प्रेरित 8
8
कलीसियाओ टोईच़ी अत्याचार
1शाऊल, स्तिफनुस ओ हत्या शुहबी रंङ साते पुरा सहमत तोहई। दुहए ध्याड़ा यरूशलेम शहरो कलीसियाओ टोहकठे महसे सताव शुहबी लेहती दंङ प्रेरिता तिंङ केट्रा भत्ते कि भत्ते मीहरे यहुदिया ए सामरिया प्रदेशंङ तितर-बितर शुचि इलिर। 2दंङ रेह भक्त गंङमी ज़ि स्तिफनुसो फुक कब्रङ केहरिर; दंङ दोऊ थल्जी महस शोक लहरिर। 3पर शाऊल कलीसियाओ मीहतिंङ परेशान लहज़ी लेहकी तोहई; दंङ हर इच्च़ा ओ चुंङ इलज़ा-इलज़ा बिशवासी मीह तिंङ च़ुमने जेलंङ केट्री चरच़ाते।
सामरिया प्रदेशंङ फिलिप्पुसो प्रचार
4पर अंऊ बिशवासीर देखा-नोखा शुहचे तोईरे, अंऊर-अंऊर दोरे इलिर यीशु पाहठी रूठे खबरो प्रचार लहज़ी लेहतिर। 5दंङ फिलिप्पुस सामरिया प्रदेश ओ इच्च़ा शहरंङ इलजे मीहतु बिचंङ मसीहू पाहठी प्रचार लहज़ी लेहती। 6दंङ अपेहल मीहच़ी फिलिप्पुस ओ गप्पा रेड्रिर दंङ दोऊ दोरच़ी लहसी चमत्कारो कम खंणीर, दोहथल दोरे इच्च़ा सेहम शुहचे दोऊ शिक्षा ऊ टोहकठे ध्यान रंड्री लेहतिर। 7छना कुचे अपेहल फिलिप्पुस ए हुकुम रेंई, महस मीहतु दोरच़ी मांजी आत्मार मोह्ड़े सगा रंङ साते हाऊषेके हुंच़ा इलिर, दंङ महसे नम्क्योंन ओ नतपर ए लट्टे मीहरे ला आईन शुहचे इलिर, 8दंङ दुह शहरो मीहरे महसे खुश शुहचे इलिर।
जादूगर शमौन
9दुह इलाकंङ इच्च़ा गंङमी तोहई अतु मिन शमौन तोहई अंऊ महस साल बे टंणा-मंणा लेह मीहतिंङ हेरान लहज़ाते दंङ एनाबि इच्च़ा मोह्ड़े गंङमी कंड्राते। 10दंङ भत्तेर कवचि बे मोह्ड़े तचेक भत्तेर दोऊ ध्यान तहज़ातेर, “दिह मीह परमेश्वरो दुह शाक्ति शुह, अंऊ मोह्ड़े कहलाच़ा।”। 11दोई महसे ध्याड़ा बे दोतिंङ एनोह टंणा-मंणा ओ कमातु दोरच़ी हेरान लहसी तते, दिऊ थल्जी दोरे दोऊ महसे ध्यान तहज़ातेर। 12पर अपेहल मीहच़ी परमेश्वरो राज्य ए यीशु मसीहू मिन्दु रूठे खबरा रिंङ फिलिप्पुस ओ शिक्षा रेड्राते बिशवास लहरिर, दिऊ वहज़ा ज़ि महसे मेच़िमी ए गंङमी ज़ि बपतिस्मा लेहप्तिर। 13दोहथल शमौन ऐनाह ला फिलिप्पुसो शिक्षा ओ टोहकठे बिशवास लहरी दंङ बपतिस्मा लेहपच़ा। दंङ अंऊर फिलिप्पुस यवाते दुह ला दोऊ थले यवाते, दंङ दुह चमत्कार ए मोह्ड़े-मोह्ड़े सामर्थो कम शुहबी खंड्रिमी रंङ साते हेरान शुहचे य्वाते।
