John 15
15
Jesus eukw chihchiwe shuuminaahtikw
1Jesus chii iteu uchischinuhamuwaakanh, “Niya eukw chihchiwe shuuminaahtikw ekw Nuuhtaawii chihchiwe kaa nihtaauchihchet. 2Misiwe watihkunh niya e ihtaayaan kaa ihtakuhkwaauh ekaa kaa miinisuuhkwaau nuuhtaawii manisham. Ekw aniyuuh watihkunh kaa miinisuuhkwaau misiwe waweshtuutam etituu chechii miinisuuniyikwaau. 3Chiyawaau maak shaash chichii payehchihiikunaawaau an taan kaa ishi wiihtamaatakuch. 4Niya e ihtaayaan muush ishi pimaatisiikw ekw maak kaye niya muush che ihtaayaan anite e ihtaayekw. Mwehch e ishinaakuhch watihkun namui chika chii miinisuun ekaa anit shuuminaahtikuhch uhchi nihtaauchihche. Ekun maak mwehch e ishinaakusiyekw. Namui chika chii nihtaauchihiisunaawaau chechii miinisuuyekw chiishpin ekaa piihchishkuuyekwe.”
5“Niya eukw shuuminaahtikw ekw chiyawaau watihkunh. An awen muush niya e ihtaayaan ishi pimaatisiite eukun an che piihchishkuuk kaye maak eukun an che miyu miinisuut wesh taapaa mitun chekwaan chika chii ihtuutenaawaau ekaa piihchishkuyekwe. 6Awen ekaa niya e ihtaayaan kaa ishi pimaatisiit wepinaakanuu mwehch taan e ihtuutaakanuuhch watihkun, nipuu maak chek. Anihiih maak watihkun kaa wepinikanuuhkwaau maamuushtinikanuuh ekw mechishtawepinikanuuhkwaau ekw maak e ati ishkwaatekwaau. 7Niya maak e ihtaayaan muush ishi pimaatisiyekwe kaye nititwewinh piihchishkaakuyekwe mikw taan che ishi nitutamaawekwe chekwaan eukun an che ihtuutamaakuyekw. 8E miyu miinisuyekw ekut wehchi chishtaachimaakanuut Nuuhtaawii, kaye maak ekut chiyeshtinaateyihtaakuhch e uchischinuhamuwaakanitutaatakuch. 9Mwehch kaa ishpish saachihiit Uhtaawiimaau ekun mwehch kaa ishpish saachihiitakuch kaye chiyawaau. Muush niya e ihtaayaan ishi pimaatisiikw ekw maak muush che chischeyihtamekw e saachihiitakuch. 10Wesh nanihiihtamekwe nikacheskwewinh muush chika chischeyihtenaawaau e saachihiitakuch mwehch niya kaa ishi nanihiihtuuk Nuuhtaawii taan kaa itashumit nichischeyihtamuwaan e saachihiit.”
11“Chichii wiihtamaatinaawaau maak uyuuh chekwaayuuh nimuchicheyihtamuwin chechii piihchishkaakuyekw mitun chechii saakaschineshkaakuyekw e muuchicheyihtamekw. 12Chititashumitinaawaau maak chechii saachihiituyekw mwehch niya kaa ishpish saachihiitakuch. 13Namui ihtaau awen uyuu chechii ishpish saachihiiwet, mitun chechii pachishtinahk upimaatisiiwin uwiichewaakanh chechii pimaatisiyich. 14Chiyawaau maak chika wiichewaakanitutaatinaawaau ihtuutamekwe taan e itashumitakuch. 15Namui ekw aapachihaakanich chika uhchi ishinihkaatitinaawaau wesh aapachihaakan namui chischeyihtam taan e ihtiyich uchimaam. Niya maak wii niwiichewaakanich chichii ishinihkaatitinaawaau wesh misiwe chekwaayuu kaa ishi wiihtamuut Nuuhtaawii chichii wiihtamaatinaawaau. 16Namui chiyawaau kuuhchi wiyaapaminaawaau, niya eukw kaa wiyaapamitakuch. An maak e chii wiyaapamitakuch chititeyimitinaawaau chechii miyu miinisuuyekw kaye muush chechii miyu miinisuuyekw. Ekw maak Uhtaawiimaau che miitaakw taan mikw che ishi nitutamuwekw nitishinihkaasuwin e aapachihtaayekw. 17Chititashumitinaawaau maak uu, eukuu chechii saachihiituyekw.”
Jesus uchischinuhamuwaakanh kaa uhkaatikuyich aweyuuh utah aschiihch
18“Uhkaatitaakwaawenich anichii ekaa kaa wii nanihiihtuwaatwaau Chishemanituu che chischisiyekw niya niishtam e chii uhkaasitwaau eshkw ekaa chiyawaau uhchi uhkaatitaakuch. 19Iteyihtaakusiyekw maak taan e iteyihtaakusitwaau chipaa saachihiikuwaauch mwehch e ishi sasaachihiitutwaau wiyawaau. Mikw maak e chii wiyaapamitakuch eukw wehchi uhkaatitaakuch, wesh taapaa anite e ihtaatwaau chit ishi wiichihiiwenaawaau ekw. 20Che chischisiyekw taan kaa ititakuch, ‘Namui ihtaau aapachihaakan uste e uchimaaweyihtaakusit e iteyihtaakusiyich uchimaam.’ Chiishpin kaa nanehkaachihiiwaakwenich kaye chiyawaau chika nanehkaachihiikuwaauch. Kaa nanihiihtamuwaakwenich taan kaa ishi aayimuutamuukwaau chika nanihiihtamuch kaye chiyawaau taan che ishi aayimuutamuwekuch. 21Misiwe uu kaa ishi aayimuutamaatakuch che ihtuutaataakuch niya aniyeyuu che uhchi ihtuutaataakuch wesh taapaa uhchi chischeyimeuch aniyuu kaa pechi itishahuyich. 22Ekaa uhchi pechi ayimihaauchipanenich namui chipaa uhchi ataameyihtaakusuuch machihtwaawiniyuu. Anuhchiish maak taapwe e chii pechi ayimihiikwaau kiipaa e ataameyihtaakusitwaau e chii machituutahkwaau. 23Wesh an awen kaa uhkaateyimit Nuuhtaawiih kaye uhkaateyimeu. 24Namui chipaa uhchi ataameyihtaakusuuch machihtwaawiniyuu ekaa uhchi ihtuutamuch maamishkaach ihtuwin niyaanitam anit e ihtaatwaau. Nichii ihtuuten chekwaayuuh ekaa wiiskaat kutak awen uhchi ihtuutahk. Misiwe maak chii waapahtamuch. Yaapach maak nichii uhkaatikuch. Nuuhtaawiih kaye chii uhkaateuch aniyuu e uhkaasitwaau. 25Uyuu maak kaa ihtuutuutwaau shaakuuch ekun kaa itashteyich uwiishuwewiniwaahch che ihtuutuutwaau. Chii niikaan wiihtaakuniyuu anite kaa itashteyich,
Seskwaahch nichii uhkaateyimikuch.”
26“Chika pechi takushin an awen che wiichihiitaakw, eukuu Kaa payehchisiit Ahchaahkw. Niya nikapechi itishahwaau anite uhchi Uhtaawiimaau e ihtaat. Chika wiihtam taapwewiniyuu. Niya maak nika aayimuumikw. 27Kaye chiyawaau maak chika aayimuuminaawaau wesh anit uskach kaa uhchi chihchi chiskutamaacheyaan ekut shaash kaa uhchi waawiichewiyekw.”
Currently Selected:
John 15: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
