लूका 2

यीशुये रा जन्म

(मत्ती 1:18-25)

1जिस बगत रोम देशा रा बादशाह औगस्तुस था, तिस बगत तिने ये हुक्म दित्या भई तिसरे राज्जा च औणे औल़े सारे लोकां री गिणती करीने तिन्हारे नौं लिखे जायें। 2पहली दफा नौं लिखणे रा ये काम्म उस बगत हुया जिस बगत जे सीरिया प्रदेशा रा हाकिम क्विरिनियुस था। 3तां बादशाह रे हुक्मा रे मुतावक सारे लोक अपणे नौआं जो लखाणे खातर अपणे-अपणे पूर्वजां रे नगरा जो गये। 4इस खातर भई यूसुफ दाऊद रे टबरा कने कुलबे रा था, तां सै बी गलील प्रदेशा रे नासरत नगरा ते यहूदिया प्रदेशा बिच दाऊद राजे रे शहर बैतलहम जो गया, 5भई तित्थी जाई कने अपणी भारहत्थी मंगेतर मरियम सौगी नौं लखाई सक्को। 6जिस बगत सै बैतलहम नगरा बिच थे तां मरियम रे वाल़्थी हुणे रा बगत आईग्या, 7कने तिसारे पहलौठे पुत्रा रा जन्‍म हुया कने तिसे अपणे न्याणे जो कपड़े च लपेटी ने इक्की गोयडा रिया खुरलिया च रखया, काँह्भई नगरा च तिन्हाजो किसी बी सराईं बिच रैहणे जो जगह नीं मिली थी।

स्वर्गदूतां रा गद्दियां जो दर्शण देणा

8तिस देशा बिच कई गद्दी थे सै जे राति रे बगत खुल्लिया जगह बिच अपणी भेडां जो कट्ठा करीने तिन्हारी रखवाली कराँ थे। 9तिसा राति जो प्रभुये रा इक स्वर्गदूत तिन्हारे सामणे आईने खड़ीग्या कने तिन्हारे चऊँ पासयां परमेशरा रा तेज हुईग्या कने सै बड़े भरी डरीगे। 10तां फेरी स्वर्गदूते तिन्हाजो गलाया, “मता डरदे!” हऊँ तुहांरे खातर बड़े मजे री खुशखबरी सुनाणे आईरा सै जे सारे लोकां खातर हूणी। 11भई आज्ज राजा दाऊद रे नगर बैहतलम च तुहांरे खातर पापां ते छुटकारा देणे औल़े मुक्तीदाते रा जन्‍म हुया कने सैई मसीह प्रभु आ। 12कने तिसरी तुहांरे खातर ये पछयाण इ भई इक न्याणा कपड़े च लिपटी रा गोयडा री खुरलिया च रखीरा मिलणा। 13ताहली इकदम तिस स्वर्गदूता सौगी मते स्वर्गदूतां री मण्डली हुईगी कने सै परमेशरा रा गुणगान करदे सुझया कराँ थे, सै येढ़ा गाया कराँ थे भई, 14स्वर्गा च परमेशरा री बडयाई ओ कने धरतिया पर तिन्हां माहणुआं ते जे परमेशर खुश आ तिन्हां पर सुख-शान्ति ओ। 15स्वर्गदूत गान्दे-गान्दे स्वर्गा जो चलिये तां फेरी गद्दिएं इक्की-दूये जो खुशखबरी दित्ति, चला अहें बैतलहम चलिये कने ये जे गल्लां हुईयां कने तिन्हांजो प्रभुये परगट कित्या, इन्हांजो जाईने देखिये 16फेरी सै झट-पट गये कने गोयडा च मरियम कने यूसुफ जो देख्या कने खुरलिया च तिस न्याणे जो बी देख्या। 17तिन्हाजो देखीने तिन्हे गद्दिएं न्याणे रे बारे च स्वर्गदूतां रे मुँआं ते सुणिरी सारी गल्लां रा जिकर कित्या। 18कने जितणयां लोकें गद्दियां री गल्लां सुणियां सै सब जणे बड़े हैरान हुये। 19पर मरियमे सारियां गल्लां जो अपणे मना च रखी कने सोच-विचार कित्या। 20कने गद्दियां जो तेढ़ा जे स्वर्गदूते गलाईरा था तेढ़ा इ सब किछ सुणी ने कने देखीने सै परमेशरा री बडयाई कने गुणगान करदे वापस हटि गये।

