Popular Bible Verses from Jòvánì 15

Share

Ye a ꞌdóó kpo ṛèngbó bè nèbítì, káa yo a ndâ nèꞌbì bè nèbítì tí nò. À má énò, ꞌbí ꞌduù gbí òkò tí yo má zèè ye tí kpoò, wàa ye ꞌví zèè yí tí kpoò, a ꞌduù tí nò ká bà bàkà tó i túkàꞌi, tacó yo má mò tí yo ꞌdo tí ye gî, yo gí bà bàkà i gbaànjé wálá.

Yo zèè ye tí kpoò, wàa ye delè ꞌví zèè ta yo tí kpoò. Yo ŋò ni gî máa, nèꞌbì mû ŋìnó mbe yaka ꞌdo tí kpo ṛèngbó mû gî nó jé ṛì mí to kà ta kpéétí wó lá, sè  káa ŋìnó yí má ká kuu tí kpo ṛèngbó mû. Yo delè ká énò, yo má ta kpéétí yo, gbí có mì yo bà dù wálá, sè  káa ŋìnó yo má zèè ye tí kpoò.

Yo má zèè ye tí kpoò, wàa ndâ có mì ye ꞌví dù gbí njembí yo, yo má yù i ŋìnó ta go  tí yo nó ꞌdo mì Mbíṛì, Mbíṛì bà je ji yo gî.

À me yo táánò ká gì gí mì ye ta muu yo lá. A ye táánò ká ṛuka yo máa, yo dù tí ndâ kómbe ye, bìndi  ye giì bàkà yo tí ndâ ꞌduù mbe bàkà ndâ i ŋìnó ta i ká gbí ndú, tí ŋa ndâ i ŋìnó mbe dù tí ká nó, tacó wàa, Bu ye ꞌví je ta ndâ i ŋìnó náa yo yù ꞌdo tí wó ta ṛè ye nó ꞌdáá gî ji yo.

ꞌDuù má ùnje gítí bà cì á muu ndâ kómbe wó, gbí  énó máa, yí zè ndâ kómbe wó tí nò nìkì ta ŋa  wálá.

Yí kû saaka ndâ nèꞌbì ye ŋìnó mbe ṛì lá nó ꞌdáá gî gí ꞌdè, bìndi  yí giì waaka gàna tí ndâ bèꞌi á ꞌdo tí ndâ ŋìnó mbe ṛi gî nó gî, si ndú ngbáṛángàꞌi, tacó wàa ndú ꞌví ṛì túkàꞌi.

Có mì ye ji yo énó máa, yo ꞌví zè tí yo gbí òkò tí yo nìkì maa, á go ŋìnó náa ye kû zè ta yo nìkì maa nô.

Ndâ ꞌduù kû ùlù ṛè Bu ye ta o tí nó náa yo má kû bàkà tó i, tacó bà tùbà tí yo máa, yo a ndâ mbe tala có mì ye nô.

«Ye a cèe bè nèbítì, káa Bu ye a cèe mbe ṛò njí nèbítì.

ꞌDuù ŋìnó mbe zèè ye tí kpoò lá nó, go nèꞌbì mû ŋìnó náa à da ꞌdo tí kpo ṛèngbó mû gí ꞌdè gî nô. Ndâ ŋa ndâ nèꞌbì mû tí nò náa à kû saaka ndú ꞌdo tí kpo ṛèngbó mû gî nò má aanga gî, à kû kili ndú, bìndi  à giì doo ndú ta wu.

Ye ꞌdè ndâ có tí nò ji yo, tacó wàa ŋa líkíꞌo tí nó á tí ye nó ꞌví dù tí yo, delè tacó wàa ŋa líkíꞌo tí nò ꞌví dù tí yo ta ŋa  wálá.

Yo má ꞌdi ndâ có mì ye gî, ye bà zè yo nìkì maa, á go ŋìnó náa ye kû ꞌdi có mì Bu ye, káa yí kû zè ye nìkì maa nô.

Ye ꞌdè ndâ có tí nò ji yo tacó wàa, yo ꞌví zè ta tí yo gbí òkò tí yo nìkì maa.

Yo kùtàá má a ndâ ꞌduù mì ndâ ꞌduù muu to tí nó, ndú kùtàá bà zè yo nìkì maa, tacó yo a ndâ ꞌdóó ndâ ŋìnó mì ndú. Káa yo me ndâ ꞌduù mì ndâ ꞌduù muu to tí nó lá, tacó ye ṛuka yo tí ndâ ꞌduù mì ye gî. Tacó énò, ndâ ꞌduù kû sogo yo.