लूका 3

यूहन्ना बपतिस्मा देणे औल़े रा सन्देश

(मत्ती 3:1-12; मरकुस 1:1-8; यूहन्ना 1:19-28)

1रोम देशा रे बादशाह तिबिरियुस रे राज्जा रे पन्द्रहवे साल्ला च ताहली जे पुन्तियुस पिलातुस यहूदिया प्रदेशा रा राजपाल था, कने तिस देशा रे चौथे हिस्से रे राजयां च हेरोदेस गलील इलाके रा कने तिसरा भाई फिलिप्पुस इतुरैया कने त्रखोनीतिस जिले रा, कने लिसानियास अबिलेने प्रदेशा रे चौथे हिस्से बिच राज कराँ था। 2तिन्हां दिनां च मुखियायाजक त हन्ना कने कैफा थे, तां तिस वगत परमेशरा रा सन्देश सुनसान जगह बिच जकर्याह रे पुत्र यूहन्ना ले पुज्जया। 3कने सै यरदन रे आसे पासे रे सारे प्रदेशा च आईने, अपणे पापां रिया माफिया रे खातर मन फिरावा रे बपतिस्मे रा प्रचार करने लगया। 4यशायाह भविष्यवक्ते यूहन्ना रे बारे च बड़े पैहले ये सब गलाई रखीरा था भई,

“सुनसान जगह च इक माहणुये रे हाक पाणे री अवाज़ सुणी कराँ इ भई

प्रभुये जो ग्रहण करने खातर अपणे मना जो त्यार करा, तियां जे लोक किसी खास माहणुये रे खातर सड़कां सिधियां बणायें।

5हरेक खड्डा खोल़ा भरया जाओ, हरेक पहाड़ कने ऊच्ची जगह पधरी किति जाओ,

कने सै जे टेढा-मेढा सै सिधा कित्या जाणा कने सै जे ऊच्चा नीहठा रस्ता सै पधरा बणना।

6कने हर माहणुये परमेशरा रे दित्तिरे छुटकारे जो देखणा।”

7सै जे बौहत लोकां री भीड़ा री भीड़ यूहन्ने ते बपतिस्मा लेणे जो निकल़ीने औआं थी सै तिन्हाजो गल्लां था, “जहरीले सर्पा साई बुरे लोको तुहांजो परमेशरा ते औणे औल़िया सजा ते किने खबरदार कित्या? 8जे तू तिसा सजा ते बचणा चांह तां अपणिया जिन्दगिया च ये साबित कर भई तैं अपणयां पापां ते मन फिराया कने परमेशरा खौ मुड़ीरा। कने अपणे-अपणे मना च ये नीं सोच्चा भई अब्राहम अहांरा पूर्वज आ; ताकि परमेशरा अहांजो सजा नीं देणी, पर हऊँ तुहांजो बोलां भई ‘परमेशर अब्राहमा रे खातर इन्हां पत्थराँ ते बी बच्चा पैदा करी सक्कां!’ 9कने तियां जे इक माहणु अपणिया कुहाड़िया ने सै डाल़ जे बुरा फल़ ल्यावां तिसजो बड्डी टुक्की ने अग्गी च जल़ाणे जो त्यार आ, तियां इ परमेशर तुहौं तुहांरे पापां खातर सजा देणे जो त्यार आ।” 10तां लोकां री भीड़ तिसते पुछणे लगी, “अहांजो परमेशरा रिया इसा सजा ते बचणे खातर क्या करने पौणा?” 11यूहन्ने तिन्हाजो जवाब दित्या, “जे तुहांले दो कुरते ओ, तां तिन्हां चते इक कुरता तिसले जे निआं तिस ज़रुरतमन्द माहणुये जो देई दो, कने जे तुहांले रोटी ओ, तां तिसाजो तिन्हां सौगी बन्डी लो सै जे भुक्खे ओ।” 12चुंगी लेणे औल़े बेईमान लोक बी तिसले बपतिस्मा लेणे आये कने पुछणे लगे, “गुरू जी, अहें क्या करिये?” 13तिने तिन्हाजो गलाया, “अपणे कम्मां च ईमानदार रौ। रोमी सरकारा रे मुतावक जितना कर लेणे रा हुक्म हो, उतणा इ लेणा चाहिन्दा, इसते मता नीं।” 14किछ सपाईयें बी पुच्छया, “अहांजो क्या करना चाहिन्दा?” यूहन्ने तिन्हाजो जवाब दित्या, “किसी ते तिसरे पैसयां जो नीं खोयां, कने जाणदे हुए बी किसी पर झूट्ठा इल्जाम नीं लगायों, कने तुहांजो जितणी मजदूरी मिलांई तिसच इ सन्तोख रखयों।”

