मत्ती 23
23
शास्त्री ए फरिसी तंङ साते साबधान
(मरकु 12:38-40; लूको 20:45-47)
1दंङ यीशुज़ि भीड़ ए एनोह चेला तिंङ कुहतो। 2“यहुदी शास्त्री ए फरीसी मीहतु कछंङ मूसाओ कानूनो व्याख्या लहज़िमी अधिकार तोह; 3दिऊ थल्जी दोच़ी केतंङ छिले कुड़िर दुह लांई ए मनेक्तुंई, पर दोतु ठ्रोह कम थलांई; छना कुचे दोच़ी शिक्षा ता रंड्रातोर पर दोऊ टोहकठे जोज़ातोर माह। 4दोच़ी भत्ते पाहठी कानून बणाएच़ातोर दुह मनेक्च़ी मीहतु थल्जी खरे तोह, दोरे ज़बरदस्ती मीहतु दोरच़ी दुह कानून मनेक्च़ी लहज़ातोर; पर दोच़ी ऐनाह च़ि दुह कानून माह मनेक्च़ातेर। 5दोच़ी एनातु भत्ते कमारे मीहतिंङ कंड्रिमी थल्जी लाहतोर; दोच़ी एनातु जंतरा बिलेगदो दंङ एनातु खमज़ेतु झालर लहमे लहज़ातोर। 6-7दंङ दोच़ी जूंस कि मीहच़ी बज़ारंङ दोतु इज्ज़त लोहर। दंङ यहुदी सभा घरबारंङ मोह्ड़े-मोह्ड़े ठहरि रिंङ दंङ धामंङ मोह्ड़े-मोह्ड़े रुठे ठाहरीरिंङ पेट्रातोर।
8पर केरे गुरु थशुंहई, छना कुचे केहतु इच्चे गुरु तोह, केरे भत्ते न्वारे-रिंङरे शुई। 9केन्दु बाहबि केट्रे ऊई अतिंङ ला धरतीऊ टोहकठे बाहऊ ठाहरीऊ इज्ज़त थाह रांई छना कुचे केहतु बाह सिर्फ परमेश्वर शुह अंऊ स्वर्गंङ तोह। 10दंङ मालिक लाह थाशुंई, छना कुचे केहतु इच्च़ा मालिक तोह मतलब मसीह। 11अरी केहतु बिचंङ मोह्ड़े तोह, दुह केहतु सेवा लहज़ा बणेक्तुंई। 12अच़िला एनाबि मोह्ड़े लोहतो, दुह कवचि शुहचे योतो; दंङ अच़िला ऐनाबि कवचि लोहतो दुह मोह्ड़े शुहचे योतो
शास्त्री ए फरिसी तु ढ़ोंगो भत्सना
13हे कपटी यहुदी शास्त्री ए फरीसी मीहरे, केहतु टोईच़ी धिक्कार! केहच़ी मीहतिंङ स्वर्गो राजंङ इबिमी अम बन्द लाहतंई, माह ता केनारे दोहर य्वातंई माह दोहर इल्जातिंङ इबी रंड्रातंई।
14(हे कपटी शास्त्री ए फारिसिरे केहतु टोईच़ी धिक्कार! केहच़ी रंणी मेच़मीतु घरबार जें चरच़ातंई दंङ कंड्रिमी थल्जी भत्तेतु तुईज़ी महस प्रार्थना रिंङ बंङज़ातंई; दिह लहज़ी केतिंङ महस सज़ा खोकसोतो) 15हे कपटी यहुदी शास्त्री ए फरीसी रे केहतु टोईच़ी धिक्कार! केरे इच्च़ा मीहबी केतंङ साते अपिमी भत्ते ठाहरीरिंङ य्वातंई, अपेहल दुह केतंङ साते अच्च़ा अपा दंङ दोबि केनाबे दुगुना नरकंङ इबिमी जोगे बणाएठ्रातोन।
16हे काणे अगुवारे, केहतु टोईच़ी धिक्कार! केहच़ी सिखाएच़ातोनि कि अच़ि अरीया मीह मंदिरो कसम लहरी ता दंङ दोबि छले फर्क माह पढ़ेक्पोतो। पर अच़िया मंदिरो ज़ङों कसम लहरी ता दोबि फर्क पढ़ेक्पोतो। 17हे बेबकुफहारे, काणेरे, अरी मोह्ड़े शुह; ज़ंङ आ दुह मंदिर अतु ज़ंङ पवित्र शवाह? 18दंङ दिह ला सिखाएक्च़ातंई कि अच़िया मीह बेदीऊ कसम लहरी ताह छले फर्क माह पढ़ेक्पा, पर अगर अच़िया बेदीऊ टोईच़ी केहषी चीज़ो कसम लाह ता दोऊ फर्क पढ़ेक्पोतो,
19हे काणे मीहरे, अरी मोह्ड़े तोह; तग आ बेदी अतु दोहरची तग पवित्र शवाह? 20दिऊ थल्जी अच़ि बेदीऊ कसम लाह, दोई दोऊ ए छिला दोऊ टोईच़ी तोह दोऊला कसम लाह। 21अच़ि मंदिरो कसम लाह, दोई दुह परमेश्वरो अंऊ दोहर बंङज़ा दोऊ लाह कसम ज़ोआ। 22अच़ि सर्गो कसम ज़ोआ, दोई परमेश्वरो सिहासन ए दोऊ टोईच़ी वंङज़ाहड़ो लाह कसम ज़ोआ। 23हे कपटी यहुदी शास्त्री ए फरीसीरे, केहतु टोईच़ी धिक्कार! केहच़ी पुदीना सोंप ए जीरो दशमंश ता रंड्रातंई, पर केहच़ी मूसाओ कानूनो असली गप्पातु यानि इंसाफ, दाह ए विशवास छोड़ेके केहषी तातंई; केतिंङ दशवांश रंड्री जूंशी तोहई कि दिहरे ला लोहआ लाहयंङ दंङ दोहरेला ब्याड़ा माहलायाहङ।