14अंऊ मुक्का प्रेरिता ज़ि अंऊ यरूशलेम शहरंङ तोईरे, रेड्रीर कि सामरिया प्रदेशो मीहच़ी परमेश्वरो बचन ग्रहण लेह केहतोर ता पतरस ए यूहन्ना बि दोतु कछंङ च़रतिर। 15दंङ दोच़ी दोर्तिंङ इलजे दुह खरकोई विशवासी तु प्रार्थना लहरिर, कि दोरे पवित्र आत्मा खोक्पोर। 16छना कुचे पवित्र आत्मा अईता तचेक दोतु बिचंङ च़ि अतुला टोईच़ी अंज़े माह तोहई, दोच़ी ता सिर्फ प्रभु यीशु ऊ मिंदंङ बपतिस्मा लेहपसी तरेर। 17दोहथल पतरस ए यूहन्ना ज़ि दोतु टोहकठे गुह्ट्र केहरिर दंङ दोच़ी पवित्र आत्मा खोकसिरी।
18अंऊ मुक्का शमौन ए खांई कि प्रेरिता तु गुहड़ केट्रिमी रंङ साते पवित्र आत्मा खोकसा, ता दोई दोतंङ कछंङ ढबाह हंजे कुहतो, 19“दिह शाक्ति गिह्बी ला रांई, कि गेह अतुला टोईच़ी गुहड़ केयोग, ता दोतिंङ पवित्र आत्मा खोकसा योतो।” 20पतरसे दोतंङ साते कुंई, “कांह ए कांह ढबाह नाश शुहबी जूंस, छना कुचे केई परमेश्वरो दान, ढबाह रंङ साते च़ुमज़िमी बिचार लहरिन। 21दिह सेवा ओ कमारिंङ माह कांह हिस्सा तोह, माह अधिकार; छना कुचे कांह सेहम परमेश्वरो तुईज़ी सच्चा माह। 22दिऊ थल्जी केनोह सेहम किर्ज़ुंई मदम कमो दोरच़ी प्रभु ऊ हखा प्रार्थना लोह, शायद परमेश्वर कांह मदम बिचारा तिंङ माफ लोहतो। 23छना कुचे गिह्बी साफ तंङफी लेहकी तोह कि कांह अन्द्रेग कड़वाहट पिंङे तोह दंङ कांह पुरा पापो बन्धना रिंङ तोतोन।” 24शमौन ए जुबाब रेंई, “केहरे गिऊ थल्जी प्रभु रंङ साते प्रार्थना लांही कि अंऊ गप्पारे केहच़ी कुहतन, दोतु बिचंङ अंऊ ला गिऊ टोईच़ी अपि मेस।”
25पतरस यूहन्ना मीहतिंङ कंड्री लेहतिर अंऊ दोरे यीशु पाहठी रूठे रंङ ञेंहच़ातेर, दंङ प्रभु यीशु बचनो प्रचार लहज़ी लेहतिर। दोहथल दोरे यरूशलेम शहरो हखा वापिस अतिर, दंङ अमरिंङ यीशु पाहठी रूठे खबर सामरिया प्रदेशो महसे नगरारिंङ सुनाच़ी लेहतिर।
फिलिप्पुस ए कूश देशो अधिकारी
26दंङ प्रभु ऊ इच्च़ा स्वर्गदूते फिलिप्पुस रंङ साते कुई, खड़े शुह दक्षिण दिशा ओ हखा दुह अमरिंङ इल, अंऊ यरूशलेम शहरंङ च़ि गाज़ा शहरो हखा यवा। दिह सुनसान अम तोह। 27दुह खड़े शुहचे अच़ा इलि, अंऊ मुक्का फिलिप्पुस इबि लेहकी तोहई दोहपल अमरिंङ दोबि कूश देशो इच्च़ा मीह दोईरी, अंऊ खोजा मतलब हिज़ड़ा तोहई दंङ कूश देशो रानी कन्दाके ओ मन्त्री ए खज़ान्च़ी तोहई, दंङ अराधना लहज़िमी थल्जी यरूशलेम शहरंङ अंज़े तोहई। 28दंङ दुह रथो टोहकठे बंङज़ा एनोह देशो हखा वापिस इबि लेहकी तोहई, दंङ यशायाह भविष्यवक्ता ओ कताब जोरे-जोरे पढेक्पी लेहकी तोहई। 29दोथल पवित्र आत्माज़ि फिलिप्पुस रंङ साते कुई, कछंङ इलजे रथ रंङ साते जो। 30फिलिप्पुस ज़रका रेह रथ ओ कछंङ अति दंङ दोबि यशायाह भविष्यवक्ता ओ कताब पढ़ेक्चा रेड्रातो दंङ रूहक्ती, कांह अंऊ पढेक्पि लेह्की तोतोन, छि कनिंङ समझ ला अपि लेहकी तोह आ? 31दंङ दोई फिलिप्पुस रंङ साते कुई, “अगर अरिया गिह्बी समझाएक्सा माह शुई ता गेह दिह्बी समझेकी मरपोग” “दंङ दोई फिलिप्पुस रंङ साते बिनती लहरी कि रथ ओ टोहकठे अंज़े गिऊ कछंङ बंङज़ु। दोहथल फिलिप्पुस दोऊ कछंङ अंज़े बंङज़ा इलि”
