यहून्नो 16
16
1दीह गप्पारे गेह केतंङ साते दिऊ थल्जी कुट्रातग कि अपेहल मीहरे केतिंङ तंग लोहर ता केहतु गिऊ टोहकठे विशवास लेह ब्याड़ा शुबी माह जूंस। 2दोरे केतिंङ यहुदी सभा घरबारंङ च़ि धह्तेका हुंच़े च़रपोर, देहर तचेक कि दिह झांह ठ्रोह टेम ला अपतो, अच़िला केतंङ सचे च़रपोर ता दोच़ी चेहपोर कि दोच़ी झांह लेह परमेश्वरो सेवा लहज़ातोर। 3दंङ दोरे झांह दिऊ थल्जी लोहर, छना कुचे दोच़ी माह पिता परमेश्वर बि ञेंहच़ातोर माह गिह्बी ञेंहच़ातोर। 4पर दीह गप्पारे गेह केतंङ साते दिऊ थल्जी कुहतग, कि अपेहल दिह गप्पातु पुरा शुहबिमी टेम अच़ा अपतो ता केतिंङ हिद अच़ा अपतो कि गेह दिह गप्पारे केतंङ साते तुईए कुची च़रचातेग, “गेह मुंडा रिंङ दिह गप्पारे केतंङ साते दिऊ थल्जी माह कुहतेग छना कुचे गेह केतंङ साते तोईग।”
पवित्र आत्माओ कम
5धह गेह घेंङौ च़रच़ा दोऊ कछंङ य्वातग; दंङ केहतु बिचंङ च़ि अरीला गिह्बी माह रुहक्च़ा, “कि गेह अंऊखा य्वातग?” 6पर अंऊ दिह गप्पारे गेह केतंङ साते कुहतेग, दिऊ थल्जी केहतु सेहम दुखी शुहचे इलि। 7तांला गेह केतंङ साते हेले कुट्रातग, कि गिऊ इबि केहतु थल्जी रुठे तोह, छना कुचे अगर गेह य्वातग माह, ता दुह मदतगार केहतु कछंङ माह अपतो, पर अगर गेह योग, ता दोबि केहतु कछंङ च़रपोग। 8दंङ दोई अंज़े संसारो मीहतिंङ पाप ए धर्मो पाहठी ए न्याय ओ पाहठी विशवास दिलाएपोतो। 9दोई पापो पाहठी विशवास दिलाएपोतो कि दोरे गिऊ टोहकठे विशवास लहज़िमी दोरच़ी इन्कार लहज़ातोर; 10दंङ धर्मिकता ओ पाहठी ला न्याय दिलाएपोतो, कि गेह पिता परमेश्वरो कछंङ य्वातग, दंङ केहरे गिह्बी यच़ाह माह खमोंई; 11दंङ न्याय ओ पाहठी दिऊ थल्जी याकीन दिलाएपोतो, छना कुचे परमेश्वरे तुईए शेतान बि दोषी ठेहराएसी ततो।
12गेह केतंङ ऊई ला गप्पारे कंड्रिमी तातग, पर हेंतेग केहच़ी दुह सेहन लेह मरपोंन। 13पर अपेहल दुह पवित्र आत्मा अपतो, अच़ि परमेश्वरो पाहठी सच्चाई कंबतो, दोई एनोह अधिकारंङ माह कोहतो पर दोई छि रेड्रोतो दंङ दुह ए कोहतो, दंङ अंजा गप्पातु पाहठी केतिंङ कंबतो। 14छना कुचे दोबि गिऊ दोरच़ी छिला धिर खोकसा तोह दोई गिऊ महिमा लोहतो। 15छिला धिर पिता परमेश्वरो तोह, दुह भत्ते धिर गिऊ शुह; दिऊ थल्जी गेह केतंङ साते कुहतग, कि दोई गिऊ गप्पातु दोरच़ी केतिंङ कंबतो।
दुख खुशी रिंङ शुहचे योतो
16“थोड़े अरे टेम केहषा इल्जी तोह कि केहरे गिह्बी माह खमोंन, दंङ थोड़े अरे टेमो थल केहरे गिह्बी यच़ाह खमोंई।” 17दिरंङ दोऊ चेलारे एनातु बिचंङ कुट्री लेहतिर, “अंऊ दोई ञेंतंङ साते कुट्रा, दोऊ छि मतलब शुह, ‘कि थोड़े अरे टेम केहषा इल्जी तोह कि केहरे गिह्बी माह खमोंन?’ दंङ दीह ‘दिऊ थल्जी कि गेह पिता परमेश्वरो कछंङ य्वातग?’ ” 18दंङ दोच़ी कुईर, “दी थोड़े अरे टेम अंऊ दोई कुट्रा, छि गप्पा शुह? ञेंतिंङ पता माह कि छि कुट्रा।”
