Popular Bible Verses from लूका 3

Share

पर यूहन्ने जो जेल्ला च पाणे ते पैहले ताहली जे बौहत सारे लोक बपतिस्मा लैईराँ थे तां यीशुये बी बपतिस्मा लैया। इसते बाद ताहली जे सै प्राथना करी रां था, तां स्वर्ग खुलीग्या। कने पवित्र आत्मा शरीर रे रुपा च कबूतरा साई तिस पर उतरया, कने स्वर्गा ते ये अवाज़ आई : भई, “तू मेरा प्यारा पुत्र आ, हऊँ तेरते बड़ा खुश आ।”

तां यूहन्ने येढ़ा बोलीने तिन्हारे सवाला रा जवाब दित्या, “हऊँ त तुहांजो पाणिये च बपतिस्मा देआं, पर सै औणे औल़ा सै जे मेरते बी सामर्थी आ; हऊँ तिसरे मुकावले किछ बी नींआ, हऊँ इक्की सेवका रा सब्बीं ते छोट्टा काम्म तिस खातर करना चाओ, तां बी लायक नींआ। तिस तुहांजो पवित्र आत्मा कने अग्गी च बपतिस्मा देणा।

जे तू तिसा सजा ते बचणा चांह तां अपणिया जिन्दगिया च ये साबित कर भई तैं अपणयां पापां ते मन फिराया कने परमेशरा खौ मुड़ीरा। कने अपणे-अपणे मना च ये नीं सोच्चा भई अब्राहम अहांरा पूर्वज आ; ताकि परमेशरा अहांजो सजा नीं देणी, पर हऊँ तुहांजो बोलां भई ‘परमेशर अब्राहमा रे खातर इन्हां पत्थराँ ते बी बच्चा पैदा करी सक्कां!’

कने तियां जे इक माहणु अपणिया कुहाड़िया ने सै डाल़ जे बुरा फल़ ल्यावां तिसजो बड्डी टुक्की ने अग्गी च जल़ाणे जो त्यार आ, तियां इ परमेशर तुहौं तुहांरे पापां खातर सजा देणे जो त्यार आ।”

यशायाह भविष्यवक्ते यूहन्ना रे बारे च बड़े पैहले ये सब गलाई रखीरा था भई, “सुनसान जगह च इक माहणुये रे हाक पाणे री अवाज़ सुणी कराँ इ भई प्रभुये जो ग्रहण करने खातर अपणे मना जो त्यार करा, तियां जे लोक किसी खास माहणुये रे खातर सड़कां सिधियां बणायें। हरेक खड्डा खोल़ा भरया जाओ, हरेक पहाड़ कने ऊच्ची जगह पधरी किति जाओ, कने सै जे टेढा-मेढा सै सिधा कित्या जाणा कने सै जे ऊच्चा नीहठा रस्ता सै पधरा बणना। कने हर माहणुये परमेशरा रे दित्तिरे छुटकारे जो देखणा।”