यहून्नो 18
18
यीशु बि चुम्ज़ी
(मत्ती 26:47-56; मरकु 14:43-52; लूको 22:47-53)
1अपेहल यीशु प्रार्थना लहज़ी योहसिरी ता एनोह चेला तंङ साते किद्रोंन मिंदंङ नाणो नुरेच़ि इलि, दोर्तिंङ इच्च़ा बगीचा तोहई, दंङ दोरे दोर्तिंङ अच़ा इलिर। 2दंङ दोऊ च़ुमज़ि लहज़ा यहूदा बि ला दुह ठाहरीऊ पाहठी पता तोहई, छना कुचे यीशु एनोह चेला तंङ साते दोर्तिंङ इवा लाहते। 3दोथर यहूदा, रोमी सेनिकातु झुण्ड, यहुदी मोह्ड़े पुरोहितरे ए फरीसी मीहतु परगरा तंङ साते दोर्तिंङ पिचे इलि। दोतु कछंङ लम्प, हल्लार दंङ हथियार तोईरे।
4दोथर यीशु दुहरे भत्ते गप्पार अंऊ दोरंङ साते शुहबिमी तोहई, ञेंहच़ाते दोरच़ी हुंच़िरी, दंङ दोतु हखा रुहक्ती, “अरी पेट्रातंई?” 5दोच़ी दोबि जुबाब रेंई, “नासरत नगरो यीशु बि।” यीशु ज़ि दोतंङ साते कुंई, “गेह शुगाह।” दंङ दोबि च़ुमज़ि लहज़ा यहूदा ला दोतंङ साते खड़े तोहई। 6यीशु ऊ दी कुट्रिमी रंङ साते, “गेह शुगाह,” दोरे थलका शुहचे षोड़िंङ दह्चे इलिर। 7दंङ यीशु ज़ि दोरे यच़ाह रुहक्तिर, “केहरे अपि पेट्री लेहकी तोतोन।” दोच़ी कुतोह, “नासरत नगरो यीशु बि।”
8यीशु ज़ि जुबाब रेंई, “गेह ता केतंङ साते कुट्रे च़रतिगा कि गेह शुगाह, अगर केहच़ी गेह पेट्रातंई साते गिऊ चेला तिंङ इबि रांही।” 9दीह दिऊ थल्जी शुई कि यीशु ज़ि अंऊ तुई कुहते दुह हेले शुबी जूंस: “अरी केई गिह्बी रेंईना दोतु बिचंङ च़ि इच्च़ा ला माह योह्ंशिरी।” 10शमौन पतरसे, अच़ि तलवार तते, खुंखुंरी हुंच़े यहुदी महापुरोहितो परगरो टोईच़ी चलाके दोऊ सुचंङ रेहट्रा हुन्ज़े च़रति, दुह परगरो मिन मलखुस तोहई। 11दंङ यीशु ज़ि पतरस ओ हखा कुंई, “केनोह तलवार केह्चे केहऊ। अंऊ दुखो कोली पिता परमेश्वरे गिह्बी रांहषी ततो छि गेह दुह माह तुंङमोग आ?”
