SENESI 27
27
Kaihaa o te tapuakina e Sakopo
1Nee matua ia Isaake, pea kua fakapouli ona mata, pea nee mole kei sio lelei ia ia. I he aho, nee ina paui leva ia Esau, tona foha uluaki, o ui kia ia: Sioku foha! Nee tali leva e Esau: Koeni au! 2Nee ui leva e Isaake: Koeni foki kua au matua, pea e mole au iloi te aho o toku mate. 3Koia i te aho nei, e au kole atu kia koe ke ke too au mahafu, mo tau nahau, mo tau taga nahau, pea ke alu ki te vao o fanahi mai he manu kia au. 4Pea teuteui mai kia au he meakai ae e au manako ki ai, pea ke aumai ia ia kia au ke au kai, o tupu ke au tapuaki kia koe ia mua o toku mate. 5Nee logo leva ia Lepeka ki te palalau a Isaake ki tona foha ko Esau. Pea nee alu leva ia Esau ki te vao o kapu ke aumai he manu ki tana tamai.
6Nee ui leva e Lepeka ki tana tama ko Sakopo: Koeni, nee au logo kua palalau tau tamai ki tou tehina ko Esau, o ui: 7Aumai kia au he manu, pea ke teuteui mai kia au he meakai ke au kai; pea e au tapuaki anai kia koe ia mua o te Eteleno, ia mua o toku mate. 8I te temi nei, siaku tama, fakalogo mai ki toku leo, pea ke fai te u mea fuli ae e au fakatotonu atu kia koe. 9Alu ki te faga manu, o too i ai ni uhii tao e lua, o aumai naua kia au; e au teuteui anai ki tau tamai he meakai ae e manako ki ai, 10pea e ke ave anai ia ke kai e tau tamai, o tupu ke tapuaki atu ia ia kia koe i mua o tana mate. 11Nee tali leva e Sakopo ki tana fae: Koeni, e fulufulu toku tehina ko Esau, kae e mole au fulufulu. 12Pea kapau e fafa mai anai taku tamai kia au, pea e au liliu anai kia ia ko he tagata kaka, pea e au aumai anai te malaia kia au, kae mole ko te tapuaki. 13Nee ui leva e tana fae kia ia: Siaku tama, ke to te malaia aena kia au! Fakalogo mai pe ki toku leo, pea ke alu o puke mai te u manu. 14Nee alu leva ia Sakopo o too te u manu o aumai ki tana fae, ae nee ina teuteui leva he meakai ae nee manako ki ai ia Isaake. 15Pea nee too leva e Lepeka te u kofu o Esau ko tana tama uluaki, ona kofu matalelei ae nee tuku i fale, pea nee ina fakatui leva natou kia Sakopo, tana tama muli. 16Pea nee ina kofu leva te u nima o Sakopo aki te kilii tao, mo tona kia ae nee mole fulufulu. 17Pea nee ina hili leva ki te u nima o tana tama ko Sakopo te meakai mo te pane ae nee ina teuteui.
18Pea nee alu leva ia Sakopo ki tana tamai, o ui: Oi siaku tamai! Pea nee ui leva e Isaake: Koeni au! Ko ai ia koe, sioku foha? 19Pea nee tali leva e Sakopo ki tana tamai: Ko au Esau, ko tou foha uluaki; kua au fai te mea ae nee ke ui mai ki ai. E au kole atu kia koe ke ke tuu la ki oluga o lala, pea ke ke kai ki te manu ae kua au teuteui, o tupu ke ke tapuaki mai kia au. 20Pea nee ui leva e Isaake ki tona foha: Oi sioku foha, ki te vave nei o tau mau te manu! Nee tali leva e Sakopo: Koteuhi ko te Eteleno tou Atua, ae nee ina aumai te manu ki oku mua. 21Nee ui leva e Isaake kia Sakopo: Hoho mai age ke au fafa kia koe, sioku foha, pea ke au iloi pe ko koe ko toku foha totonu ko Esau, pee kailoa. 22Nee hoho age leva ia Sakopo kia Isaake tana tamai, pea nee fafa leva ia Isaake kia ia, o ui: Ko te leo, ko ae o Sakopo, kae ki te u nima, ko ae o Esau. 23Nee mole ina iloi ko Sakopo, koteuhi kua fulufulu ona nima o hage ko te u nima o tona tehina ko Esau. Pea nee tapuaki leva ia ia kia ia. 24Nee ina ui leva: Pe ko koe ko toku foha ko Esau? Pea nee tali leva e Sakopo: Ko au. 25Pea nee ui leva e Isaake: Fakaoviovi mai kia au te meakai, ke au kai ki te manu o toku foha, pea ke au tuku kia koe taku tapuaki. Nee avage leva e Sakopo te meakai ki tana tamai, pea nee kai ai leva ia ia; nee toe avage foki e Sakopo kia ia he vino, pea nee inu leva ia ia.
