Popular Bible Verses from Lucas 6

Share

Runa majikikunata qarayaptikiqa Dios Yayam qamkunatapis tupuman juntat jichaqtaraq millqaniki junta qarayäshunki. Runa majikikunata imanöpis yanapayanqaykimanmi qamkunatapis Dios Yaya yanapayäshunki>>.

Alli runaqa shonqun alli yarpanqantam parlan y mana alli runaqa shonqun mana allita yarpanqantam parlan. Runaqa shonqunchö yarpanqantam allita o mana allitapis parlan.

<<Qamkunaqa chikiyäshuqnikikunata kuyayanki. Paykunapaq allikunallata rurayanki. Masta kutitsiyäshunaykipaq mana shuyarar imatapis prestaykuyanki. Tsaynö rurayaptikim Dios Yaya premiuta qarayäshunki. Payqa mana agradëcikuqkunata y jutsasapakunatapis llakipanmi. Tsaymi qamkunapis llakipäkuq karqa poderösu Dios Yayapa wamran kayanki.

Taytayki llakipäkuq kanqannö qamkunapis llakipäkuq kayay>>.

<<Dios Yaya mana juzgayäshunaykipaq runa majikikunata ama juzgayaytsu. Tsaynölla mana condenayäshunaykipaq calumniar ama tumpayaytsu. Runa majikikunata perdonayaptikiqa qamkunatapis Dios Yaya perdonayäshunkim.

<<Wiyaykämaqkuna, qamkunatam niyaq: Chikiyäshuqnikikunata kuyayanki. Mana alli rikäyäshuptikipis alli rikäyanki. Ashayäshuptikipis allillata parlapäyanki. Tumpayäshuptikipis paykunapaq Dios Yayata mañakuyanki.

Imanömi runa majiki rikäyäshunaykita munayanki, tsaynölla qamkunapis runa majikikunata alli rikäyanki.

Pipis jukaqlä qaqllaykikunachö laqyayäshuptiki jukaqläta kamapuykuyanki. Punchuykikunata qechuyäshuptiki chompaykikunatapis llushtipuykuyanki. Imata mañakuyäshuptikipis qaraykuyanki. Imaykita qechuyäshuptikipis dëjapuykuyanki.

<<Alli jachaqa manam mana allitaqa wayuntsu. Tsaynöllam mana alli jachapis allitaqa wayuntsu.

Wayuyninpitam ima frütatapis reqintsik. Manam kashakunapitatsu hïgusta pallantsik ni shirakapitatsu üvata pallantsik.