Popular Bible Verses from San Juan 14

Share

’Ʉ̱ tʉyajcʉs̈ap paz, mit tʉmoygʉs̈p paz injo̱tni'jcat. Mit ayé paz tʉnyacpay, caje' as̈am iyajcapay jayajwat ayʉ̱́j mundujway. Jemni'c magatu'nga injo̱jtat, mit campʉ̱tcawit.

Jesús inʉjmau: —Ʉ̱j ayé tʉnyacpay to̱u iyacs̈ta'cway mit tʉnmoygʉs̈pay vida, ni'c nepʉn ca-oyap icoja mam tʉnte̱t Dios te tʉs̈canatspoguip ʉ̱.

’Magatu'nga injo̱jtat. Te incupʉjcap Dios, cupʉ́jcaguey ʉ̱.

Po ayé Espíritu Santu jeme is̈majyigámpay, tʉnte̱t Dios i-ajyu'táj ni'c ʉ̱ tʉnyo'jtáj, mit je' is̈ajque's̈cajáj nu'pʉjʉn cosajat, mit is̈actunijawigáj nu'pʉjʉn tʉnʉmgʉs̈away.

Jeme ijawipay lo que tʉnyʉmpay mit ijayaumayp, ayé jayau tʉs̈wamp. Mit jeme tʉs̈wampay, iguiwa'námpey tʉnte̱t Dios, mit ʉ̱ tʉnwa'náj, mit tʉnactujawiyáj ni'c tʉtsʉ̱nap mit je'.

Mit tʉnyo'jtáj tʉnte̱t Dios, mit je' is̈acmingajáj jatu'c is̈majyigámpay pa itsʉ̱nawa'n mit mijchat pa siempre. Mit je' ayé Espíritu Santu jeme is̈actujawigámpay lo que iyacs̈ta'cway, mit jayajwat ayʉ̱́j mundujway ca-oyap iguipʉctsóuga, ni'c iga-e'pcap ne iga-is̈capcap je'. Po mijchat inis̈capcap je', ni'c tsʉ̱náj injo̱tni'jcat mit is̈mutangáj mijchat.

Mit nu'pʉjʉn inyo'tcajámpay tʉnte̱t Dios ni'c ʉ̱ is̈cupʉjcap, tʉnacmi'náj pa nu'pʉjʉn jayajwat ma mʉjninʉmga tʉnte̱t Dios ni'c tʉnacmimp nu'pʉjʉn inyo'tcámpay. Te inyo'tcap tanti ni'c ʉ̱ is̈cupʉjcap, tʉnacmi'náj.

’Te ʉ̱ is̈wangap, jayaumáyga lo que tʉnʉmgʉs̈apay.

Mam itsʉ̱na tʉnte̱t Dios, mayo'c laj i-it pa intsʉ̱ngawa'n. Maga-ítate we'n, tʉganʉmgʉs̈apate. Po tʉnʉs̈áj tʉs̈-oyac tu'c lugar pa mijchat.

Mit cʉs̈wa'n tʉs̈-oyac lugar, tʉmi'nájatu mit tʉmunʉs̈cʉs̈áj, pa we'n mam ʉ̱ tʉtsʉ̱nawa'n, mijchat mitsʉ̱ngámpey jem.

Iguinʉjmau Tomás: —Señor, tʉngajawigap jʉm inyʉs̈, ¿natpaj tʉs̈jawigawa'n ayé to̱u intunʉs̈pay?