Popular Bible Verses from SENESI 27

Share

Ke tuku e te Atua kia koe te hahau o te lagi, Mo te gako o te kele, Mo te fulumeto, pea mo te vino o lahi osi! Ke fakalogo ni hahai kia koe, Pea ke punonou ni puleaga i ou mua! Ke ke pule ki ou tehina, Pea ke punonou te u foha o tau fae i ou mua! Ke malaia ae e ina tutukui ia koe, Pea ke tapuakina ae e tapuaki atu anai kia koe.

Nee ui leva e Esau: E tonu osi tona higoa ae ko Sakopo, koteuhi ko te tua lua aeni o tana fakalaka ia au. Nee ina uluaki too mua toku tuulaga o te foha uluaki, pea koeni i te aho nei kua ina toe too toku tapuaki. Pea nee ina toe ui leva: Pe e mole ke nofo mo he tahi age tapuaki kia au?

Nee tali leva e tana tamai ko Isaake kia ia: Koeni! E hala anai tou nofoaga i te gako o te kele Mo te hahau o te lagi, i oluga. E ke mauli anai ki tau heleta, Pea e ke faifekau anai ki tou tehina. Kae i he aho e ke atea anai maia ia, Pea e ke fasii anai te akau o te popula ae e ina hili anai ki tou kia, Pea e ke siaki anai ia ia ki mamao.

Nee ui leva e Esau ki tana tamai: Pe ko te tapuaki pe aia e tahi e ke mau, siaku tamai? Tapuaki mai foki kia au, siaku tamai! Pea nee tagi leo lahi leva ia Esau.