Lucas 6

Jamay junaqpaq Jesús poderyuq kanqan

Mateo 12.1-8; Marcos 2.23-28

1Jamay junaqchömi trïgu kuchunpa discïpulunkunawan Jesús päsaykäyarqan. Tsaypa päsarmi discïpulunkuna trïguta kiptun kiptun kupaskir uchuyarqan. 2Tsayta rikarmi fariseukuna niyarqan: <<¿Imanirtan jamay junaq kaykaptin leynintsikta mana cäsur trïguta pallaykäyanki?>>

3Jesúsnam nirqan: <<¿Manaku imaypis liyiyashkanki yanapaqninkunawan mallaqar David imata ruranqanta? 4Davidshi Dios Yayapa wajinman yaykuskir Diospaq churayanqan tantata mikunaq.#1Sam. 21.1-6. Tsaynöllash yanapaqninkunatapis qaranaq. Tsay tantaqa manam David ni paqtan runakuna mikuyänanpaqtsu karqan, sinöqa sacerdötikunalla mikuyänanpaqmi>>.#Lev. 24.9.

5Tsaynö niskirnam nirqan: <<Runapa Tsurinqa jamay junaqpaqpis poderyuqmi>>.

Makin tsakishqa runata jamay junaqchö Jesús kutikätsinqan

Mateo 12.9-14; Marcos 3.1-6

6Tsaypitanam juk jamay junaqchö sinagögaman yaykuskir Jesús yachatsikurqan. Tsaychömi derëcha kaq makin tsakishqa runapis kaykarqan. 7Tsayta rikarmi ley yachatsikuqkuna y fariseukuna Jesústa rikaraykäyarqan jamay junaqchö kutikätsiptin tsay achäquilla contran shäriyänanpaq.

8Peru tsaynö yarpäyanqanta tantiyarmi makin tsakishqa runata Jesús nirqan: <<Sharkur runakunapa puntanman ichiy>>.

Tsaynö niptinnam tsay runa ichirkurqan. 9Tsaypitanam runakunata Jesús tapurqan: <<Jukta tapuyäshayki. Jamay junaqchö ¿allitaku o mana allitaku rurashwan? Runa majintsikta ¿salvashwanku o <wañutsunpis> nishwanku?>>

10Tsaypitanam runakunata rikaskir makin tsakishqa runata nirqan: <<¡Makikita lamkamuy!>>

Lamkarkuptinmi makin kutikaskirqan. 11Fariseukunanam piñanakur Jesústa acusayänanpaq willanakuyarqan.

Chunka ishkaqta apostolnin kayänanpaq Jesús akranqan

Mateo 10.1-4; Marcos 3.13-19

12Tsay junaqkunam jirkaman aywar Dios Yayaman Jesús warat mañakurqan. 13Patsa waraskiptinnam discïpulunkunata qayaskir chunka ishkaqta akrarnin apostolnin kayänanpaq churarqan. 14Paykunam kayarqan Simón (paytam shutitsirqan Pedruta), Simónpa wawqin Andrés, Santiago, Juan, Felipe, Bartolomé, 15Mateo, Tomás, Alfeupa tsurin Santiago, Zelote niyanqan Simón, 16Santiagupa tsurin Judas y Judas Iscariote. Paymi Jesústa traicionar rantikurqan.

Maytsikaq runakunata Jesús kutikätsinqan

Mateo 4.23-25

17Apostolninkunawan jirkapita Jesús urämurmi pampachö atskaq discïpulunkunawan atskaq runakuna kaykäyaqta tarirqan. Tsay runakunam shayämushqa kayarqan maytsay Judea provinciapita, Jerusalénpita y lamar kuchunchö Tiro y Sidón markakunapita. Paykunam shayämurqan Jesús yachatsikunqanta wiyayänanpaq y qeshyaqyashakunata kutikätsinanpaq. 18Tsaychömi supaykuna ñakatsiyanqan runakunatapis Jesús kutikätsirqan. 19Poderösu kayninwan llapan qeshyaqyashakunata kutikätsiptinmi llapan runakuna Jesústa yatayllapis yatayta munayarqan.

