SENESI 28
28
Hola a Sakopo: Moe i Petele
1Nee paui leva e Isaake ia Sakopo, pea nee ina tapuaki leva kia ia, o tuku kia ia te fakatotonu aeni: Aua naa ke ohoana mo he taahine o te kau taahine o Kanaane. 2Tuu ia koe ki oluga, o alu ki Patane-Alame, ki te fale o Petuele, ko te tamai o tau fae, pea ke filifili i ai hou ohoana i te u ofafine o Lapane, ko te tuagaane o tau fae. 3Ke tapuaki te Atua Mafimafi kia koe, o fakatuputupua mo liuliuga ia koe, ke ke liliu ko ni hahai kaugamalie aupito! 4Ke ina tuku atu kia koe mo tou hakoga te tapuaki a Apalahamo, o tupu ke ke mau tofiga i te fenua ae e ke nofo ai o hage ko he tagata matapule, ae kua ina foaki kia Apalahamo. 5Pea nee fekaui leva e Isaake ia Sakopo ke alu: Pea nee alu leva ia ia ki Patane-Alame, kia Lapane, ko te foha o te tagata Asilia ko Petuele, pea ko te tuagaane o Lepeka, fae a Sakopo mo Esau.
6Nee sio leva ia Esau ki te tapuaki a Isaake kia Sakopo pea mo tana fekau ke alu ki Patane-Alame, o filifili i ai hona ohoana, pea mo te fakatotonu ae nee ina fai i te temi ae nee tuku ai tana tapuaki: Ke aua naa ke too hou ohoana i te u taahine o Kanaane. 7Nee sio leva ia ia ki te fakalogo a Sakopo ki tana tamai mo tana fae, o alu ki Patane-Alame. 8Pea nee mahino leva ia Esau ki te kovi o te u taahine o Kanaane ki te loto o tana tamai ko Isaake. 9Pea nee loto leva ia ia ke toe filifili hona tahi ohoana. Koia nee alu ai leva ia Esau kia Isemaele, ko te foha o Apalahamo, pea nee ohoana leva ia ia mo tona ofafine ko Maalate, te tuagaane o Nepasote.
10Nee alu leva ia Sakopo mai Pele-Sepa ki Salani. 11Nee kaku leva ia ia ki he kogamea, ae nee moe ai leva i ai, koteuhi kua to te laa. Nee ina too leva he foi maka o uluga ki ai, pea nee moe leva ia ia i te kogamea aia. 12Pea nee moemisi leva ia ia: pea koeni, nee tuu he tuuga i te kele pea nee tau tona tumutumu ki te lagi. Pea koeni, nee hahake pea hihifo te u aselo a te Atua i te tuuga aia. 13Pea koeni nee nofo te Eteleno i oluga o te tuuga; pea nee ina ui leva: Ko au ko te Eteleno, ko te Atua o tau tamai ko Apalahamo, pea ko te Atua o Isaake. Ko te kele aena e ke moe ai, e au foaki anai ia kia koe mo tou hakoga. 14E tatau anai tou hakoga mo te efu o te kele; e ke mafolafola anai ki te potu uesite mo te potu esite, ki te potu noleto mo te potu saute; pea e tapuakina anai te u famili fuli o te kele ia koe mo tou hakoga. 15Koeni, e au nofo mo koe, e au taupau anai ia koe i te u kogamea fuli ae e ke alu anai ki ai, pea e au toe aumai anai ia koe ki te fenua aeni; koteuhi e mole au siaki noa anai ia koe, kae e au fakahoko anai te u mea fuli ae nee au fakapapau atu kia koe.
16Nee ala ake leva ia Sakopo i tana moe, o ui: E nofo mooni te Eteleno i te kogamea aeni, kae e mole au iloi ia ia. 17Nee mataku leva ia Sakopo, pea nee ina ui leva: E fakamataku osi te kogamea aeni! Ko te fale aeni o te Atua! Ko te matapa aeni o Selo! 18Pea nee tuu ake leva ia Sakopo i te uhu, o too te maka ae nee uluga ki ai, pea nee ina fakatuu leva ia ke liliu ko he maka fakamooni, pea nee ina liligi leva he lolo ki tona tumutumu. 19Pea nee ina tuku leva ki te kogamea aia te higoa ko Petele; kae nee higoa te kolo i mua atu ko Lusi. 20Pea nee fai leva e Sakopo tana fakapapau, o ui: Kapau e nofo te Atua mo au, o taupau au i te fagona ae e au fai, kapau e ina tuku mai he pane ke au kai mo ni teu ke au tui, 21pea kapau e au toe liliu i te tokalelei ki te fale o taku tamai, pea e liliu anai te Eteleno ko toku Atua. 22Ko te maka aeni kua au fakatuu pea kua au fakatapui, e liliu anai ko te fale o te Atua; pea e au foaki anai kia ia te vaega hogofulu o te u mea fuli ae e ina foaki mai anai kia au.
Currently Selected:
SENESI 28: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
