लूको 15
15
योह्ंषा त्रेंईतु कथा
1भत्ते चुंगी लेहपच़ारे पापी मीहरे यीशु कछंङ अपातेर दोऊ गप्पा रेड्रिमी थल्जी। 2पर फरीसी मीहरे ए यहुदी शास्त्रीरे एनातु बिचंङ दोऊ पाहठी गप्पा लहज़ी लेहतिर कि, “दिह ताह पापी मीहतंङ साते दोहआ दंङ दोतंङ साते बगत ला ज़ोआ।”
3दंङ यीशुज़ि दोतंङ दिह कथा कुड़ी; 4“केहतु बिचंङज़ि झांह ठ्रोह अरी तोह अच़ि राह त्रैंईरे ततो, दंङ दोतु बिचंङज़ि इच्च़ा योंहंषा यवा, दंङ पी निंज़ो त्रैंईरे सुनसान ठाहरीरिंङ केह दुह योंहंषा त्रैंईबी, अपेहल तचेक मखोकसा माह पेट्रा? 5दंङ अपेहल दुह दोहआ दंङ दुह राजी शुहचे दोबि एनोह कांह कछंङ कुहच़ा।” 6दंङ एनोह चुंङ अंज़े एनोह साथिरे ए पड़ोसिरे ठ्रोहका लेह कुट्रा, गेरंङ साते खुशी मनातुंई, छना कुचे गिऊ योंहंषा त्रैंई खोकसा इलज़ा। 7गेह केतंङ कुट्रातग ध्यांए इच्च़ा पापो दोरच़ी सेहम यह्च़ा पापीऊ थल्जी ला स्वर्गंङ धोंणे खुशी शोतो, छना कि पी निज़ा झांह ठ्रोह मीहतु पाहठी माह शुबी अरी सोचेक्च़ातोर कि दोरे धर्मी तोतोर अतिंङ पापो दोरच़ी सेहम यहच़िमी ज़रूरत माह।
योह्ंषा ढबोह कथा
8“दंङ यीशुज़ि अई इच्च़ा कथारंङ साते कुहतो, अगर अरीया मेच़मीऊ कछंङ सा मुलतु सिक्का तोह दंङ इच्च़ा सिक्का योंहंषा योतो ता, दोई लम्प तुप्चे ए चुंङ निहके लोहतो दंङ दुह मुका तचेक ध्यानारंङ साते पेट्रोतो अपेहल तचेक दुह सिक्का माह खोकसोतो? 9दंङ अपेहल दुह सिक्का खोकसा य्वात ता दुह एनोह साथीरे ए पड़ोसिरे ठ्रोहका लेह कुट्रा, गेरंङ साते खुशी मनातुंई, छना कुचे गिऊ योंहंषा सिक्का खोकसा इलज़ा 10गेह केतंङ साते कुट्रातग पापो दोरच़ी सेहम यह्च़ा इच्च़ा पापीऊ थल्जी परमेश्वरो स्वर्गदूतातु तुईज़ी खुशी शुहबी।”
उड़ाऊ योहू कथा
11दंङ दोई अई इच्च़ा कथारंङ साते कुंहई, “इच्च़ा मीहू झुह्ट योह तोईरे।” 12दोकुतु बिचंङज़ि कवचि योहे एनोह बाह रंङ साते कुंहई, “हे बाह, ज़मीन जयदातो दोरच़ी, छि गिऊ हिस्सा तोह दुह धा गिह्बी रेह च़रतु” बाहे झुल्ला योहतु बिचंङ एनोह ज़मीन जयदात फाहे च़रति। 13दंङ थोड़े अरे ध्याड़ो थल कवचि योह भत्ते धिर ठ्रोहका लहज़ा इच्च़ा ऊई तार देशंङ अच़ा इलि दंङ दोर तिंङ भोग-बिलासारिंङ एनोह भत्ते टंगा ढबाह योह्च़े च़रति। 14अपेहल भत्ते धिर योह्च़े केहरी, दंङ दुह देशंङ मोह्ड़े अकाल अति, दंङ दोऊ कछंङ ज़ेइमी थल्जी छले माह बचेक्ति। 15दंङ दुह इच्च़ा मीहू दोर तिंङ कम लहज़िमी थल्जी इलि अंऊ दुह देशो नागरिक तोहई। दोई दोबि एनोह रीहरिंङ सुअर रवाक्च़िमी थल्जी चरच़तो। 16दंङ दुह धोंण योंए तोहई, दुह चारा ज़ेइमी रंङ साते ला खुश तोहई अंऊ सुअरतु थल्जी तोहई; छना कुचे दोबि अच़िला छले माह रंड्रातेर।