15सारे लोक उम्मीद करी रां थे भई मसीहे बड़े छोड़ औणा, सै येढ़ा जाणने जो बड़े इच्छुक थे भई क्या यूहन्ना इ सै मसीहा त निआं? 16तां यूहन्ने येढ़ा बोलीने तिन्हारे सवाला रा जवाब दित्या, “हऊँ त तुहांजो पाणिये च बपतिस्मा देआं, पर सै औणे औल़ा सै जे मेरते बी सामर्थी आ; हऊँ तिसरे मुकावले किछ बी नींआ, हऊँ इक्की सेवका रा सब्बीं ते छोट्टा काम्म तिस खातर करना चाओ, तां बी लायक नींआ। तिस तुहांजो पवित्र आत्मा कने अग्गी च बपतिस्मा देणा। 17सै माहणु जाति रा न्याय करने आई कराँ, ठीक तियां इ जियां जे करसाण कणका जो छन्डी ने भूआ ते लग कराँ। फेरी तिस अपणे ख्वाड़े री साफ-सफाई खरे तरिके ने करनी कने कणका जो अपणे पेड़ुये च कट्ठा करीने रखणा, पर भूआ जो तिस अग्गी च फुकणा सै जे कदीं बुझदी नीं हो।”

18यूहन्ना इस तरिके ने लोकां जो कई गल्लां ते चत्तन्न करदा रैया, कने मसीह रे औणे री खुशखबरिया रा प्रचार करदा रैआं था। 19पर तिने चौथाई देशा रे राजा हेरोदेस जो तिसरे भाई फिलिप्पुस रिया जनाना हेरोदियासा रे बारे च, कने सारे बुरयां कम्मां च सै जे तिने कित्तिरे थे, लुहामा दित्या। 20इस खातर हेरोदेस राजे तिन्हां सब्बींते बधीने ये बुरा काम्म बी कित्या, भई यूहन्ने जो जेल्ला च पाईत्या।

प्रभु यीशुये रा यूहन्ने ते बपतिस्मा लेणा

(मत्ती 3:13-17; मरकुस 1:9-11)

21पर यूहन्ने जो जेल्ला च पाणे ते पैहले ताहली जे बौहत सारे लोक बपतिस्मा लैईराँ थे तां यीशुये बी बपतिस्मा लैया। इसते बाद ताहली जे सै प्राथना करी रां था, तां स्वर्ग खुलीग्या। 22कने पवित्र आत्मा शरीर रे रुपा च कबूतरा साई तिस पर उतरया, कने स्वर्गा ते ये अवाज़ आई : भई, “तू मेरा प्यारा पुत्र आ, हऊँ तेरते बड़ा खुश आ।”

यीशुये रा खानदान

(मत्ती 1:17)

