâo pha br̂ơi ñu hmâo dai dăp pai boh ƀâo phr̂âo he mơ̆n. Nĭng nŭn yơh nă, kâo bĭ hmâo nŏ yĕt ti pha br̂ơi ih dŏng tah.» 38Jr̂ŏng nŭn Êsao kơña ma ñu: «Ơ ma, ih dŏ hmâo klơi nŭk-nua ha tô̆ dŏng mơ̆n ah? Ơ ma, hiư̆m pă kâo dŏng? Br̂ơi ih pha br̂ơi kâo klơi nŭk-nua he wŏ!» Jr̂ŏng nŭn, Êsao hia hơmr̂ač đĭ hĕ.#An Hêb 12:17.
39Jr̂ŏng nŭn Isă ma ñu til glaĭ pơ ñu:
«Ep wŏ, ih ti dŏ taih mơ̆ng ƀon kơnah hmâo boh-tr̂oh dr̂oh đĭ,
Ih ti dŏ taih mơ̆ng ia lĭng lĕ mơ̆ng adai dih mơ̆n.#An Phŭn 36:8.
40Ih ti hơdĭp yua mơ̆ng đao ih,
Ih ti ngă hlŭn adơi ih mơ̆n.
Tơl ih hăt biă lôi,
Nŭn ih ti toh lôi ek koi adơi ih mơ̆ng tơkoi ih.»#An 2Pơtao 8:20.
Yakô̆p đuĕ dŏp mơ̆ng Êsao
41Nŭn yơh Êsao gĭm Yakô̆p, yua mơ̆ng klơi nŭk-nua ma ñu pha br̂ơi. Êsao khư̆t tăm bŭt ñu: «R̂ơi a ti kơ-ŭ-kơ-uăn ma iă ti tơl boih, tơl kloh lôi mơ̆ng r̂ơi nŭn, kâo ti pơdjai lôi Yakô̆p adơi kâo yơh.» 42Nŭn hmâo r̂ăng nao r̂ă br̂ơi Rêƀêka mơ̆ng boh hiăp Êsao nă phŭn ñu, jr̂ŏng nŭn Rêƀêka pơđơi r̂ăng nao iâo r̂ai Yakô̆p nă nŭč ñu, nŭn ñu r̂ă br̂ơi Yakô̆p: «Nêne Êsao yŏng ih, ñu laĭ ti pơdjai lôi ih, klơi nŭn yơh ngă br̂ơi ñu ơ̆ bŭt. 43Nĭng nŭn yơh nă, br̂ơi ih hmĭ kâo hiăp wŏ, br̂ơi ih met-set đuĕ nao tăñ pơ Laƀăn yŏng kâo, dŏ mơ̆ng plơi Kharan, 44jr̂ŏng nŭn, br̂ơi ih dŏ dăng hr̂ŏm ñu, tơl yŏng ih huai mơ̆ng klơi ñu r̂ŏt ƀơĭ. 45Tơl yŏng ih huai hêl ih, nŭn ñu ti wĕč lôi klơi ih ngă hr̂ŏm ñu, jr̂ŏng nŭn kâo ti pơđơi r̂ăng nao tô̆ glaĭ ih mơ̆ng anŭn. Hiư̆m, ih čiăng mĭ ñă lôi nă dua r̂ăng ha wŏt glih mơ̆ng ha r̂ơi nŭn đơč ah?»
46Nŭn Rêƀêka pơhiăp hr̂ŏm Isă: «Kâo hơ-ƀek klơi hơdĭp kâo pô, yua mơ̆ng đahmơi sô̆n-sat Hêt dua r̂ăng ne.#27:46 Đahmơi sô̆n-sat Hêt dua r̂ăng ne čiăng laĭ bơnai Êsao dua r̂ăng. An Phŭn 26:34-35. Jơ̆ laĭ Yakô̆p dŏ bơnai mơ̆ng môt đahmơi sô̆n-sat Hêt hla ti dua r̂ăng nŭn, mơ̆ng môt đahmơi dŏ mơ̆ng lŏn-ia ne, nŭn klơi hơdĭp kâo ne bĭ hmâo kha dŏng tah.»
Избрани в момента:
Phŭn Blŭng 27: JKB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2024, Wycliffe Bible Translators, Inc.