हन्ना ओ तुईज़ी यीशु
12दंङ सिपाही ज़ि एनोह सुबेदारे दंङ यहुदी मंदिरो पेहरेदारा तंङ साते ठ्रोहका शुहचे यीशु बि च़ुमने च़रतिर, 13दंङ तुई दोबि हन्ना ओ कछंङ लेन्ज़ा शिलिर, छना कुचे दुह, दुह सालो यहुदी महापुरोहित काईफाऊ रूह्हु तोहई। 14दीह दुह ए काईफा तोहई, अच़ि यहुदी मीहतिंङ सलाह रंदे कि ञेंहतु थल्जी इच्च़ा मीहू सी रुठे शुह।
पतरस ओ इन्कार
15शमौन पतरस ए इच्च़ा अई चेला यीशु थले शुहचे इलिरे। दी चेला यहुदी महापुरोहितो जान पहचानो तोहई, दंङ यीशु रंङ साते यहुदी महापुरोहितो ल्वाड़िंङ इलि। 16पर पतरस धह्कते पेतंङु दोर्तिंङ खड़े तोहई, दंङ दुह अई चेला अपि यहुदी महापुरोहित सेहच़ाते दुह धक्तेका हुंच़िरी दंङ पेतंङ रुड्रांडङ अरी मेच़िमी तोहई, दोरंङ साते कुचे पतरस बि तोंखा लेन्ज़ा हति। 17दुह दासी ज़ि अरी पेतंङ रंड्रा तोहई पतरस बि कुंई, “छि कांह ला दिह मीहू चेला तु बिचंङ च़ि शुनाह?” पतरसे कुंई, “गेह माह शुगाह।” 18परगर ए सैनिकरे सोईऊ बजह च़ि क्रो तुप्चा मेह ट्रोडी लेहकी तोईरे, दंङ पतरस ला दोतंङ साते खड़े शुहचे मेह ट्रोड्राते।
यहुदी महापुरोहितो तुईज़ी यीशु
19दोथर यहुदी महापुरोहिते यीशु ऊ चेला तु पाहठी ए दोऊ शिक्षा ओ पाहठी रुहक्ती। 20यीशु ज़ि दोबि जुबाब रेंई, “गेह भत्ते तंङ साते साफ-साफ कुहषी तातग; गेह यहुदी सभा घरबारंङ ए यहुदी मंदिरंङ अंऊर भत्ते यहुदी मीहरे ठ्रोहका शवातेर, हमेशा शिक्षा रंदेग दंङ ब्याके छले कुहषी माह। 21केई गिऊ दोरच़ी दिह सवाल छिले रुहक्च़ातंई? रेड्रा दोतु हखा रुहक्तु, कि गेह दोतु हखा छि कुहतग? खंणु, दोतिंङ पता तोह कि गेह छि-छि कुहषी तातग।” 22अपेहल दोई झांह कुंई, ता यहुदी मंदिरो पहरेदारातु बिचंङ च़ि इदि अंऊ दोऊ कछंङ खड़े तोहई, यीशु बि चटे रें कुंई, “छि केई यहुदी महापुरोहिता बि झांह ठ्रोह जुबाब रंड्रातन आ?” 23यीशु ज़ि दोबि जुबाब रेंई, “अगर गेह छा गलत कुहतग, ता गिह्बी कंड्रु कि दिह छि तोहई; पर अगर ठीक कुहतग, ता गिह्बी घाह छारिंङ केट्रातन?” 24यीशु अईता ला छ़ुह्च़ी तोहई, दंङ हन्ना ज़ि दुह यहुदी महापुरोहित काईफाऊ कछंङ च़चे च़रति।
पतरस ओ यीशु बि सेहच़िमी दोरच़ी यह्च़ा इन्कार लहज़ी
25शमौन पतरस खड़े शुहचे मेह ट्रोट्री लेहकी तोहई। दंङ दोच़ी दुह रुहक्ती कुतोह, “छि कांह ला दोऊ चेला तु बिचंङ च़ि शुनाह आ?” दोई इन्कार लहजे कुतोह, “गेह माह शुगाह।” 26यहुदी महापुरोहित ओ परगरतु बिचंङ च़ि इच्च़ा अरी दोऊ नातो बिचंङ च़ि तोहई, अतु रेहट्रा पतरसे ट्रिकाते, “छि गेह कनिंङ यीशु रंङ साते बगीचा रिंङ माह तंङातेगा?” 27पतरसे यह्च़ा इन्कार लहरी, दंङ दोथरे ए कुकुड़ हाऊष रें चरति।
यीशु बि पिलातुस ओ कछंङ हपि