Kushikuyänanpaq y llakikuyänanpaq Jesús willakunqan

Mateo 5.1-12

20Discïpulunkuna kaqpa rikaskirmi Jesús nirqan: <<Waktsakuna, kushishqam kawayanki. Qamkunapaqmi Dios Yayapa mandakuynin.

21<<Mallaqaqkuna, kushishqam kawayanki. Qamkunaqa mananam mallaqäyankinatsu.

<<Waqaqkuna, kushishqam kawayanki. Qamkunaqa mananam llakikuyankinatsu.

22<<Kushishqam kawayanki Runapa Tsurinman creyikuyanqaykipita chikiyäshuptiki, qarquyäshuptiki, allqutsakuyäshuptiki y tumpayäshuptikipis. 23Tsaynö kaptinpis kushikuyay. Qamkunataqa gloriachömi Dios Yaya premiuta shuyaykätsiyäshunki. Qamkunatanömi chikiyäshuqnikikunapa unay ayllunkunapis Dios Yayapa profëtankunata sufritsiyarqan>>.

24<<¡Peru allaw, rïcukuna! Qamkunam kay vïdallachö kushishqa kaykäyanki.

25<<¡Allaw, pacha junta kaykaqkuna! Qamkunaqa mallaqaychömi kayanki.

<<¡Allaw, kushishqa asikachaqkuna! Qamkunaqa llakikur waqakuychömi kayanki.

26<<¡Allaw, llapan runakuna aläbashqa kaqkuna! Qamkunatanöllam llulla profëtakunatapis unay aylluykikuna aläbayarqan.

Chikimaqnintsikta kuyanapaq Jesús yachatsikunqan

Mateo 5.38-48; 7.12

27<<Wiyaykämaqkuna, qamkunatam niyaq: Chikiyäshuqnikikunata kuyayanki. Mana alli rikäyäshuptikipis alli rikäyanki. 28Ashayäshuptikipis allillata parlapäyanki. Tumpayäshuptikipis paykunapaq Dios Yayata mañakuyanki. 29Pipis jukaqlä qaqllaykikunachö laqyayäshuptiki jukaqläta kamapuykuyanki. Punchuykikunata qechuyäshuptiki chompaykikunatapis llushtipuykuyanki. 30Imata mañakuyäshuptikipis qaraykuyanki. Imaykita qechuyäshuptikipis dëjapuykuyanki. 31Imanömi runa majiki rikäyäshunaykita munayanki, tsaynölla qamkunapis runa majikikunata alli rikäyanki.

32<<Kuyanakuyanqaykillawan kuyanakurqa ¿ima allitatan ruraykäyanki? Jutsasapakunapis kuyanakuyanqanllawanqa kuyanakuyanmi. 33Alli rikäyäshuqnikikunallawan alli kawarqa ¿ima allitatan ruraykäyanki? Jutsasapa runakunapis tsaynöllaqa allim kawakuyan. 34Gänayänayki rayku imatapis prestakurqa ¿ima allitatan ruraykäyanki? Tsaynöllaqa jutsasapakunapis masta kutitsiyänanpaq prestakuyanmi.

35<<Qamkunaqa chikiyäshuqnikikunata kuyayanki. Paykunapaq allikunallata rurayanki. Masta kutitsiyäshunaykipaq mana shuyarar imatapis prestaykuyanki. Tsaynö rurayaptikim Dios Yaya premiuta qarayäshunki. Payqa mana agradëcikuqkunata y jutsasapakunatapis llakipanmi. Tsaymi qamkunapis llakipäkuq karqa poderösu Dios Yayapa wamran kayanki. 36Taytayki llakipäkuq kanqannö qamkunapis llakipäkuq kayay>>.

