KAHTAMYENGHAN 22
22
Kahwange Abrahamte Tok
1 #
Heb 11.17-19. Tüolan phei me, Kahwange Abraham te tok; hüyange lye i, “Abraham!” Hüyange Iye jan, “Tao tüome ngoh nang!”
2Kahwange i, “Nang ha, Isaac ja shingha ngohpu, aote nange kennang, I woiyange Moriah kahtok te taitüoh, hüyange tüoken me Taowe nangte kahtüo ja hüopha peih, tüoken me I-a üte jakke dotüoh.”
3Tüokhei ünenap Abraham shonge laowe jakke dolak jingne han ütam tatte tümyange; yoi jing gado me tümme tam, hüyange I phei shaoshanpa naoshe ni hüyange yoiha Isaac woi; hüyange Kahwange Ite ngaowe tampu nyoijingja te tai. 4Nyih lüm shepupa me Abraham-e yoi mük wemme leiwante kahmük-a üjai me nge. 5Hüwante Abraham-e yoi naoshe ni te i, “Numan gado phei tüome tanne ngohkei; otüo kente tao hei naha tomni taishih ning hüyange khümyange nishe numan tangte leih-e yeküning.”
6Hüyange Abraham-e jakke dopu me jaklak han yah-e yoiha Isaac te paine tam, hüyange Iye yoi yak me jakke wanglak jingne vün oun phei yang ja yah. Tüophei me imni moini jamshe tai. 7Isaac-e Ipa Abrahamte tong, “Opa!”
Hüyange Ipa jan, “Üha, tao tüome ngoh nang!”
Isaac-e i, “Taowe vün hei hanpa-a ngenang; hüpoi jakke dolak jingne nyee üha üpu?”
8Abraham-e janne i, “Ü-ha, Kahwang lye muh yoi jingne jakke dolak nyeeha ja yah phalak.” Tüokhei imni moini jam jamshe muh kemme tai.
9 #
Jas 2.21. Aope Kahwange Ite ipu nyoite iman pei, Abraham-e tüoken me wümjong ling, hüyange tüopa tangme han üyin shinne ang; Iye yoiha Isaac shayange jakke dolak wümjong han tangme ang. 10Tüophei me Abraham-e yoi yak-e yoiha tangtoilak jingne yang no. 11Hüpoi Youngwanpa shongmokpawe wangdang mepu Ite nyik-e i, “Abraham, Abraham!”
Hüyange lye jan, “Tao tüome ngoh nang.”
12Iye i, “Naha te nang yak tah yu, hüyange Ite hango tahling; hangjingne, nange nangha, nangha ja shingha ngohpu ü-mepu yetükpu khei, shaapa-a nange Kahwang te nyamnang she taowe shing teki.”
13Abraham-e ngan lei wante, I tokphei me nyeepong ja phümtümp me I üwong wahyange nge; Abraham wenne nyeeponga yahyange jakke dolak jingne tüopa-a yoiha nanleiye toi. 14Tüokhei Abraham-e tüopa nyoite “Youngwanpawe yahphalak” she nyik. Hüyange tenyih te ngoiye kahtalan-e “Youngwanpa kahtüo me lye yahphalak,” she inang.
15Hüyange Youngwanpa shongmokpawe Abraham te nishe wangdang mepu nyik, 16#Lk 1.73; Heb 6.13,14; 11.12.hüyange i, “Youngwanpawe inang, nange toishao hatüo lingpu jingne hüyange nangha ja shingha ngohpu, yetün pukhei, Taowe ü-min me jieng yangki. 17Taowe ü-moiman me nang moiman-e tamlak, hüyange jalunpu me Taowe nanghu nanghalan wangdang shanhalan kih jalun tamlak, hüyange yengching nah me ngohpu pheihkek shinne ngailak Taowe jannang. Nanghu nanghalan-e iman wepalan naolak. 18#Lam 3.25; Gal 3.16.Taowe nang huhayimlante moiman tampu kih-e imante-o moiman tampha she jatlan üsheiye üte tonglak. Tüolan khongkümpuwa nange ü-ngaokenglan jaiye jonpu jingne ngohlak.” 19Tüokhei ABRAHAM yoi shaoshanpalan tangte leih-e ye, hüyange iman jamshe yayonge Beersheba te tai, hüyange Abraham Beersheba me chingnyoi.
Nahor Huhayimlan
20Tüolan üshei linyang phei me Abraham te tüo ngao i, “Leitüoh, nang nao Nahor me-o Milcah-e nahalan puh tamteki; 21Uz üwangne puhpupa, hüyange I nao Buz, hüyange Aram üpa Kemuel; 22Khesed, Hazo, Pildash, Jidlaph, hüyange Bethuel.” 23Bethuel-e Rebekah puh; tüolan kahta tet Milcah-e Abraham ünao Nahor te puh-e tam. 24Hüyange I jing phongphe nyu aohi min Reumah, lye-o Tebah, Gaham, Tahash, hüyange Maacah she puhtam.
Избрани в момента:
KAHTAMYENGHAN 22: KONYBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.