John 16
16
1“Misiwe uu kaa ishi wiihtamaatakuch chichii wiihtamaatinaawaau ekaa chechii ishinaakusiyekw chechii wii ati puuniyekw e taapweyimiyekw. 2Uchii Jewa iinuuch chika wiiwiitisinikuwaauch utayimiheukamikuwaahch. Ehe, chek taapwe chika utihchipayuu awen nipahiitaakwe che iteyihtahk Chishemanituu e wiichihaat. 3Eukw uyuu che ihtuutaataakuch wesh namui wiiskaat uhchi chischeyimeuch Uhtaawiimaau kaye maak niya namui nuuhchi chischeyimakuch. 4Mikw maak chiwii wiihtamaatinaawaau uu chechii chischisiyekw taan kaa ishi aayimuumakwaau iskutak utihchipayiyiche uyuuh chekwaayuuh chechii ihtuutaataakuch. Namui kuuhchi wiihtamaatinaawaau uyuu uskach anite kaa pechi chiskutamaatakuch wesh ekut kaa ihtaayaan anit e ihtaayekw.”
Taan e itaapatisit Kaa payehchisiit Ahchaahkw
5“Anuhchiish maak wii ekw che nituwaapamak an kaa pechi itishahuut. Namui maak waawaach peyakw e tashiyekw chikakwechiminaawaau taanite e ituhteyaan. 6Anuhchiish maak e chii wiihtamaatakuch ekw naashch e misimeyihtamekw. 7Mikw maak kuiskw e wiihtamaatakuch uste wesin chika wiichihiikunaawaau e chistuhteyaan, wesh ekaa chistuhteyaane namui chika uhchi pechi nituwaapamikuwaau an che wiichihiitaakw, chistuhteyaane maak eukun an che pechi itishahamaatakuch. 8Takushihke maak kata ihtuutaweu aweyuu chechii nisituhtamiyich e wanipayiyich taan e ishi kanawaapahtamiyich machihtwaawiniyuu, kuiskutaatisiiwiniyuu kaye maak Chishemanituuh uwiyaaskunichewiniyuu. 9Wanipayuuch taan e ishi kanawaapahtahkwaau machihtwaawiniyuu wesh namui nitaapweyimikuch. 10Wanipayuuch taan e ishi kanawaapahtahkwaau kuiskutaatisiiwiniyuu, wesh Uhtaawiimaau e ihtaat ekute e ituhteyaan, namui maak miin chika uhchi waapaminaawaau. 11Wanipayuuch taan e ishi kanawaapahtahkwaau Chishemanituu uwiyaaskunichewiniyuu wesh machimanituu shaash chii wiyaaskunikuu Chishemanituuh.”
12“Eshkw etituu mistahii ihtakun chechii ititakuch mikw maak namui chika uhchi nisituhtenaawaau anuhchiish. 13Mikw maak iskutak takushihke uu Ahchaahkw kaa chischeyihtamihiiwet taapwewiniyuu eukuu che chischeyihtamihiitaakw misiwe taapwewiniyuu Chishemanituu e ihtaayich wehchipayiyich. Namui kata uhchi itweu chekwaayuu paatish Chishemanituu itashumikute chechii itwet. Aniyuu maak taan che ishi pehtawaat e itweyich eukw uyuu che ishi waawiihtahk. Chika waawiihtamaakuwaau aniyuuh chekwaayuuh che ati ispayiyikwaau. 14Nika chisteyihtaakuhiikw wesh taan che ishi aayimuutamuch eukw uyuu che ishi aashuu waawiihtamaataakw. 15Misiwe taan kaa ishi miit Uhtaawiimaau nitipiyeusiin. Ekun wehchi ititakuch che aashuu waawiihtamaataakw uu Ahchaahkw taan aniyuuh che ishi aayimuutamuch.”
Anit che miyeyihtahkwaau neshta anit che macheyihtahkwaau chischinuhamuwaakanich
16“Weipishchiish maak namui chika uhchi waapaminaawaau. Miin maak weipishchiish ekw miin che waapamiyekw.”
