KAHTAMYENGHAN 18
18
Abraham Hei Sarah Nite Netan Nahaja Janpu
1Aope Abraham nyihning wanglüm ju me I nyenok tafün shongme shot-e ngoh, Youngwanpa Mamre longkhampee yome I tangte ngai. 2Hüyange lye nganne lei, hüyange leitüoh, kahta lüm I sheshao me yonge nge. Aope lye iman nge, I nyenok tafün shong mepu iman phei hüolak jingne phette wenne, kahtok ngoiye khuh-e ta. 3lye i, “Üyonglan, tao numan sheshao me monghahlakpa ne nge okma-a, nang shaoshanpa mepu linne tahtai. 4Sha-a yeng üjingha yah peitam küning, hüyange numan ya tuhyange, peshüm phang me numan toloi meikei. 5Hüwante taowe hahying üjingha yah peiküning, hüyange numan toloi meitüoh, tüophei me nakshih numan yayong tüoh; hangjingne numan-e numan shaoshanpa tangte pei.” Iman-e i, “Meiteki nange hangke i hüke lingtüoh.”
6Tüokhei Abraham nyenok te mam-e Sarah tangte ong, hüyange i, “Shemeipupa ankhoih taksheng lüm yah-e tümtüoh, hüyange hatüo nyütyange an lingne mamtüoh.” 7Hüyange Abraham mahu ükhong yote phette wen, hüyange mahu üha shenüt pupa ja yah-e ye-e namnopalan te pha; hüyange iman-e hatüo mam-e namno. 8Tüophei me lye an yao, hüyange düamyeng, hüyange mahu üha mei lye tüm ne tam-e angpu tüolan hahying yahwenne iman sheshao me angtam; hüyange tüoken peshüm phang me lye imante namnowe uhying, hüyange iman-e hah.
9Iman-e Ite tong, “Nenok sheko Sarah ümeken me ngoh nangki?” Hüyange lye i, “Yha nyenok me ngoh nang.”
10 #
Rom 9.9. Youngwanpawe#Yejema-a, iman yo mepu naoshe jawe i. i, “Ngaiwang hakih tingme Tao leih yekülak; hüyange nenok sheko Sarah-e netan moija pailak.” Hüyange Sarah-a nyenok tafün shong I tokphei me jaiye ngoh. 11Sha-a Abraham hei Sarah ni yeonge wuteiye ngoh, hüyange Sarah-a lekeng ünu taipu lakteiye ngoh. 12#1 Pet 3.6.Tüokhei Sarah yoi mongjang me nyiye teih yange i, “Tao yeonge wunyu ne mengte pheite hüyange ü-netanpa-o wupa ne mengte pheite, taowe lahnyikke mongmei tüolak a?”
13Hüwante Youngwanpawe Abraham te tong, “Tao wunyu ne mengte phei te ütingme taowe naha puhlak a she hangne Sarah-e nyipu shi?” 14#Mt 19.26; Mk 10.27; Lk 1.37; Rom 9.9.Youngwanpa jingne jamloi wanpu toilam ja nehoi ngohnang kü a? Taowe ngaoyangpu kih-e, aope ngaiwang hakih ting ngoilakei, Tao nang tangte leih-e yekülak, hüyange Sarah-e netan naha ja puhlak.
15Sarah yeong nyam hüyange ngaoleih hüke i, “Tao yenye ja.” Hüpoi Iye i, “Nang üting me nyiküja.”
Abraham-e Sodom Jingne Yoppedo
16Tüophei me kahtalan tüoken mepu yayonge tai, hüyange Sodom yekaote lei tai hüyange Abraham-e iman lünge tüoh. 17Hüyange Youngwanpawe yoi nying nying te i, “Taowe hanghe linglak ne ngoh Abraham te lowe anglak a! 18#Kaht 12.3; Lam 3.25; Gal 3.8.I-a wong nangpu hüyange jat üyongne menglak, hüyange I kaiye jatlan üshei moiman tamlak. 19lye yoi halante hüyange yoi huhayimlan te ü-ngao jailak jingne, hüyange hanghe khakshupu hüyange ütingpa ngoh linglak ngao phawe tamlak jingne Taowe I leyangki. Iman-e khakshuwe lingma-a, Taowe I jingne janyangpu khongkümpu Ite linge tamlak.”
20Tüophei me Youngwanpawe i, “Sodom hüyange Gomorrah püohpinpu wüng loishe jainang hüyange iman-e ompu ünu-a mongshanglak ne ngohnang. 21Iman-e püohpin yangpu Taowe jaihümpuwa üting jeya shinglak Tao lailak.”
22Tüophei me kahta ni-a yayong hüyange Sodom yekaote tai, hüpoi Youngwanpa-a Abraham phei ngoh. 23Hüyange Abraham Youngwanpa shong te owe wen, hüyange i, “Nange hang ümengo yenangpupa ünu ümenglan phei mah ne tamlak a? 24Chingnyu me khakshupu kahta denga ngohma-a, nange tüome ngohpu khakshupu kahta denga jingne chingnyuwa tükke ye-angpe mahtamlak a? 25Hüke linglak nang mepu yeonge jaiye ngohkülak; ünu ümengpa kahta khakshupulan phei mahma-a khakshupulan ünu ümeng kih-e ngailak! Hatüokih linglak nang mepuwa yeonge jaiye ngohnang! Kahtoknyu khongküm ngao phünpawe ngaoting yejonkülak a?”
26Youngwanpawe janne i. “Sodom me Taowe khakshupu kahtalan denga tüoma-a, iman ngohpu jingne chingnyu nopu Taowe tükke anglak.”
27Abraham-e üne-o ngao: “Young-wanpa, Taowe yelakpe nang phei wongnange ngaopu jingne chingmei lamlinge üte ümeng winpha. Taowa kahta ja hei hüyange hang ilak-o wongpong yenang. 28Hüpoi aoweshingpu denga nanleiye khakshupu kahtalan deli me nga ngoh ne ok; kahta nga-e yewangpu jingne nange chingnyu khongkümpuwa mah ne tamlak a?”
Youngwanpawe janne i, “Taowe tüome khakshupu kahtalan deli me nga tüoküma-a, chingnyuwa mah ne yetamlak.”
29Abraham-e üne-o ngao: “Aoweshingpu, tüome deli hei ngoh ne ok.”
Iye jan-e i, “Tüome deli ngohma-a, Taowe tüopa-a mah ne yetamlak.”
30Abraham-e i, “Youngwanpa, chingmei lam linge üte mongshih tah ngai pha, hüpoi taowe üne-o ngaolakei. Iman delüm hei ngohma-a hangke ilak?”
Iye i, “Taowe delüm nehoi tüoma-a Taowe mah ne yetamlak.”
31Abraham-e i, “Youngwanpa, taowe yelakpe nang phei wongnange ngaopu jingne chingmei lamlinge üte ümeng winpha. Leppu ja me da shaha tüoma-a?”
Iye i, “Taowe da nehoi tüoma-a Taowe chingnyuwa mah ne yetamlak.”
32Abraham-e i, “Youngwanpa, chingmei lamlinge mongshih tah ngaikei, hüyange shaaji taowe ja me hei ngao lakei. Iman pen hei tüoküma-a hangke ilak?”
Iye i, “Iman pen nehoi ngohma-a Taowe tüopa-a mah ne yetamlak.” 33Abraham phei ngaowe sho yangphei me Youngwanpa taiye mah, hüyange Abraham-o nokte leihye.
Избрани в момента:
KAHTAMYENGHAN 18: KONYBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.