19यीशु ज़ि दीह ञेंह, कि दोरे गेरंङ साते दिह गप्पातु मतलब रुहक्च़ी जुंज़ातोर, दोतंङ साते कुई, “छि केहरे केनातु बिचंङ गिऊ दिह गप्पा ओ पाहठी चर्चा लहज़ातंई आ, ‘थोड़े अरे टेम केहषा इल्जी तोह कि केहरे गिह्बी माह खमोंन, दंङ थोड़े अरे टेमो थल केहरे गिह्बी यच़ाह खमोंई?’ 20गेह केतंङ साते हेले कुट्रातग; कि केहरे गिऊ सिमी थल क्रपोंई दंङ दुख लोहनी, पर संसारो मीहरे खुशी मनाएपोर: केतिंङ दुख शोतो, पर अपेहल गेह सिमी दोरच़ी यच़ाह श्रींङे शुहचे वापिस अपोग, ता केहतु दुख, खुशी रिंङ शुहचे योतो। 21अपेहल मेच़िमी लिक्पिमी शोतो ता दोबि महसे टेहषी शुहबी, छना कुचे दोऊ दुखो टेम पिचे इलि, पर कटु बि जन्म रंड्रीमी थल दुह एनोहो टेहषी पेहषा य्वात, छना कुचे दोबि खुशी शुहबी कि संसारा रिंङ इच्च़ा कटु जन्म शुहचा। 22ध्वांए ठ्रोह हेंतेग केहरे ला दुखी तोतोंई, पर गेह केतंङ साते यच़ाह दोहग दंङ केहरे खुश शुहचे योंई; दंङ अच़िला केहतु खुशी, केहतु दोरच़ी शता माह लोहर। 23दुह मुका अपेहल गेह केतिंङ यच़ाह तंङपोग ता केहरे गेरंङ साते छले माह रुहक्पोंई; गेह केतंङ साते हेले कुट्रातग, अगर पिता परमेश्वरो दोरच़ी छा पेपोंई, ता दोई केतिंङ गिऊ चेलार शुहबिमी रंङ साते रमतो। 24हेंतेग तचेक केहच़ी गिऊ मिंदंङ, पिता परमेश्वरो दोरच़ी छले माह पेट्रीन; पेट्रोंई ता केतिंङ खोकसोतो, दंङ केहतु खुशी पुरे शुबी जूंस।”
संसारो टोईच़ी विजय
25“गेह दीह गप्पारे केतंङ साते कथारिंङ कुहषी तातग, पर दुह टेम अपि लेहकी तोह अपेहल गेह केतंङ साते कथारिंङ छले माह कोहग पर केतिंङ पिता परमेश्वरो पाहठी साफ-साफ कमोग। 26दुह मुका केहच़ी गिऊ मिंदंङ पेपोंन, दंङ गिह्बी केहतु थल्जी छि केतिंङ जुंज़ा घेंङौ पिता परमेश्वरारंङ साते रुहक्च़िमी ज़रूरत माह शोतो। 27छना कुचे पिता परमेश्वर ऐनाह ए केतंङ साते दाह लहज़ा, दिऊ थल्जी कि केहरे गेरंङ साते दाह लहज़ातंई, दंङ दिह ला विशवास लहरी कि गेह पिता परमेश्वरो दोरच़ी अंज़े शुगाह। 28गेह पिता परमेश्वरो दोरच़ी संसारा रिंङ अंज़े शुगाह, यच़ाह संसार केट्रा पिता परमेश्वरो कछंङ वापिस अच़ा योग।”
29यीशु ऊ चेलाज़ि कुईर, खंणु, धह ता केई साफ-साफ कुट्रातन, दंङ छिला कथारिंङ माह कुट्रातन। 30दा ञेंहच़ी दीह ञेंह केहतन कि केई भत्ते धिर ञेंहच़ातन, दंङ कनिंङ अतुला ज़रूरत माह कि अरीया कनिंङ छा सवाल रुहक्पोर, दिऊ दोरच़ी ञेंहरे विशवास लहज़ातंई, कि कांह परमेश्वरो दोरच़ी शुनाह।
31दीह रेड्रा यीशु ज़ि दोतिंङ साते कुई, “छि केहरे हेंतेग विशवास लहज़ातंई? 32खंणुई, दुह टेम पिचे अंज़े तोह, कि केहरे भत्ते देखा नोखा शुहचे एनोह-एनोह अमरिंङ अच़ा योंई, दंङ गिह्बी इच्च़ा केट्रे केओन, तांला गेह इच्च़ा मा शोग छना कुचे पिता परमेश्वर गेरंङ साते तोह। 33गेह दीह गप्पा केतंङ साते दिऊ थल्जी कुट्रातग, छना कुचे केहरे गिऊ चेलारे शुई; संसारा रिंङ केतिंङ दुख सेहन लहच़ी लेह्पोतो, पर याहऊ तांहई, छना कुचे गेह दिह संसारो मुख्या शेतान बि यरच़ी चरच़ातग।”
Избрани в момента:
यहून्नो 16: LBFNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.