Popular Bible Verses from Yauhaas 15

Share

“Kuv yog tsob maab, mej yog cov ceg. Tug kws txuas rua ntawm Kuv hab Kuv txuas rua ntawm nwg, tug ntawd yuav txitxiv ncw; yog mej tsi txuas rua ntawm Kuv, mej yeej ua tsi tau ib yaam dlaabtsi le.

Mej yuavtsum txuas rua ntawm Kuv, Kuv txhaj yuav txuas rua ntawm mej. Tug ceg maab kws tsi txuas rua ntawm txuj maab yeej txi tsi tau txiv. Ib yaam le ntawd, yog mej tsi txuas rua ntawm Kuv, mej yeej txi tsi tau txiv.

Yog mej txuas rua ntawm Kuv hab Kuv tej lug nyob rua huv mej lawm, mej xaav tau yaam twg, mej cale thov, mej yeej yuav tau yaam ntawd.

Tsi yog mej xaiv Kuv, tabsis yog Kuv xaiv mej hab tsaa mej kuas moog txitxiv ncw, txi cov txiv kws nyob moog ibtxhis. Yog mej tuav Kuv lub npe thov yaam twg, Leejtxiv yuav pub yaam ntawd rua mej.

Tsi muaj leejtwg kws yuav muaj kev hlub luj dlua qhov nuav, kws yog muab tau nwg txujsa pub rua nwg cov phoojywg.

Nwg muab txhua ceg maab ntawm Kuv kws tsi txitxiv txav povtseg. Txhua ceg maab kws txitxiv nwg muab taav rua kuas hajyam txitxiv ncw.

Kuv txuj kevcai yog le nuav: mej ib leeg yuavtsum hlub ib leeg, ib yaam le Kuv hlub mej.

Yog mej txitxiv ncw, Kuv Txiv yuav tau ntsejmuag; hab yog mej ua le ntawd, mej txhaj yog Kuv cov thwjtim.

“Kuv yog tsob tseem txivmaab, hab Kuv Txiv yog tug kws tu.

Tug kws tsi txuas rua ntawm Kuv, tug ntawd zoo ib yaam le tug ceg maab kws raug muab txav povtseg hab tub qhuav lawm; cov ceg maab ntawd raug muab sua moog pov rua suavtawg hlawv hab kubnyab taag.

“Kuv has tej nuav rua mej kuas mej zoosab ib yaam le Kuv zoosab, hab kuas mej txuj kev zoosab yuav muaj puvnpo.

Yog mej ua lawvle Kuv tej lug qha, mej yuav nyob nraim huv Kuv txuj kev hlub, ib yaam le Kuv ua lawvle Kuv Txiv tej lug qha hab nyob nraim huv Nwg txuj kev hlub ntawd.

Tej kws Kuv kuas mej ua yog le nuav: mej ib leeg yuavtsum hlub ib leeg.

Yog mej ua le nplajteb ua, tes tuabneeg nplajteb yuav hlub mej npaum nkaus le mej yog puab tug. Tabsis Kuv tub xaiv mej tawm huv lub nplajteb nuav lawm, mej tsi yog nplajteb le; yogle ntawd, tuabneeg nplajteb txhajle ntxub mej.