32दंङ पवित्रशास्त्रो अंऊ पाठ दुह पढेक्पी लेहकी तोहई, दुह दिह तोहई: “दोबि त्रैंईतु ठ्रोह सच़िमी थल्जी रेंज़ा शिलिर, दंङ छना कुरच़ा एनोह च़म ञेलंड्रा दोतु तुईज़ी चुपे बंङज़ा, ध्वांए अपेहल मीहज़ी दोबि दुख रेंईर ता दोई ला एनोह आह मा अलज़िरी।” 33“दोऊ बेज़ती लहरिर दंङ दोबि न्याय माह खोकसिरी। शायद अरिला दोऊ खानदानो पाहठी कंड्री मारपोतो, छना कुचे दिबे तुहई अगर धरती रिंङ दोऊ अरिया खानदान शुचंङ, ता मीहच़ी दुह सच़ी च़रतिर।”
34दिरंङ खोजे ज़ि फिलिप्पुस रंङ साते रूहक्ती, गेह करंङ साते बिनती लहज़ातग, दिह कंड्रु कि भविष्यवक्ता दिह गप्पा अतु पाहठी कुट्रा, एनोह या ऊईतु पाहठी? 35दंङ फिलिप्पुस कुट्री लेहती, दंङ दिहे पवित्रशास्त्र रंङच़ि शुरू लेह दोबि यीशु ऊ पाहठी रूठे खबर सुनाएती। दंङ दुह खोजे ज़ि दिहरे गप्पारे समझेक्ती ए यीशु ऊ टोहकठे बिशवास लहरी। 36“दंङ अमरिंङ ज़ोजा-जोज़ा दोरे इच्च़ा ठहरि रिंङ पिचे इलिर अंऊर तलाब तोहई। दोथर खोजे ज़ि कुई, खंणु देर्तिंङ तलाब तोह, दा गिह्बी बपतिस्मा लेहप्च़िमी थल्जी छि मुशकिल तोह।” 37फिलिप्पुस ए कुंई, अगर कांह पूरे सेहम रंङ साते विशवास लहज़ा तोन ता बपतिस्मा लेहपच़ी तरपोन, दोई जुबाब रेंई, गेह विशवास लहज़ातग कि यीशु मसीह ए परमेश्वरो योह शुह। 38दंङ दोई रथ चच़िमी हुकुम रेंई, दंङ फिलिप्पुस ए हिज़ड़ा झुल्ला तीऊ अन्द्रेग तकसा इलिर, दंङ फिलिप्पुस ए दोबि बपतिस्मा रेंई। 39अंऊ मुक्का दोरे तीऊ दोरच़ी हुंच़ा अतिर, ता प्रभु ऊ आत्मा फिलिप्पुस बि ध्वांए उठाएच़े रेंज़ा शिली, दंङ हिज़ड़ा ज़ि दुह यच़ाह माह तंङरी, दंङ दुह खुश शुहचे कि परमेश्वरे दुह बचाके च़रति एनोह देशो हखा वापिस अच़ा इलि। 40पर फिलिप्पुसे दोहथर दि ञेंई च़रति कि प्रभु आत्मा ज़ि चमत्कारी तरीका रंङ अशदोद शहरंङ रेंज़ा शिली। दंङ अपेहल तचेक दुह केसरिया शहरंङ माह पिच़ि दोहपल तचेक दोई हर इच्च़ा शहरंङ रूठे खबरो प्रचार लहज़ा इच्च़ा ठहरि रिंङ च़ि ऊई ठहरि रिंङ तचेक यात्रा लोहवा लहरी।
Избрани в момента:
प्रेरित 8: LBFNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.