Popular Bible Verses from 1 Vakorinto 15

Share

Se ngu toneto, vanathu vo randeka, zumbani mi di tsani, mi si xulwi ngu txilo. Khutalani miya masoni ka mthumo wa Mkoma, na mi txi tiziva tito, masoni ka Mkoma, mthumo wanu hi nga wa mahala.

Txi na bongwe Txizimu txi hi ningako kuxula ngu Mkoma wathu Jesu Kristu.

Mi nga ti kanganyiseni: “Vangana vo biha va onhetela mikhuwo ya yinene.”

Kambe konakuwa, ngu mtamo wa kateko ya Txizimu ni phindukile ni maha txi ni ku txona, kambe kateko yiya Txizimu txi nga ni ninga, kha ya maha txifule; nguko ni thumile ngutu kupinda vona votshe; kasi mweno hi nga ani, kambe i kateko ya Txizimu yi yi ku ni nani, yi nga thuma tona.

Awe lifo, kuxula kwako ku hani? Awe lifo, mndombo wako wu hani, kani? Mndombo wa lifo ngu txionho, ani mtamo wa txionho ngu mlayo.

Ni lava ku mi gela misisalo: Hi nga hotshethu hi no fa, aniko hotshethu hi na hinduluswa txiemo. Ngu txikhatianyana txo fana ni kuphanima ka diso, ngu kuvetwa ka mpundu wo gwitisa, nguko kha ditshuri wu na vetwa mpundu, vafi va na wuka va si swi va di ni kusina, athu hi na hinduluswa.

Nguko, kufana ni kuwa lifo li nga vangwa ngu m'thu mmweyo, ngu toneto kuwuka ka vafi ni kona ku vangilwe ngu m'thu mmweyo. Kha ditshuri, ngako votshe va fako ngu ka Adhamu, ngu toneto kambe votshe va na tshumela ve hanya ngu ka Kristu.

Ta laveka ti to mmidi wu wu sinako wu txi ambala ku ambi sina, ni mmidi wu wu fako wu txi ambala ku ambi fa.

Nguko ta laveka ti to Kristu e fuma, kala kuza e veka votshe valala hahatshi ka mikondo yakwe. Se mlala wo gwitisa a fanelako kufuviswa, ngu lifo.