यीशुये रा नामकरण संस्कार

21अट्ठां दिनां बाद, यहूदी रीति-रिवाजा रे मुतावक तिस बगत जे तिस बच्चे रा खतना (नामकरण संस्कार) हुया, ताहली तिसरा नौं यीशु रखया। ये सै नौं था तिस न्याणे रा नौं जे पेट्टा च औणे ते पैहले स्वर्गदूते मरियमा जो दस्सीरा था। 22किछ दिनां ते बाद, ताहली जे मरियम कने यूसुफ रे शुद्ध होणे रे दिन पूरे हुए, तां सै मूसा रिया व्यवस्था रे मुतावक कबूतरां रा इक जोड़ा लेईने यरूशलेम मन्दरा च बलिदान चढ़ाणे गए कने बच्चे जो बी प्रभुये जो सौंपणे खातर लेईगे, 23(प्रभुये री व्यवस्था रे मुतावक : “जे कोई जनाना पैहलौठे जो जन्म देईं तां तिस मुण्डुये जो प्रभुये रे हत्था सौंपणा जरूरी आ।”) 24प्रभुये री व्यवस्था ये बी बोलां इ भई माता-पिता जो कोकड़यां री जोड़ी या कबूतरां रे दुईं बच्चयां रा बलिदान चढ़ाणा जरूरी था। तियां इ यूसुफ कने मरियमे कित्या।

शमौना रा गीत

25तिस वगत यरूशलेम नगरा च शमौन नौआं रा इक माहणु था। कने सै परमेशरा जो मनणे औल़ा कने तिसरा भगत था; सै जे इस्राएल जो शान्ति दवाणे खातर मसीह रा इन्तजार करया राँ था, कने पवित्र आत्मा तिस सौगी था। 26पवित्र आत्मे तिस्सो दर्शण दित्या था भई तालुआं तक जे सै प्रभु रिया तरफा ते भेज्जीरे मसीहे जो देखी नीं लेन्दा, तदुआं तक तिसरी मौत नीं हूणी। 27पवित्र आत्मा री अगुवाईया ते सै मन्दरा जो गया कने तिस इ दिन मरियम कने यूसुफ न्याणे यीशुये जो यहूदी व्यवस्था रे मुतावक परमेशरा ले अर्पण करने आईरे थे। 28तिस बगत शमौन बी ऊथी मौजूद था, तिने तिस न्याणे जो अपणिया गोदा च लेआ कने परमेशरा री बडयाई करदे हुए बोलणे लगया,

29“मेरे प्रभु, हुण तू अपणे दास्सा जो अपणे वायदे रे मुतावक

शान्तिया ने मरने दे!

30काँह्भई तियां जे तैं मेरने वादा कित्तिरा था,

तिसरे मुतावक मैं तेरे छुटकारा देणे औल़े जो देखीलरा,

31तिसजो जे तैं

सारयां लोकां जो बचाणे खातर भेज्या।

32भई सै अन्यजातियां रे लोकां पर परमेशरा रिया सच्चाईया जो परगट करने औल़ी ज्योति आ,

कने तेरे अपणयां लोकां इस्राएल रे खातर तिस आदर लेईने औणा!”

33बालक यीशुये रे बारे च शमौन सै जे किछ बोलीराँ था, तिसजो सुणीने यूसुफ कने मरियम हैरान हुईगे। 34फेरी शमौने तिन्हाजो आशीष दित्ति, कने तिने तिसरी माता मरियमा ने गलाया, “ये न्याणा परमेशरा री चुणीरी नशाणी इ। इस्राएल रे बौहत लोकां तिसरा इन्कार करना, कने सैई गल्ल कईयां रे उजड़ने री वजह बणनी, पर तिस बौहत लोकां रे खातर आशीषा री वजह बणना। 35तू बौहत दुखी हूणा भई सै तलवारी ने तेरे दिला जो आर-पार बिन्हणे साई हूणा।”