23जिस बगत यीशुये लोकां च अपणी सेवा शुरु किति, तिस बगत सै लगभग तिआं साल्लां रा था। कने लोक तिस्सो यूसुफा रा पुत्र समझां थे, भई यूसुफ त एली रा पुत्र था। 24एली मत्तात रा पुत्र था, कने मत्तात लेवी रा पुत्र था। लेवी मलकी रा पुत्र था, कने मलकी यन्ना रा पुत्र था। कने यन्ना यूसुफ रा पुत्र था। 25यूसुफ मत्तित्याह रा पुत्र था, कने मत्तित्याह आमोस रा पुत्र था। आमोस नहूम रा पुत्र था, कने नहूम असल्याह रा पुत्र था। असल्याह नोगह रा पुत्र था। 26नोगह मात रा पुत्र था, कने मात मत्तित्याह रा पुत्र था। मत्तित्याह शिमी रा पुत्र था, कने शिमी योसेख रा पुत्र था। कने योसेख योदाह रा पुत्र था। 27योदाह यूहन्ना रा पुत्र था, कने यूहन्ना रेसा रा पुत्र था। रेसा जरुब्बाबिल रा पुत्र था, कने जरुब्बाबिल शालतियेल रा पुत्र था। शालतियेल नेरी रा पुत्र था। 28नेरी मलकी रा पुत्र था, कने मलकी अद्दी रा पुत्र था। अद्दी कोसाम रा पुत्र था, कने कोसाम इलमोदाम रा पुत्र था। कने इलमोदाम एर रा पुत्र था। 29एर यहोशू रा पुत्र था, कने यहोशू इलाजार रा पुत्र था। इलाजार योरीम रा पुत्र था, कने योरीम मत्तात रा पुत्र था। मत्तात लेवी रा पुत्र था। 30लेवी शमौन रा पुत्र था, कने शमौन यहूदा रा पुत्र था। यहूदा यूसुफ रा पुत्र था, कने यूसुफ योनान रा पुत्र था। योनान इल्याकीम रा पुत्र था। 31इल्याकीम मलेआह रा पुत्र था, कने मलेआह मिन्नाह रा पुत्र था। मिन्नाह मत्तता रा पुत्र था, कने मत्तता नातान रा पुत्र था। नातान दाऊद रा पुत्र था।

32दाऊद यिशै रा पुत्र था, कने यिशै ओबेद रा पुत्र था। ओबेद बोअज रा पुत्र था, कने बोअज सलमोन रा पुत्र था। सलमोन नहशोन रा पुत्र था। 33नहशोन अम्मीनादाब रा पुत्र था, कने अम्मीनादाब अरनी रा पुत्र था। अरनी हिस्रोन रा पुत्र था, कने हिस्रोन फिरिस रा पुत्र था। फिरिस यहूदा रा पुत्र था। 34यहूदा याकूब रा पुत्र था, कने याकूब इसहाक रा पुत्र था। इसहाक अब्राहम रा पुत्र था, कने अब्राहम तिरह रा पुत्र था। तिरह नाहोर रा पुत्र था। 35नाहोर सरुग रा पुत्र था, कने सरुग रऊ रा पुत्र था। रऊ फिलिग रा पुत्र था, कने फिलिग एबिर रा पुत्र था। एबिर शेलाह रा पुत्र था। 36शेलाह केनान रा पुत्र था, कने केनान अरफक्षद रा पुत्र था। अरफक्षद शेम रा पुत्र था, कने शेम नूँह रा पुत्र था। नूँह लेमेक रा पुत्र था। 37लिमिक मथूशिलह रा पुत्र था, कने मथूशिलह हनोक रा पुत्र था। हनोक यिरिद रा पुत्र था, कने यिरिद महललेल रा पुत्र था। महललेल केनान रा पुत्र था। 38केनान इनोश रा पुत्र था, कने इनोश शेत रा पुत्र था। शेत आदम रा पुत्र था, कने आदम परमेशरा रा पुत्र था (काँह्भई आदम जो परमेशरे अपणे रुपा च बणाया था)।

Currently Selected:

लूका 3: KFSNT

Highlight

Copy