KAHTAMYENGHAN 16
16
Hagar Hei Ishmael
1Sha-a Sarai, Abram shekonyuwe Ite ha puh moi yepaitam. Hüpoi yha tepu rhanyu ja, Egypt sheko Hagar she minpu ngoh; 2Sarai-e Abram te i, “Leitüoh, sha-a taowe naha puhlak mepu Youngwanpawe tienteki; ü-rhanyu phei nang shitüoh; aowe shingpu, yha kaiye taowe hayim tüone ok.” Hüyange Abram-e Sarai ngao me yah. 3Tüokhei Abram Kanan kahtok me wangpeng pen ngoh phei me, Sarai, Abram shekonyuwe yoi rhanyu Egypt yhala Hagar, woipeiye, netanpa Abram shekone menglak jingne pha. 4Abram-e Hagar phei mei, hüyange yha püm yekengpe ngai; hüyange aope yhawe yoi püm yekengpe ngaiteki she shing, yhawe yoi nokpunyute yanao lei.
5Tüophei me Sarai-e Abram te i, “Hagarwe üte yanao-e lingpuwa nange püohpu jingne ngoh nang. Taowe ü-rhanyu nang jakuh me pha, hüyange aope yhawe yha püm yekengpe ngohnang she nge, yha mükshao me üte yanao-e ngai. Youngwanpawe tümnipa me ngao phünne tam tüoh!”
6Abram-e jan, “Nang rhanyu-a nang yak me ngohnang, nange yhate hanghepa shemeilak kih teih tüo kih-e jonyah.” Tüophei me Sarai-e Hagarte yemeipe kon hüyange yha mepu Hagar phet-e tai.
7Youngwanpa shongmokpawe wanwüng jeng, Shur te taipu lam nah shaoha ja me Hagar tüo. 8Hüyange lye tong, “Sarai rhanyu Hagar, nang ü-mepu peipu, hüyange üpükente tailak shi?” “Taowa ü-nokpunyu Sarai shaomepu phet-e taipunyu weih” she yhawe jan.
9Youngwanpa shongmokpawe yhate i, “Nang nokpunyu tangte leih-e yetüoh, hüyange yha shaoshan tüoh.” 10Tüophei me Iye yha te üne-o i, “Taowe nanghu nangha maawe jalun tamlak, tüome jamloi ngaipu jingne ipu yekümpe ngohlak.” 11Youngwanpa shongmokpawe yha te i, “Leitüoh, nang püm yekengpe ngohnang, hüyange nange netan moija pailak; hüyange nange I min lshmael she nyik tüoh, hangjingne Youngwanpawe nang shange wennekapu jaiteki. 12Hüpoi nangha-a kahta yo me phao gado kih-e ngohlak; I yak kahta üshei phei wepa ne ngohlak, hüyange kahta lili yak I phei wepa ne menglak. Hüyange I yoi jeiheinaolan üshei phei-o wepa ne ngohlak.”
13Tüokhei Hagarwe tong, “Taowe ütingpa me Kahwang ngepu a, hüyange tüopa jeng ilak jingne ngohlak a?” Tüokhei aowe yha phei ngao tüopa Youngwanpa te yhawe “Kahwang Aowe Nge-oknang.” she nyik. 14Tüokhei tüopa yengnung te Beer-lahai-roi#Üyin yengnung aohe-e tao ngenang. she nyik; hatüowa Kadesh hei Bered nipa me ngohnang.
15Tüokhei, Hagarwe Abramte netan moija paitam; hüyange Abram-e Hagarwe puhtampu yoiha te Ishmael she nyik. 16Hüyange aope Hagarwe Abramte lshmael puhtam, Abram nyupuh wangpeng detet me wok ngoh yangki.
Избрани в момента:
KAHTAMYENGHAN 16: KONYBSI
Маркирай стих
Споделяне
Копиране
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fbg.png&w=128&q=75)
Искате ли вашите акценти да бъдат запазени на всички ваши устройства? Регистрирайте се или влезте
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.