KAHTAMYENGHAN 32
32
Esau Phei Hüolak Jingne Jacob-e Tüm
1Jacob yoi lamme taiwante, Kahwang shongmokpalan ütam I phei hüo. 2Aope lye iman nge, lye i, “Hatüowa Kahwangpa pümtep!” Tüokhei lye tüopa nyoite Mahanaim she nyik.
3Hüyange Jacob-e I shaote Ijei Esau tangte, Edom kahtok Seir yekaote shong shonpalan shon. 4lye imante hüke ngaolak jingne nyüoweleiye tam; “Tao Jacob, nang ngao jaiye shaoshanpawe, ü-nokpupa Esaute jaine tamnang, hüke tao Laban phei nyoiye ngoh, hüyange tenyih hei leih yelak ne shonne ngohyangki. 5Hüyange üme mahu, gadolan, nyee hei younlan hüyange rhalan she ngohnang; hüyange taowe ü-nokpu phei ngaolak hüyange hüke taowe nang sheshao me shüpshe tüowe okkülak, she shonnang.”
6Hüyange shong shonpalan Jacob tangte leihye-e ngaowe i, “Toman-e nangjei Esau tangte ngoi, hüyange leihu, I phei kahta gho peli nangyange nang phei hüolak jingne peküki.” 7Hüwante Jacob yeonge mokh hüyange nyamme mongshang. Tüokhei lye I phei ngohpu kahtalan hüyange nyee ükhong, youn, mahu, hüyange udhlan üphong ni ne tam. 8lye hüke teih, “Esau peiye üwangpa ükhong te shümme mahne tamküma-a, ülaopa ükhong towe ngohpuwa yinpu oklak.”
9Hüyange Jacob-e yop, “O üpu Abraham Kahwang, hüyange üpa Isaac Kahwang, üte jaipha! Youngwanpa, nange üte i, ü-kahtok te, ü-jat ü-li tangte leih yetüoh, hüyange üjingne shemin lamphe meiye tailak jingne nange linge tamlak she i. 10Nange nang shao shanpa te shüpshe hüyange ngaotingpa hüopu üshei yo me üjoihaja nehoi üjingne yewang. Taowe Jordan kaiwante hango yenang, hüpoi shengshaoh ja hei ngoh, hüyangpoi tenyihpa-a tüopa ükhong ni phei tao leih-e yenang. 11Üjei Esau yak mepu tao yinpha she taowe nangte yoppe tongnang. Tao nyam nangki tomante shümyange shekolan hei nahalan nehoi omme toman khongküm mah tamne peipu jingne nyamnang ki. 12Nange üte shemin lamphe meiye tailak hüyange aowe-o ine ye-okpu yengching nah mepu pheih shinne maawe ü-huhayimlan phalak she janyangki.”
13Tüokhei tüoya I tüome püm, hüyange Iphei hangheyin ngoh tüolan mepu Ijei Esau jingne Iye hünghao tüm. 14Youn pi gho ni hüyange pong da, nyee üpi gho ni hüyange üpong da, 15iman ühalan-o omme düamyeng yingpu udh delüm, mahu ünyu deli hüyange mahu üpong pen, gado üpi da hüyange üpong pen. 16lye tüolan-a yoi yoi jat ükhongne tam, hüyange ükhong jaja me shaoshanpalan jaja te woine tam. lye imante i. “Ü sheshao te üwangne kemtüoh, hüyange ükhong hei ükhong nipa me nyoijing ngaiye angtüoh.” 17Üwangpa shaoshanpa te lye ngaowe i, “Aope üjei Esauwe nang phei hüoyange nangte, ‘Nang nokpupa-a ao shi? Hüyange nang hang taiki? Hüyange nang sheshao me ngohpu tüolan-a ao jing? she tonglakei,’ 18hüwante nange itüoh, ‘Tüolan-a nang rhapa Jacob jing; lye tüolan-a yoi nokpupa Esaute peiye tampu hünghao: Jacob I-o toman tokphei me ngohnang.’” 19lye hüke muh ni shepupate, lüm shepupate, hüyange yinmok ükhong woipu üsheite ngaowe i: “Numan-e Esau phei hüowante hüke hei moilanne itüoh. 20Numan-e, ‘üting üja, nang shaoshanpa Jacob-a toman tokphei me ngohnang,’ she iyah.” Hangjingne Jacob-e teih, “Taowe ü-sheshao me taipu hünghaowe I mongshih ngaipu toloimei ne ok, hüyange tüophei me taowe I sheta ngelak; aoweshing lye tao yahpu okkülak.” 21Tüokhei lye hünghaolan-a I shaote taine tam, hüyange I pa-a tüoya pümtep me ngoh.
Peniel Me Jacob Sea
22Tüoya muh Jacob lüoyange, yoi sheko ni, hüyange phongphenyu ni, hüyange I halan penme ja woiyange Jabbok yengyin yengtienjing kaiye tai. 23lye iman woiyange yengyin kaiye shon, hüyange hüke I me nangpu khongkümpu shon. 24Jacob I shaha lakke ngoh. Hüwante kahta ja pei, hüyange wangngaipu te yüowe I phei seata. 25Aope kahtapawe Jacob yenao oklak ne nge, lye Jacob yungte hep; hüyange Jacob yung faine tam. 26Hüwante kahtawe i, “Tao taishih ning, hangjingne wang ngaiküki.”
Hüpoi Jacob-e jan-e i, “Nange üte moiman yepha küma-a taowe nang taine yetamlak.”
27Kahtawe tong, “Nangte hangke minpu?”
Iye jan, “Jacob.”
28Hüwante kahta-e i, “Nang min shaaji Jacob she yenyiklak, hangjingne nange Kahwang hüyange kahta phei toktei, hüyange okteki; tüokhei nang min-a Israel she nyiklak.”
29Tüophei me Jacob-e Ite tonge i, “Chingmei lam linge nang te hangke minpu üte ipha.”
Hüpoi lye janne i, “Nange hangne ü-min shinghupu?” Tüophei me lye Jacobte moiman tam.
30Jacob-e i, “Taowe Kahwang sheta me teihüowe ngeteki, hüyange tao üyin memuh ngohnang.” Tüokhei lye tüopa nyoite Peniel she min. 31Peniel tüohyange Jacob taipu phei jam jamshe wanghe ong, hüyange yungfaipu jingne I fai faishe kem. 32Tüokhei tenyih ngoiye Israel huhayimlanne yungkeng (üpong) ühak (mei) yehah. Hangjingne tüopa yung ühak pongme Jacob te shette tam.
Избрани в момента:
KAHTAMYENGHAN 32: KONYBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.