24हे काणे अगुवारे, केहरे ज़रूरी कानून मनेक्च़िमी थल्जी ता महस सोचेक्च़ातंई छना छि केहच़ी तुंङज़ातंई दोरच़ी यंङज़रे ला दोखा तोहतोंई, पर केहच़ी परमेश्वरो ज़रूरी गप्पा माह मनेक्च़ातंई! दुह ऊंठो चंङज़िमी ठ्रोह तोह।
25हे कपटी रंड्रा यहुदी शास्त्री ए फरीसी मीहरे केहतु टोईच़ी धिक्कार! केहरे झांह ठ्रोह नंनदे शुई अरी धह्कतेकी साफ तोतोंई पर तोंङज़ि अईता ला झख तोतोंई। दुह झांह ठ्रोह तोह कि केहच़ी ऊईतु थल्जी रुठे कंड्रातंई। पर केहतु सेहम तोंङज़ि लालच ए स्वार्थे पिंङषी तोह। 26तुहई केतिंङ लालची ए स्वार्थी शुबी बंद लेह जुंशी तोह। दोहपल केहच़ी दुह लेह तरपोंई अंऊ धर्म हिसाबे ठीक तोह। दुह इच्च़ा झांह नंदे ओ ठ्रोह तोह अंऊ तोंङ ज़ि ए धह्कतेकी झुल्ला हासी साफ तोह। 27हे कपटी रंड्रा यहुदी शास्त्री ए फरीसीरे केहतु टोईच़ी हाय! केरे चुना लहसी कब्र ठ्रोह शुई अंऊ धकतेखी ता सलठे तंङफी पर तोंङसी सी दोतु रूहसपारे भत्ते पाहठी गंदगी पिंङषी तोह। 28ध्यांए केरे लाह धकतेखी मीहतिंङ धर्मी तंङफातंई, पर तोंङसी कपट ए, अधर्म ए पिंङषी तोहतोंई।
शास्त्री ए फरीसीतु टोईच़ी दण्डो भविष्यबाणी
29हे कपटी रंड्रा यहुदी शास्त्री ए फरीसी मीहरे केहतु टोईच़ी हाय! केहतु बाह-मेमे ज़ि अरी भविष्यवक्तारे सचातेर केहच़ी दोतु कब्रारारे सोठेकच़ातंई दंङ धर्मीतु कब्रो इज्ज़त लोहातंई, 30दंङ कुट्रातंई, अगर ञेंरे हेंदु बाह-मेमेतु मुक्का शुहचंङ ता भविष्यवक्तातु हत्यारिंङ दोतु साथी माशुहचंङ। 31दिह कुचे केहच़ी झांह कंड्रातंई कि केहरे ए दोतु खानदानो शुई अच़ि भविष्यवक्तारे सचातेर। 32गिह्बी पता तोह कि केहरे दुह मांजी कम पुरा लहज़ा शुई अंऊ केहतु बाह-मेमेज़ि शुरू लाहतेर।
33हे ज़हरीले ओमड्रो कटुतु ठ्रोह मांजी मीहरे, केरे नरकंङ सज़ाओ दोरच़ी माह बचेकपोंई। 34दिऊ थल्जी खंणुई, गेह केहतु कछंङ भविष्यवक्ता, बुद्धिमानरे दंङ यहुदी शास्त्रीरे चरच़ातग; दंङ केहरे दोतु बिचंङज़ि केहच़ी रेइरे सचे च़रपोंई ए रेह क्रूसंङ चड़ाएपोंई, रेहईतिंङ यहुदी सभा घरबारंङ कोड़े रंङ साते तेंङमोंई दंङ इच्च़ा इलाकाओ दोरच़ी अई इलाकारिंङ पोकफी लोहन। 35दिऊ थल्जी धर्मी हाबिल ओ दोरच़ी बे तिखियाहो माह जकर्याह तचेक अतिंङ केहच़ी यहुदी मंदिरंङ ए बेदीऊ बिचंङ सचातंई अंयों लाह धर्मीतु हत्या धरतीरिंङ केरे केनातिंङ दोषी षोंई। 36गेह केतंङ हेले कुट्रातग दिह भत्ते हत्याओ सज़ा दिह पीढ़ीऊ मीहतिंङ अपतो।
यरूशलेमो थल्जी क्रपि
37हे यरूशलेम शहरो मीहरे, हे यरूशलेम! केई भविष्यवक्तारे सचे चरच़ातन दंङ अरी कांह कछंङ च़रति तोईरे, दोतु टोईच़ी रघटे थाहचातन। अंयों ए फेरा, गेह चेहतिगा कि छना कुकड़ी एनोह कटुरे पाखो पोयंङ सोठेके तहच़ा ध्वांए गेह लाह कांह कटुरे ठ्रोहका लोहग, पर केहच़ी माहजुंज़ातंई। 38खांई केहतु थल्जी यहुदी मंदिर उजाड़ केह्षा यवा। 39छना कुचे गेह केतंङ कुट्रातग दिऊ थल्जी अपेहल तचेक केहच़ी माहकोंई, धन्य शुह दुह अरी प्रभुऊ अधिकारंङ साते अपाह दोहथल तचेक केहच़ी गेह यहचा मखोयोंई।”
Избрани в момента:
मत्ती 23: LBFNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.