Gẹnẹsis 25
25
Uniẹn Ọvbehe Ọghe Ebraham
(I Krọnikol 1:32-33)
1Ebraham keghi vbe rhie okhuo ọvbehe ne a tie ẹre Ketura. 2Ọ keghi biẹ Zimran, Joksan, Medan, Midian, Isbak, kevbe Siua nẹ. 3Joksan ọrọre erha Siẹba kevbe Dedan, ivbi Eldan Asiurim, avbe Letusin kevbe avbe Leumin. 4Ivbi e Midian kegha re Ẹfa, Ẹfẹ, Manọk, Abida kevbe Elda, ena hia ọ re ivbi uniẹn Ketura.
5Ebraham keghi sẹ emwi ne ọ mwẹ hia rae ne Aizik. 6Sokpan vbe ọ te wu, ọ keghi ye emwi ne avbe ivbi ẹre nikpia nekpa ne avbe amwẹ ọnrẹn nekpa biẹlẹ nẹẹn. Ọ keghi gie iran gha rrie odẹ ahọ, lahin ehe ne Aizik ne ovbi ẹre ye rre.
Uwu Kevbe Uremwẹ Ebraham
7-8Ebraham ya ukpo isẹn irrọ vbiyerẹnrẹn (175) vbe agbọn, te ọ wa khian ọmaẹn fo fẹẹrẹ ọ ke wu. 9Ivbi ẹre ighẹ Aizik kevbe Ismẹl keghi re ẹre ye uvun okuta Makpẹla vbe otọe ne ọ te ka gha re ọghe Efrọn ne ovbi e Zoha ne Hiti vbe odẹ ahọ Mamrẹ. 10Ọ keghi re otọ ne Ebraham gu Hiti dẹ. Evba ọre a re Ebraham kevbe Sera ne amwẹ ọnrẹn yi. 11Ebraham ghi wu nẹ, Osanobua keghi fiangbe Aizik ne ovbi ẹre ne ọ ya di ọkpẹn “Osanobua-nọ-rrọọ-neọ-bẹghe-mwẹ” ya.
Uniẹn Ivbi Ismẹl
(I Krọnikol 1:28-31)
12Ismẹl kegha re ovbi Ebraham ne Hega ne ovbi Igipt ne ọviẹn Sera biẹ nẹẹn. 13-14Eni ivbi Ismẹl ọre ena khin zẹ vbene a ya biẹlẹ iran lele egbe. Ovbi Ismẹl nọdiọn kegha re Nabaiọt vbe iyeke ọnii Keda, Adbil, Mibsam, e Misma, Duma, Masa, 15Hadad, Tema, Jetọ, Mafis kevbe Kedema. 16Iran ọ re ọ gha re erha odede ọghe ẹwae iweva nii, iran ọ re avbe he eni avbe igue kevbe agọ iweva iran gie. 17Ukpo ehairrọ-vbiyihinrọn (137) ọre Ismẹl gha ye vbe ọ wu. 18Uniẹn Ismẹl kegha rre otọ ne ọ rre ẹkpo Havila kevbe Siọ vbe odẹ ahọ Igipt vbe odẹ ne a la ye Siria. Iran ke yan egbe fua vbe egbe etẹn iran, ne ivbi uniẹn Ebraham ya yin ehe ọvbehe.
Ubiẹmwẹ Isọ Kevbe Jekọb
19Itan Aizik ne ovbi Ebraham ọre ọna khin. 20Ukpo iyeva ọre Aizik ye vbe ọ rhie Ribẹka ne ovbi Bẹtuẹl nokhuo, (ọmwa Aran ne ọ ke Mẹsopotamia rre,) ọtẹn Leban nokhuo. 21Ugbẹn vbe a miẹn wẹẹ e Ribẹka ma biẹ, rẹn keghi na erhunmwu ghe Nọyaẹnmwa vbe ekpa ẹre. E Nọyaẹnmwa keghi họn erhunmwu ẹre, e Ribẹka na do gha hanmwa. 22Ivin eva, ọre ọ gha hanmwa. Vbe a te biẹlẹ iran, iran kegha gu egbe khọn vbe ẹko ẹre, rẹn keghi kha wẹẹ, “Vbọzẹ ne ọna na sunu vbe egbe mwẹ yi?” Rẹn keghi na erhunmwu ghe Nọyaẹnmwa wẹẹ ne ọ rhie e wanniẹn ne irẹn.
23E Nọyaẹnmwa keghi tama rẹn wẹẹ,
“Iyaẹvbo eva ọre ọ rre uwẹ ẹko
U gha biẹ arhien eva ni gu egbe suan
Ọkpa gha wegbe sẹ nọkpa
Nọdiọn ọre ọ gha re ọguọmwadia enekherhe.”
24Ọ na do sẹ ẹghẹ ne ọ gha ya biẹ, ọ keghi gele biẹ ivin eva. 25Ọmọ okpia ne a ka gha biẹ keghi baa, ikpakpa egbe ẹre keghi yevbe ẹwu eto, a keghi he ẹre Isọ. 26A ghi biẹ ọtiọnrẹn nokpia, ọ ke gba ighinghin-owẹ Isọ mwẹ, a na ghi gha tie eni ẹre Jekọb. Ukpo iyeha ọre Aizik ye vbe a biẹlẹ iran.
Isọ Mu Ukpo Ọmọdiọn Rẹn Khiẹn
27Emọ ikpia na keghi do wan, Isọ kegha re ohuẹ ẹmwata ne ọ la ehe hia khian, sokpan e Jekọb kegha re ọmwa ne ọ hunwan ne ọ vbe di owa ya. 28Aizik keghi ho ẹmwẹ Isọ sẹ, rhunmwuda emiowo ne ọ gbe giẹe gha re rhiẹnrhiẹn ọẹn, sokpan Ribẹka keghi ho ẹmwẹ Jekọb sẹ. 29Ẹdẹ ọkpa, e Jekọb ghi le ọpẹkhẹrhẹ, Isọ keghi ke ehe ne ọna ya ru ọbafi rre. Ohanmwẹ kegha gbẹe 30ọ keghi khama Jekọb wẹẹ, “Ohanmwẹ gbe mwẹ, fian mẹ kherhe vbe ọpẹkhẹrhẹ ne yẹn ẹn na.” (Ọnii ọ siẹe ne a na tiẹre Idọm) 31Sokpan Jekọb keghi wanniẹn wẹẹ, “I gha fian nuẹn a deghẹ u mu ukpo ọmọdiọn ruẹn mẹ.” 32Isọ keghi wanniẹn wẹẹ, “Ọ maa! Te I ra wu na, de emwi ne ọdiọn ra khian mẹ?” 33Jekọb keghi wanniẹn wẹẹ. “Ka yan ma mwẹ wẹẹ u gha mu emwi ne ọ khẹ kuẹ mẹ.” Isọ keghi vẹn ihẹn ya khiẹn emwi ni khẹ kẹe zẹ vbe ọmọdiọn ne Jekọb. 34Ẹre Jekọb ghi na rhie ebrẹd eso kevbe ikpowo nẹẹn. Rẹn keghi re, ọ na da, ọ na guakpao, ọ na gha rrie. Vbene ẹmwẹ ne ọ khẹ kẹe zẹ vbe ọmọdiọn wa sẹ vbe aro Isọ, ọre ọnii khin.
Избрани в момента:
Gẹnẹsis 25: EDO96
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
@ The Bible Society of Nigeria, 1996