हन्ना री गवाही

36हन्ना, परमेशरा री इक पक्की भगतणी थी, तिसाजो जे परमेशरा री भविष्यवाणी करने रा बरदान था, सै बी तिस बगत मन्दरा च हाजर थी। सै अशेर रे गोत्रा चते फनूएल री कुड़ी थी, कने सै बौहत बुड्डी थी। ताहली जे तिन्हारे ब्याह जो हुईरे सिर्फ सात्त साल हुईरे थे तिस बगत तिसारे घरा औल़े री मौत हुईगरी थी, तां सै बिधवा थी। 37हुण सै चौरासियां साल्लां री थी। सै मन्दरा रे अंगणा जो छड्डिने किति जो नीं जान्दी थी, कने रात दिन ऊथी रैयां थी। सै भुक्खी प्यासी रैईने प्राथना सौगी परमेशरा री अराधना कराँ थी। 38ताहली जे शमौन, मरियम कने यूसुफा ने गल्ल-बात करी रां था, तिस बगत हन्नाह बी ऊथी पुज्जी कने परमेशरा री स्तुति करने लगी। फेरी तिसे जाईने तिन्हां सारयां जो यीशुये रे बारे च दस्या, सै जे तिस राजे री निहाल़पा च थे, कने सै आईने यरूशलेम नगरा जो छडवाणे औल़ा था।

नासरत जो वापस औणा

39यीशुये रे मौ-बुढ़यां प्रभुये रे व्यवस्था रे मुतावक सारी जरूरी गल्लां पूरी कित्ती यां, तिसते बाद सै गलील प्रदेशा रे नासरत नगरा च अपणे घरा जो बापस आईगे। 40कने बालक यीशु कद काठिया च बधदा कने मजबूत हुन्दा गया, कने ज्ञाना री गल्लां ने भरदा गया; कने परमेशरा रा तिस पर खास आशीरबाद था।

मन्दरा च यीशुये रा धर्म गुरुआं ने गल्ल बात करना

41हर साल यीशुये रे माता-पिता फसह रा त्योहार मनाणे खातर यरूशलेम नगरा जो जां थे, येढ़ा करना हर इक यहूदी खातर जरूरी था। 42ताहली जे यीशु बाराँ साल्लां रा हुईग्या, तां सै त्योहारा रिया रितिया रे मुतावक यरूशलेम जो गये। 43जिस बगत त्योहार खत्म हुईग्या, तां सै नासरत नगरा जो बापस चलीपे, पर यीशु यरूशलेम च रुकिग्या। इसा गल्ला जो तिसरे माता-पिता नीं जाणदे थे। 44काँह्भई तिन्हे सोच्चया भई सै होरसी जातरुआं सौगी हूणा, इक् दिनां रा सफर हंडणे ते बाद तां जे सै तिन्हाजो नीं सुझया, फेरी सै तिस्सो अपणे रिस्तेदाराँ कने मित्राँ रे बिच टोल़णे लगे। 45कने तां जे यीशु तिन्हाजो किति नीं मिलया, तां सै तिस्सो टोल़दे-टोल़दे मुड़ी कने वापस यरूशलेम पुज्जे। 46तिज्जे दिन यीशु तिन्हाजो मन्दरा रे अंगणा च मिलया, तित्थी सै यहूदी धर्म-गुरुआं सौगी बैठिरा था, कने तिन्हारी गल्लां सुणीने आत्मिक कने धार्मिक गल्लां रे बारे च स्वाल जबाब करी रां था। 47सारयां लोकें तिन्हे जे सै गलांदा सुणया, सै सब जणे तिसरी सूझबूझ कने तिसरे जबाबां जो सुणीने हैरान हुईगे। 48तिसजो देखीने यीशुये रे माता-पिता बड़े हैरान हुए कने तिसरी माते तिसजो गलाया, “पुत्रा, तैं अहां सौगी येढ़ा काँह कित्या? तिज्जो टोल़दे-टोल़दे तेरे पिता रे कने मेरे प्राण त कट्ठे हुईगरे थे।”

49फेरी यीशुये तिन्हाजो गलाया, “तुहें मिन्जो कजो टोल़ी कराँ थे? क्या तुहांजो येढ़ा पता निआं भई मेरा अपणे पिता रे घरें हूणा जरूरी आ?” 50पर सै क्या बोलीराँ था, तिन्हां रिया समझा च किछ नीं आया।

51फेरी सै तिन्हां सौगी नासरत जो वापस आईग्या, कने तिन्हारा हुक्म मनदा रैया; कने तिसरी माते ये सारी गल्लां अपणे मना च रखी। 52यीशुये जो परमेशर कने माहणुआं रा अनुग्रह मिलदा गया कने सै अक्ला च कने कद काठिया च बधदा गया।

Currently Selected:

लूका 2: KFSNT

Highlight

Copy