Popular Bible Verses from Olubereberye 6

Share

Mukama ne yejjusa kubanga yakola omuntu mu nsi, n'anakuwala mu mutima gwe.

Mukama n'alaba obubi bw'omuntu nga bungi mu nsi, na buli kufumiitiriza kw'ebirowoozo eby'omu mutima gwe nga kubi kwereere bulijjo.

Naye Nuuwa n'alaba ekisa mu maaso ga Mukama.

Gino gy'emirembe gya Nuuwa. Nuuwa yali mutuukirivu, nga talina kabi mu mirembe gye; Nuuwa n'atambulira wamu ne Katonda.

Mukama n'ayogera nti, “Ndisangula omuntu gwe nnatonda, okuva mu nsi; okusookera ku muntu, n'ensolo, n'eky'ewalula n'ekibuuka waggulu; nejjusizza kubanga nabikola.”

Awo abantu bwe beeyongera obungi ku nsi, nga bazadde n'abaana ab'obuwala, abaana ba Katonda ne balaba abawala b'abantu nga balungi; ne bawasanga mu bo bonna be baayagala. Mukama n'ayogera nti, “Omwoyo gwange teguuwakanenga na muntu emirembe n'emirembe, kubanga naye gwe mubiri, naye anaawangaalanga emyaka egitasukka kikumi mu abiri (120). ” Mu biro ebyo, waaliwo Abanefiri mu nsi, abaazaalibwa abaana ba Katonda mu bawala b'abantu, abo be bantu ab'amaanyi era abaayatiikirira mu mirembe egy'edda.

Nuuwa n'akola byonna Katonda bye yamulagira okukola.

Katonda n'agamba Nuuwa nti, “Maliridde okusaanyawo buli ekirina omubiri, kubanga nsi ejjudde obwonoonefu bwabyo, n'olw'ekyo nja kubizikiririza wamu n'ensi.

Weekolere eryato mu muti ogwa goferi; olisalemu ebisenge, olisiige envumbo munda ne kungulu.

Katonda n'alaba ensi, ng'eyonoonese; kubanga ekirina omubiri kyonna kyali nga kimaze okwonoona ekkubo lyakyo ku nsi.

Oliyingiza mu lyato ku buli kiramu ekirina omubiri, bibiri bibiri, ekisajja n'ekikazi, mu ngeri yaabyo, biryoke biwonere wamu naawe.