San Juan 14

Jesús nas̈ajcoyp mam Dios

1’Magatu'nga injo̱jtat. Te incupʉjcap Dios, cupʉ́jcaguey ʉ̱. 2Mam itsʉ̱na tʉnte̱t Dios, mayo'c laj i-it pa intsʉ̱ngawa'n. Maga-ítate we'n, tʉganʉmgʉs̈apate. Po tʉnʉs̈áj tʉs̈-oyac tu'c lugar pa mijchat. 3Mit cʉs̈wa'n tʉs̈-oyac lugar, tʉmi'nájatu mit tʉmunʉs̈cʉs̈áj, pa we'n mam ʉ̱ tʉtsʉ̱nawa'n, mijchat mitsʉ̱ngámpey jem. 4Mit injawigap jʉm tʉnʉs̈, mit injawigapey ayé to̱u tʉntunʉs̈pay.

5Iguinʉjmau Tomás:

—Señor, tʉngajawigap jʉm inyʉs̈, ¿natpaj tʉs̈jawigawa'n ayé to̱u intunʉs̈pay?

6Jesús inʉjmau:

—Ʉ̱j ayé tʉnyacpay to̱u iyacs̈ta'cway mit tʉnmoygʉs̈pay vida, ni'c nepʉn ca-oyap icoja mam tʉnte̱t Dios te tʉs̈canatspoguip ʉ̱. 7Pi is̈-is̈capcac ʉ̱, inis̈capcájate-ey tʉnte̱t Dios, mit jinap inis̈capcanup, mit in-is̈caway.

8Felipe iguinʉjmau:

—Señor, actu-e'pcac inte̱t Dios, mit tʉtsʉ̱ngáj contentu.

9Jesús inʉjmau:

—¿Mayo'gap tiempu tʉtsʉ̱na mit mijchat, mit is̈cani-is̈cap, Felipe? Jeme tʉs̈-is̈way ʉ̱, i-is̈wayey tʉnte̱t Dios. ¿Natpaj is̈nʉm mi̱: Actu-e'pcac inte̱t Dios? 10¿Ingacupʉcp ni'c tʉtsʉ̱nap mit tʉnte̱t Dios, mit tʉnte̱t Dios tsʉ̱nap mit ʉ̱? Nu'pʉjʉn tʉnʉmgʉs̈apay, tʉnganʉmp ʉ̱jyu, po tʉnte̱t Dios jeme tsʉ̱napay mit ʉ̱, je' tʉs̈actuwatp nu'pʉjʉn. 11Cupʉjcac ni'c tʉtsʉ̱nap mit tʉnte̱t Dios, mit tʉnte̱t Dios tsʉ̱nap mit ʉ̱. Te is̈cacupʉjcap ʉ̱, po cupʉjca lo que tʉnwatpay pa tʉnte̱t Dios. 12Iyacs̈ta'cway tʉnʉmgʉs̈ap: Jeme tʉs̈cupʉcpay ʉ̱, iwatámpey lo que ʉ̱ tʉnwatpay, mit iwatáj cosa más majatway ni'c ʉ̱ tʉnʉs̈p mam tʉnte̱t Dios. 13Mit nu'pʉjʉn inyo'tcajámpay tʉnte̱t Dios ni'c ʉ̱ is̈cupʉjcap, tʉnacmi'náj pa nu'pʉjʉn jayajwat ma mʉjninʉmga tʉnte̱t Dios ni'c tʉnacmimp nu'pʉjʉn inyo'tcámpay. 14Te inyo'tcap tanti ni'c ʉ̱ is̈cupʉjcap, tʉnacmi'náj.