Runa majintsikta mana juzganapaq Jesús ninqan

Mateo 7.1-5, 17-20; 12.34-35

37<<Dios Yaya mana juzgayäshunaykipaq runa majikikunata ama juzgayaytsu. Tsaynölla mana condenayäshunaykipaq calumniar ama tumpayaytsu. Runa majikikunata perdonayaptikiqa qamkunatapis Dios Yaya perdonayäshunkim. 38Runa majikikunata qarayaptikiqa Dios Yayam qamkunatapis tupuman juntat jichaqtaraq millqaniki junta qarayäshunki. Runa majikikunata imanöpis yanapayanqaykimanmi qamkunatapis Dios Yaya yanapayäshunki>>.#Mat. 7.2.

39Tsaynöllam iwalatsikuywan yachatsikur Jesús nirqan: <<¿Acäsu qaprata qapra majin pushanmanku? Qapra majin pusharqa ishkanmi uchkuman jeqarpuyanman.#6.39 Tsaynö Jesucristo nirqan musyapäkuq runakunata qapraman iwalatsirmi. 40Manam ni mayqan yachakuqpis yachatsiqninpita masqa yachantsu. Peru shumaq yachakurnin ushaskirmi sïqa yachatsiqninnölla kanqa.#6.40 Tsaynö yachatsikurqa Jesucristo nirqan: Yachatsishuqniki musyapäkuq kaptinqa qampis runa majikita musyapäkuq kaytam yachakunki.

41<<Ñawikikunachö jatun qeru jatiraykaptinqa ¿imanirtan runa majikikunapa ñawinchö ichiklla shumpa kaykaqta rikapäyanki? 42Ñawikikunachö jatun qeru jatiraykaptinqa ¿imanöraq niyankiman: <Ñawikipita shumpata jipiskapushayki>? ¡Allish tukuq runakuna! Puntataqa ñawikikunachö qerutaraq jipiyay. Tsayraqmi shumaq rikäyanki runa majikipa ñawinpita shumpata jipiyänaykipaq.#6.42 Kay textuchömi runa majintsikpa jutsankunata ñawinchö shumpaman iwalatsin. Kikintsikpa jutsantsiktam ñawintsikchö qeruman iwalatsin. Ñawintsikpita qeruta jipinapaq nirqa jutsantsikkunata dëjanapaqmi nin. Tsaynöpam tantiyatsimantsik jukta juzganantsikpa rantin kikintsikpa jutsantsikta dëjanapaq.

43<<Alli jachaqa manam mana allitaqa wayuntsu. Tsaynöllam mana alli jachapis allitaqa wayuntsu. 44Wayuyninpitam ima frütatapis reqintsik. Manam kashakunapitatsu hïgusta pallantsik ni shirakapitatsu üvata pallantsik. 45Alli runaqa shonqun alli yarpanqantam parlan y mana alli runaqa shonqun mana allita yarpanqantam parlan. Runaqa shonqunchö yarpanqantam allita o mana allitapis parlan.

Cäsukuq runa y mana cäsukuq runa imanö kanqan

Mateo 7.24-27

46<<Yachatsikuynïkunata mana cäsuykarqa ¿imanirtan <Señornïmi kanki, Señornïmi kanki> niyämanki? 47Yachatsikunqäta wiyaqkuna imanö kayanqantam kanan tantiyatsiyäshayki. 48Juk runash wajita shäritsinanpaq qaqaman chanqanyaq oqtiykur cimientuta patsätsinaq. Qaqa jananchö alli rurashqa kaptinshi mayu jeqarpis tsay wajita kuyutsinaqtsu. 49Juk runanash cimientunnaqta arenïlla jananllachö wajita shäritsinaq. Tsayshi mayu jeqar jaytaptin tsay waji jankat juchuskinaq. Tsayshi alläpa llakipaypaq y waqakuypaq kanaq. Tsaynömi ninqäkunata mana cäsuq runapis kanqa>>.

Currently Selected:

Lucas 6: qxn

Highlight

Copy