26Pea nee ui leva e Isaake tana tamai kia ia: Ke ke hoho mai, pea ke uma mai kia au, sioku foha! 27Pea nee hoho age leva ia Sakopo o uma kia ia. Pea nee mamanu leva ia Isaake ki te mamanu o ona kofu; pea nee tapuaki leva ia ia kia ia, o ui: Koeni, e tatau te mamanu o toku foha mo te mamanu o he gaueaga ae kua tapuakii e te Eteleno.
28Ke tuku e te Atua kia koe te hahau o te lagi,
Mo te gako o te kele,
Mo te fulumeto, pea mo te vino o lahi osi!
29Ke fakalogo ni hahai kia koe,
Pea ke punonou ni puleaga i ou mua!
Ke ke pule ki ou tehina,
Pea ke punonou te u foha o tau fae i ou mua!
Ke malaia ae e ina tutukui ia koe,
Pea ke tapuakina ae e tapuaki atu anai kia koe.
30Hili te tapuaki a Isaake kia Sakopo, pea nee hoki mavae atu pe ia Sakopo i tana tamai, kae kaku age leva ia Esau, tona tehina mai tana kapu manu. 31Nee ina teuteui foki he meakai, o ave ki tana tamai; pea nee ina ui leva ki tana tamai: Tuu ki oluga, oi siaku tamai, pea ke kai ki te manu o tou foha, o tupu ke tapuaki tou laumalie kia au! 32Nee ui leva e tana tamai ko Isaake kia ia: Ko ai ia koe? Nee ina tali leva: Ko au Esau, tou foha uluaki. 33Nee tete katoa leva ia Isaake i te lahi o tona punamauli, pea nee ina ui leva: Ko ai ae nee ina kapu he manu o aumai kia au? Koteuhi kua au kai ki te u mea fuli i mua o tau kaku mai, pea kua au tapuaki kia ia. Koia, e tapuakina mooni anai ia ia. 34I te logo a Esau ki te u palalau o tana tamai, nee tagi leo lahi leva ia ia, i te lahi o tona mamahi, pea nee ina ui leva ki tana tamai: Tapuaki mai foki kia au, siaku tamai! 35Nee ui leva e Isaake: Nee hau tou tehina o kakaai au, pea kua ina too tou tapuaki. 36Nee ui leva e Esau: E tonu osi tona higoa ae ko Sakopo, koteuhi ko te tua lua aeni o tana fakalaka ia au. Nee ina uluaki too mua toku tuulaga o te foha uluaki, pea koeni i te aho nei kua ina toe too toku tapuaki. Pea nee ina toe ui leva: Pe e mole ke nofo mo he tahi age tapuaki kia au? 37Nee tali leva e Isaake kia Esau: Koeni, kua au fakanofo ia ia ke pule kia koe, pea kua au tuku ke faifekau ona tehina fuli kia ia. Kua au tuku kia ia te fulumeto mo te vino o lahi. Kotea te mea ae ke au toe mau anai kia koe, sioku foha? 38Nee ui leva e Esau ki tana tamai: Pe ko te tapuaki pe aia e tahi e ke mau, siaku tamai? Tapuaki mai foki kia au, siaku tamai! Pea nee tagi leo lahi leva ia Esau. 39Nee tali leva e tana tamai ko Isaake kia ia:
Koeni!
E hala anai tou nofoaga i te gako o te kele
Mo te hahau o te lagi, i oluga.
40E ke mauli anai ki tau heleta,
Pea e ke faifekau anai ki tou tehina.
Kae i he aho e ke atea anai maia ia,
Pea e ke fasii anai te akau o te popula ae e ina hili anai ki tou kia,
Pea e ke siaki anai ia ia ki mamao.
41Nee tupu leva i te loto o Esau he fehia lahi kia Sakopo, o tupu ko te tapuaki ae nee tuku kia ia e tana tamai; pea nee ui leva e Esau i tona loto: Kua vave pe te u aho o te putu o taku tamai, pea e au tamatei anai toku tehina ko Sakopo. 42Nee fakaha leva kia Lepeka te u palalau o tana tama uluaki ko Esau. Pea nee ina paui leva tana tama muli ko Sakopo, o ui kia ia: Koeni, e fia taui e tou tehina ko Esau kia koe, pea e ina kumi ke tamatei koe. 43Koia siaku tama, i te aho nei fakalogo mai ki toku leo! Tuu o hola ki toku tuagaane ko Lapane, i Salani; 44pea ke nofo leva i ai i he kii temi veliveli, 45o kaku ki te fimalie o te loto o tou tehina, ki te osi o tona ita kia koe, pea ke ina galoi te mea ae nee ke fai kia ia. E au toe tuku logo atu anai kia koe ke ke toe liliu mai. Kotea e au hala anai mo kolua toko lua i he aho e tahi?
46Nee ui leva e Lepeka kia Isaake: Kua au fakalialia ki te mauli o tupu ko oku fugao, te u taahine o Eti. Kapau e toe ohoana anai ia Sakopo mo he taahine o Eti, o hage ko naua aeni, kotea anai te uhiga mai o te mauli kia au?
Currently Selected:
SENESI 27: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