Inʉmp ni'c mi'náj Espíritu Santu

15’Te ʉ̱ is̈wangap, jayaumáyga lo que tʉnʉmgʉs̈apay. 16Mit tʉnyo'jtáj tʉnte̱t Dios, mit je' is̈acmingajáj jatu'c is̈majyigámpay pa itsʉ̱nawa'n mit mijchat pa siempre. 17Mit je' ayé Espíritu Santu jeme is̈actujawigámpay lo que iyacs̈ta'cway, mit jayajwat ayʉ̱́j mundujway ca-oyap iguipʉctsóuga, ni'c iga-e'pcap ne iga-is̈capcap je'. Po mijchat inis̈capcap je', ni'c tsʉ̱náj injo̱tni'jcat mit is̈mutangáj mijchat. 18Tʉgayajcʉs̈áj as̈am cuya̱majcat. Tʉmi'nájatu mam mijchat. 19Jas̈ʉ̱nu tʉtsʉ̱nawa'n, mit jayajwat ayʉ̱́j mundujway tʉs̈caja-e'pcáj, po mijchat is̈-e'pcáj tʉjutucta'cwa'n. Ni'c as̈am ʉ̱ tʉtsʉ̱nawa'n pa siempre, mijchat mitsʉ̱ngámpey mit ʉ̱. 20En ayé s̈ʉjw injawigáj ni'c tʉtsʉ̱nap mit tʉnte̱t Dios, mit mijchat mitsʉ̱nap mit ʉ̱, mit ʉ̱ tʉtsʉ̱nap mit mijchat. 21Jeme ijawipay lo que tʉnyʉmpay mit ijayaumayp, ayé jayau tʉs̈wamp. Mit jeme tʉs̈wampay, iguiwa'námpey tʉnte̱t Dios, mit ʉ̱ tʉnwa'náj, mit tʉnactujawiyáj ni'c tʉtsʉ̱nap mit je'. 22Iguinʉjmau Judas (po caje' Iscariote):

—Señor, ¿natpaj is̈actujawigáj ni'c mitsʉ̱nap mit ʉjtsat, mit ingamoygʉs̈áj laj ma is̈-is̈capcac jayajwat ayʉ̱́j mundujway?

23Mit Jesús ipo'n:

—Jeme tʉs̈wampay, ijayaumayáj lo que tʉnyʉmpay, mit tʉnte̱t Dios iguiwa'náj mit tʉmingáj mam je', mit tʉtsʉ̱ngáj mit je'. 24Jeme tʉs̈cawampay, igajayaumayp lo que tʉnyʉmpay. Mit lo que inmaraugaway, ayé caje' ʉ̱jyu tʉnyʉmp, po ayé tʉs̈actunʉmp tʉnte̱t Dios jeme tʉs̈ajyu'tway.

25’Tʉnʉmgʉs̈ap ayʉ̱́j cosajat mientras tʉtsʉ̱napnaj mit mijchat. 26Po ayé Espíritu Santu jeme is̈majyigámpay, tʉnte̱t Dios i-ajyu'táj ni'c ʉ̱ tʉnyo'jtáj, mit je' is̈ajque's̈cajáj nu'pʉjʉn cosajat, mit is̈actunijawigáj nu'pʉjʉn tʉnʉmgʉs̈away.

27’Ʉ̱ tʉyajcʉs̈ap paz, mit tʉmoygʉs̈p paz injo̱tni'jcat. Mit ayé paz tʉnyacpay, caje' as̈am iyajcapay jayajwat ayʉ̱́j mundujway. Jemni'c magatu'nga injo̱jtat, mit campʉ̱tcawit. 28Inmaraugaway ni'c tʉnʉmgʉs̈au: Tʉnʉs̈p mit tʉmimpatu mam mijchat. Pi is̈wángagate, ji'gájate injo̱jtat, ni'c tʉnʉmgʉs̈au tʉnʉs̈p mam tʉnte̱t Dios, ni'c je' más mʉjninʉmic que ʉ̱. 29Mit jinap tʉnʉmgʉs̈ap antes tʉnʉcs̈nuwa'n, pa cuandu ijatwa'n incupʉjcáj.

30’Caja-oyap tʉmucotscʉs̈ jec mijchat, ni'c mimp ma̱lwayna' jeme imanda̱tpay ayʉ̱́j mundu, mit tʉngamunipʉjcʉp je'. 31Po tʉnwatp lo que tʉnte̱t Dios iwampay, pa jayajwat ayʉ̱́j mundujway ma jawiga ni'c tʉnwamp je'. Ca's̈ʉ'jca mit napíchinga yam.

Currently Selected:

San Juan 14: PSNT

Highlight

Copy