17Ekw pasch aniyuuh uchischinuhamuwaakan kaa itituyich, “Chekwaayuu uyuu kaa ititahkw eshkw miin weipishchiish che wiicheuhkw ekw miin ekaa che uhchi waapamahkw kaye aniyuu kaa itwet miin weipishchiish ekw che waapamahkw, kaye maak aniyuu e itwet, ‘Uhtaawiimaau e nituwaapamaat.’ 18Chekwaayuu uyuu weipishchiish kaa itwet. Namui chichischeyihtamuwaanaanuu chekwaayuu aniyuu wehchi itwet, ‘Weipishchiish.’ ”
19Jesus chii chischeyimeu e wii kakwechimikut uyuu. Ekw kaa itaat, “An kaa itweyaan, shaash wiipach namui chika uhchi wiicheutinaawaau. Miin maak weipishchiish ekw miin che waapamiyekw. Ewaa uu waa nituu chischeyihtamekw chekwaan an kaa aayimuutamaan. 20Kuiskw e wiihtamaatakuch chika maatunaawaau kaye chika nanehkateumunaawaau. Ekw uchii utah aschiihch kaa ihtaatwaau ekaa kaa nanaakatuweyimaatwaau Chishemanituuh upimaatisiiwiniwaahch chika sichiyesuuch. Chika misimeyihtenaawaau chiyawaau. Mikw maak an e misimeyihtamekw chika kweschipayuu teyakuch chechii muuchicheyihtamekw. 21Iskutak che waapamaausut iskweu misimeyihtam wesh utihchipayiniyuu ekw che wiisacheyihtahk. Iskutak maak kaa pimaatisiyich aniyuu utawaashiim wanichischisiitutam taan kaa ishi wiisacheyihtahk wesh naashch taapwe miyeyihtam e chischeyihtahk awaasha e chii pimaatisiyich utah aschiihch. 22Ekun maak mwehch kaye chiyawaau, anuhchiish chimisimeyihtenaawaau. Mikw maak iskutak miin waapamitakuche naashch taapwe chika miyeyihtenaawaau. Namui maak awen chika uhchii ihtuutaakuwaau chechii miskamitaakw chimuuchicheyihtamuwinawaayuu.”
23“Utihchipayihche maak uu kaa ishi aayimuutamaatakuch namui chekwaan chika uhchi nitutamuunaawaau. Kuiskw e wiihtamaatakuch mikw taan che ishi nituweyihtamuwekw Uhtaawiimaau nitishinihkaasuwin e aapachihtaayekw chika miikuwaau. 24Namui eshkw chuuhchi nitutamaanaawaau chekwaan nitishinihkaasuwinihch uhchi. Nitutamaakw ekw maak che miikuyekw, ekw maak tekash che miyeyihtamekw.”
Jesus kaa aayimuutahk e shaakuuchihtaakanuyich aschiiyuu
25“Uyuu chekwaayuuh kaa wiihtamaatakuch naashch taapwe aayiman chechii nisituhtaakuhkwaau. Chika utihchipayuu maak chek anit che piyekasch nisituhtamekw aayimuutamaatakuche Uhtaawiimaau. 26Utihchipayihche maak an, chiyawaau ekw che nitutamuwekw Chishemanituu nitishinihkaasuwinihch uhchi. Chititinaawaau maak, namui chika uhchi nituweyihtaakun chechii ayimihaayaan e nitutamuuk Chishemanituu chechii miitaakw taan e ishi nitaweyihtamekw. 27Wesh chisaachihiikuwaau Uhtaawiimaau e chii saachihiyekw kaye e chii taapwehtamekw uhtaawiimaau e ihtaat e chii uhtuhteyaan. 28Taapwe maak Uhtaawiimaau e ihtaat nichii uhtuhten kaa pechi takushiniyaan utah aschiihch miin maak kaau nikaa chistuhten Nuuhtaawii e ihtaat nikaa ituhten.”
29Ekw kaa itikut aniyuu uchischinuhamuwaakanh, “Ekw maak yaakw nesituhtaakusiyin taan e itweyin. Namui aayiman chechii nisituhtaakuhch taan e ishi aayimuutaman. 30Nichischeyihtenaan maak misiwe chekwaan e chischeyihtaman, namui nituweyihtaakusuu awen chechii kakwechimisk chekwaayuu, eukw maak uu wehchi taapwehtamaahch Chishemanituu e ihtaat e chii uhtuhteyin.”
31Ekw Jesus kaa itaat, “Chitaapwehtenaawaau aa anuhchiish. 32Chikaa utihchipayuu, shaash maak taapwe utihchipayuu anit misiwe paahpeyakw che ihtaayekw, kachepaan che ihtaayekw tipiiwe chiichiwaawaahch. Ekw niya che peyakushiyaan ekaa aapateyimiyekw. Namui mikw chihchiwe nika uhchi peyakushin wesh Nuuhtaawii ihtaau utah e ihtaayaan. 33Chichii wiihtamaatinaawaau uu chechii uhchi ayaayekw chiyaameyihtamuwin anite niya e ihtaayaan. Chikaa nanekaateyimuhiikunaawaau utah aschiihch. Suuhk wii suuhchitehekw, wesh shaash nichii shaakuuchihaau an kaa tipeyimaat aniyuu aweyuu ekaa kaa aapateyimaayich Chishemanituu.”
Currently Selected:
John 16: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
