Popular Bible Verses from Matius 24

Share

Kong tu kejahatan yang orang da beking mo lebe tatamba banya, so itu banya orang so nyanda mo basayang lei. Mar orang yang tetap batahang percaya pa Kita sampe akhir, Tuhan mo kase slamat pa dia.

Kong tu Kabar Bae tentang Tuhan Allah Berkuasa sbagai Raja mo se siar dulu ka sluru dunia supaya samua suku bangsa bole tau itu, abis itu baru dunia mo kiamat.”

Kong ngoni mo dengar ada prang di satu daera, ato ngoni mo dengar kabar-kabar tentang prang di tampa laeng. Mar biar bagitu, ngoni jang tako lantaran samua itu musti jadi lebe dulu, mar itu blum de pe waktu mo kiamat.

Soalnya nanti satu suku bangsa mo baprang deng suku bangsa laeng, satu krajaan baprang deng krajaan laeng, kong mo ada lei kelaparan deng tana goyang di mana-mana. Mar samua itu baru de pe awal pendritaan seblum kiamat, sama deng tu pendritaan yang parampuang da rasa waktu mo melahirkan.

Langit deng bumi mo ancor, mar tu Kita pe firman mo ada trus.”

Soalnya banya orang mo datang kong mo pake Kita pe nama. Dorang mo bilang bagini, ‘So kita ini tu Kristus tu Raja yang se slamat pa manusia’ kong dorang itu mo beking sesat banya orang.

Waktu itu, ada orang-orang yang tangka pa ngoni trus mo srahkan for siksa deng bunung pa ngoni. Kong orang-orang dari samua suku bangsa mo binci pa ngoni lantaran da iko pa Kita. Kong banya orang yang percaya so nyanda mo percaya lei pa Kita. Dorang mo baku binci deng mo baku hianat. Ada banya nabi palsu mo muncul kong beking sesat banya orang.

Yesus manyao pa dorang, “Hati-hati jo ngoni, jang sampe ada orang yang mo beking sesat pa ngoni.

Bagitu lei deng ngoni, ngoni musti slalu siap for batunggu tu Anak Manusia mo datang. Soalnya ngoni nintau tempo apa tu Anak Manusia mo datang ulang, Dia mo datang kage-kage.”

So itu bajaga-jaga jo, lantaran ngoni nintau tempo apa ngoni pe Tuhan mo datang.

Yesus bilang lei, “Nyanda ada satu orang yang tau tempo apa deng jam brapa tu Anak Manusia mo datang ulang. Malaekat-malaekat di sorga nintau, enter Anak Manusia sandiri lei nintau, cuma Bapa sandiri yang tau.

Soalnya kristus-kristus palsu deng nabi-nabi palsu mo muncul. Dorang mo beking mujisat-mujisat deng hal-hal luar biasa, sampe kalu bole tu orang-orang yang Tuhan so pili jadi sesat.

Waktu tu Anak Manusia mo datang ulang, de pe keadaan sama deng keadaan dulu waktu jaman Nuh. Dulu seblum Tuhan kase tu banjer basar skali, tu orang-orang pe hidop cuma makang minum, kaweng deng da se kaweng, dorang pe hidop cuma babagitu trus sampe di hari waktu Nuh maso ka kapal basar. Tu orang-orang itu nyanda sadar kalu banjer basar mo datang. Dorang nanti sadar serta tu banjer so datang se abis pa dorang. No bagitu lei orang-orang nanti nyanda mo siap kalu kage-kage tu Anak Manusia so datang ulang.