17अपेहल दोबि समझ अति दंङ कुट्री लेहती; गिऊ बाहो अंयों मज़दूर तोतोर अंऊ खुकटुंङ पिंङे बगत ज़ोवातोर पर गेह देर्तिंङ योंहष ए सीए लेहकी तोतोग। 18दा गेह अहच़ा घेंङौ बाहऊ कछंङ योग दंङ दोरंङ कोहग कि, हे बाह, गेह परमेश्वरो खिलाप ए कनु खिलाप पाप लाहतग। 19धा गेह दिऊ जोगे ला माहकेषातोग कि कांह योह कहलाएपोग, गिह्बी केनोह इच्च़ा परगर चेहके तेह तोह
20दोपहल दुह, दुह देश छोड़ेके एनोह बाहो हखा वापिस अच़ा इलि। दुह अईता ऊईतारे तोहई कि दोऊ पिता परमेश्वरे दुह खांई दोऊ टोहकठे दाह अच़ा अति, एनोह योह हखा ज़रका रेह दंङ दोरंङ साते ग्वाक्षा दंङ दोबि महसे दाह लहरी।
21योह ज़ि दोबि कुहतो, हे बाह, गेह परमेश्वरो खिलाप ए कनु खिलाप पाप लाहतग। धा गेह दिऊ जोगे माह तोहग कि गेह कांह योह केहलापोग 22पर पिता परमेश्वरे एनोह परगरातिंङ कुहतो, युरनाह रूठे बे रूठे खमज़े हुंज़े दिबी लेहतुंई दोऊ गुहड़िंङ गुईथब, दंङ कोन्ज़ा रिंङ बुह्टर लगाएतुंई। 23दंङ मोह्ड़े धामो तेयारी लांही कि हेंज़ी दुह धाम ज़ोन ए खुशी मनाएपोंई। 24छना कुचे दिह गिऊ योह सिए इलजी तोहई, दाह षीङे इलजे; योंहंषा इलजी तोहई, धह खोकसा इलज़ा। दंङ दोरे खुशी मनाएच़ि लेहतिरे।
25“दुह मुका दोऊ मोह्ड़े योह रीहरिंङ कम लहज़ी लेहकी तोहई। दंङ अपेहल दुह चुंङो कछंङ पिचा, दंङ दोई गीतरे, कुल्ड्री ए गहरपिमी सग थशातो।” 26दंङ दोई इच्च़ा परगर बुलाके रूह्कातो, दिह छि शुहबी लेहकी तोह? 27“दोई दोरंङ साते कुहतो कांह न्वा चुंखा वापिस अंज़े तोह, दंङ कांह पिता परमेश्वरे मोह्ड़े धामो तेयारी लहसी ततो, छना कुचे दुह भला चंगा चुंखा अच़ा अंजा।
28दिह रेड्रीरंङ दोबि महस रोहष अच़ा अति दंङ दुह तोंखा इबि माह लेहती: दंङ झांह लेह दोऊ बाह धह्कते अच़ा अति दंङ दोरंङ तोंखा अपिमी थल्जी बिनती लहज़ी लेहती। 29दोई बाहबि जुबाब रें, खंणु गेह धोंण सालबे कांह सेवा लहज़ी लेहकी तोतोग, दंङ अपेहल ला कांह गप्पाबि मना माह लहरिगा, तांला केई अपेहला गिह्बी छले रुठेधिर कि गेह घेंङौ साथीरंङ साते खुशी मनाएपोग। 30पर अपेहल कांह दिह योह अच़ि एनोह भत्ते टंगा ढबाह कुकम लहज़ाड़ो टोईच़ी योह्च़े चरच़तो, अंजा, दंङ केई दोऊ थल्जी मोह्ड़े धाम तेयार लेह लहरिन। 31दोई दोबि कुहतो, गिऊ योह कांह हमेशा गेरंङ साते तोतोन; दंङ छिल्ला धिर गिऊ तोह दुह भत्ते कांह ए शुह। 32पर हेंतेग खुशी मनाचिऐ मगन शुहबिमी शुह, छना कुचे दिह झांह ठ्रोह तोहई कि कांह दि न्वा सिए इलजी दोतु ठ्रोह तोहई, दंङ यह्च़ा षीङे इलज़ा; योंहंषा इलजी तोहई, दा खोकसा इलज़ा।”
Избрани в момента:
लूको 15: LBFNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.