KAHTAMYENGHAN 39
39
Potiphar Sheko Hüyange Joseph
1 #
Lam 7.9. Sha-a Joseph-a Egypt te yahtai, hüyange Pharaoh phang me ngohpu yompa üshangpa Egypt kahta Potiphar-e Ishmael lan mepu shak. 2Youngwanpa-a Joseph phei ngoh, hüyange I-a toi okpu kahta ne meng; I-a Itepu nokpu Egyptlan nok me ngoh. 3Itepu nokpuwe Youngwanpa-a Joseph phei ngohnang she nge, hüyange I yak-e lingpu üshei me Youngwanpawe moiman tam. 4Potipharwe Ite yeonge monghah, tüokhei yoi shaoshanpa ne linge tam; tüokhei Iye I-a yoi noksa hüyange Ime nangpu shemin lamphe tepu yakjongpa ne linge tam. 5Aope nyih me wange I nok hüyange Ime nangpu, üshei tangme Joseph yakjongpa ne mengtam, tüome peiye Joseph jingne Youngwanpawe Egyptlan nok me moiman; hüyange inok hüyange kah me, hanghe ngoh üshei tangme Youngwanpa moimanngoh. 6Tüokhei I me nangpu üshei Potipharwe Joseph yak me paowe tükne tam; hüyange hahyinglak tokte kaiye, Joseph yak me ngohpu toinan jingne nokpuwe hangte-o mongshange yeteih.
Sha-a Joseph-a pümta wange hüyange naoshe meiye ngoh. 7Tüone menge I nokpu shekonyuwe Joseph waowe lei hüyange hüke i, “Ü-phei shihah.” 8Hüpoi lye yemong hüyange nokpunyu te i, “Leitüoh, tüopa nokme hanghe toinyu nanha ü-phei ngoh nang ü-nokpuwe yeshing, lye yoi toinyu nanha khongkümpu tangme tao yakjongpa ne ang. 9Tüopa nok me wanglam lamlak jingne Ime ngohpu shinne üme wong ngoh nang; hüpoi üte yephapuwa nang hei ngoh nang. Hüma-a hangke taowe tüopa nushakpu üyong jonne Kahwangpa phei tüi-e hangke ünu omlak?” 10Hüke yhawe nyih jeih she Joseph phei ngaoyapoi, lye yha phei shinleng te onglak hüyange yha phei shilak yemong.
11Hüpoi nyih japu hipak me aope Joseph yoi toishao linglak jingne noksate ong; hüwante nokme ngohpu shaoshanpalan ao-o noksa me yenangpe ngoh. 12Yhawe Joseph phakshaoh ülao (inkhek) me tükyange, “Kei, ü-phei shinleng te onghah,” she i. Hüpoi Joseph yoi phakshaoh yha yak me tüohyange, nokshaote phette yu. 13Hüyange aope Joseph-e yha yak me I phakshaoh tüoyange noksa mepu phette tai, she nge ok, 14yhawe yoi noksa shaoshanpalan nyik-e jemyange i, “Hatüote leitüoh! Tüopa Hebrew ü-netanpawe nokte yahpeipuwe temante yaoleye tamnang. I ü-tüpte ong hüyange üte kange jonne ngang, hüpoi taowe okpu shinne üngwün. 15Hüpoi aope taowe üngwünpu hüyange waopu lye jai, lye yoi phakshaoh ü-phei tüohyange, nokshao te phette tai.”
16Joseph tepu nokpupa manpei manpei yhawe I jing phakshaoh yha phei ang. 17Hüyange yhawe Ite tüopa ngao ja muh hüke i, “Nange yahpeipu tüopa Hebrew rhapawe ü-tüpte onge üte naoyamyangki. 18Hüpoi aope taowe waowe üngwün, ü-phin me I phakshaoh ange tüohyange I nokshaote phette tai.”
19Aope I tepu nokpupawe yoi shekonyu mepu ngao “Nang shaoshanpawe üte hüke jonne pai” she ipu jai, I mongshihpu loishe ngai. 20Hüyange Joseph nokpupawe I pho, hüyange ümeken me ahngpawe phopalan angnang, tüopa küpnok me I ang. I tüoken küpnok me ngoh. 21Hüpoi Youngwanpa Joseph phei ngoh, hüyange Ite shüpshe, hüyange küpnok yompate kenne tam. 22Hüyange küpnok yompawe küpnok me ngohpu phopalan khongkümpu Joseph yak me angtüoh; hüyange iman-e tüome hangheyin ling, tüo lili me Joseph woipa ne linge tampu ngoh yangki. 23Tüone menge Joseph yak me hanghe ngoh, tüowa küpnok yompawe hangte-o yelei, hangjingne I phei Youngwanpa ngoh; hüyange lye lingpu üshei me Youngwanpawe okpu ngene tam.
Избрани в момента:
KAHTAMYENGHAN 39: KONYBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.