Popular Bible Verses from John 15

Share

“Niya eukw shuuminaahtikw ekw chiyawaau watihkunh. An awen muush niya e ihtaayaan ishi pimaatisiite eukun an che piihchishkuuk kaye maak eukun an che miyu miinisuut wesh taapaa mitun chekwaan chika chii ihtuutenaawaau ekaa piihchishkuyekwe.

Niya e ihtaayaan muush ishi pimaatisiikw ekw maak kaye niya muush che ihtaayaan anite e ihtaayekw. Mwehch e ishinaakuhch watihkun namui chika chii miinisuun ekaa anit shuuminaahtikuhch uhchi nihtaauchihche. Ekun maak mwehch e ishinaakusiyekw. Namui chika chii nihtaauchihiisunaawaau chechii miinisuuyekw chiishpin ekaa piihchishkuuyekwe.”

Niya maak e ihtaayaan muush ishi pimaatisiyekwe kaye nititwewinh piihchishkaakuyekwe mikw taan che ishi nitutamaawekwe chekwaan eukun an che ihtuutamaakuyekw.

Namui chiyawaau kuuhchi wiyaapaminaawaau, niya eukw kaa wiyaapamitakuch. An maak e chii wiyaapamitakuch chititeyimitinaawaau chechii miyu miinisuuyekw kaye muush chechii miyu miinisuuyekw. Ekw maak Uhtaawiimaau che miitaakw taan mikw che ishi nitutamuwekw nitishinihkaasuwin e aapachihtaayekw.

Namui ihtaau awen uyuu chechii ishpish saachihiiwet, mitun chechii pachishtinahk upimaatisiiwin uwiichewaakanh chechii pimaatisiyich.

Misiwe watihkunh niya e ihtaayaan kaa ihtakuhkwaauh ekaa kaa miinisuuhkwaau nuuhtaawii manisham. Ekw aniyuuh watihkunh kaa miinisuuhkwaau misiwe waweshtuutam etituu chechii miinisuuniyikwaau.

Chititashumitinaawaau maak chechii saachihiituyekw mwehch niya kaa ishpish saachihiitakuch.

E miyu miinisuyekw ekut wehchi chishtaachimaakanuut Nuuhtaawii, kaye maak ekut chiyeshtinaateyihtaakuhch e uchischinuhamuwaakanitutaatakuch.

Jesus chii iteu uchischinuhamuwaakanh, “Niya eukw chihchiwe shuuminaahtikw ekw Nuuhtaawii chihchiwe kaa nihtaauchihchet.

Awen ekaa niya e ihtaayaan kaa ishi pimaatisiit wepinaakanuu mwehch taan e ihtuutaakanuuhch watihkun, nipuu maak chek. Anihiih maak watihkun kaa wepinikanuuhkwaau maamuushtinikanuuh ekw mechishtawepinikanuuhkwaau ekw maak e ati ishkwaatekwaau.

“Chichii wiihtamaatinaawaau maak uyuuh chekwaayuuh nimuchicheyihtamuwin chechii piihchishkaakuyekw mitun chechii saakaschineshkaakuyekw e muuchicheyihtamekw.

Wesh nanihiihtamekwe nikacheskwewinh muush chika chischeyihtenaawaau e saachihiitakuch mwehch niya kaa ishi nanihiihtuuk Nuuhtaawii taan kaa itashumit nichischeyihtamuwaan e saachihiit.”

Chititashumitinaawaau maak uu, eukuu chechii saachihiituyekw.”

Iteyihtaakusiyekw maak taan e iteyihtaakusitwaau chipaa saachihiikuwaauch mwehch e ishi sasaachihiitutwaau wiyawaau. Mikw maak e chii wiyaapamitakuch eukw wehchi uhkaatitaakuch, wesh taapaa anite e ihtaatwaau chit ishi wiichihiiwenaawaau ekw.