(मत्ती 27:11-14; मरकु 15:2-5; लूको 23:2-5)
28दंङ दोरे यीशु बि काईफा ओ दोरच़ी रोमी राज्यपाल पिलातुसो दरवारो हखा रेंज़ा शिलिर दुह मुंजे सरके कि टेम तोहई, पर दोरे ऐनार महलो अंद्रेग माह इलिर, छना कुचे दोतु बिचंङ अगर अरीला तोंखा य्वाते, ता दुह अशुद्ध शुहचे य्वाते दंङ दोतिंङ फसह त्याहरो बगत ज़ेइमी आज्ञा माह खोक्शते। 29दंङ पिलातुस दोतु कछंङ धह्तेका अति दंङ कुतोह, “केहच़ी दीह मीहू टोईच़ी छि गप्पा ओ पाहठी इल्ज़ाम लगाएच़ातोन?” 30दोच़ी दोबि जुबाब रेंई, “अगर दिह कुकम लहज़ा माह शुहचंङ ता ञेंहच़ी दोबि कांह कछंङ माह हपि तोहई।” 31पिलातुसे दोतंङ साते कुंई, “केहच़ी ए दिह्बी रेंज़ा शिलांई दंङ केनातु कानूनो हिसाबे दिऊ न्याय लांही।” यहुदी सेंहणा ज़ि दोरंङ साते कुंई, “ञेंतिंङ अतिंङ ला मौत ओ सज़ा रंड्रीमी अधिकार माह।” 32झांह दिऊ थल्जी शुई कि यीशु ऊ दुह गप्पा पुरा शोतो, अतु पाहठी दोई कुहषी तारेह कि दोऊ मौत छना ठ्रोह शोतो।
33दंङ पिलातुस यच़ाह दरवारो तोंखा अच़ा इलि दंङ यीशु बि महलो अंद्रेग बुलाएती, दंङ दोऊ हखा रुहक्ती, “छि कांह यहुदी मीहतु रज्ज़ा शुनाह?” 34यीशु ज़ि दोबि जुबाब रेंई, “छि केई दीह गप्पा केनोह तरफे कुट्रातन आ या ऊई ज़ि गिऊ पाहठी करंङ साते कुहतोर?” 35पिलातुसे जुबाब रेंई, “कनिंङ पता तोह कि गेह यहुदी माह शुगाह। कांह ए जातिऊ मीहज़ी ए यहुदी मोह्ड़े पुरोहित ज़ि केतिंङ गिऊ हवाले लाहतोर, केई छि लाहतेन?” 36यीशु ज़ि जुबाब रेंई, “गिऊ राज्य दीह संसारो माह शुह; अगर गिऊ राज्ये दीह संसारो शुहचंङ, ता गिऊ गप्पा मनेक्च़ा दोरे, गिह्बी यहुदी सेंहणातु हवाले लहच़िमी बजह च़ि दोतु खिलाप शुहचे इबि तोहई: पर गिऊ राज्य दिह संसारो माह शुह।” 37पिलातुसे दोरंङ साते कुई, “दंङ छि कांह रज्ज़ा शुनाह?” यीशु ज़ि जुबाब रेंई, केई कुट्रातन कि गेह रज्ज़ा शुगाह; गिऊ जन्म लेहपच़मि ए संसारारंङ अपिमी बजह दिह शुह कि गेह सच्चाई ऊ पाहठी सिखाएपोग। सच्चाई ऊ टोहकठे जोज़ा दोरे भत्तेर गिऊ गप्पा रेड्रातोर। 38पिलातुसे दोरंङ साते कुई, “सच्चाई छी शुह?” दंङ दिह कुट्रिमी थल दुह यहुदी सेंहणातु कछंङ इलि दंङ दोतंङ साते कुहतो, “गिह्बी ता दोऊ अंद्रेग छले गलती माह खोकसिरी।
यीशु या बरअब्बा
39पर केहतु दीह रिवाज़ तोह कि गेह फसह त्याहरो मुका इच्च़ा मीह बि रिहा लोहग। ता छि केहच़ी जुंज़ातंई आ, कि गेह केहतु थल्जी यहुदी तु रज्ज़ा बि रिहा लोहग?”
40दंङ दोच़ी हाऊष रेह कुंई, दिह्बी माह, “पर ञेंहतु थल्जी बरअब्बा बि रिहा लेह च़रतु।” दंङ बरअब्बा डाकू तोहई; अरी फूट, झगड़ा ए मीह सच़िमी बजाहज़ि कैद तोहई।
Избрани в момента:
यहून्नो 18: LBFNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.