1 Vakorinto 15
15
Kuwuka ka Kristu ngu ka vafi
1Vanathu, na mi alakanyisa Evhangeli yi ni nga mi txhumayela, ayi anu mi nga yi amukela, ayi mi nga zumba mi di tsani ka yona; 2ayi yi no mi hanyisa, ngako mi txi yi veketisa tiya ni nga mi txhumayelisa tona. Hahanze keto, kukholwa kwanu ku nga va i di ka mahala.
3Nguko kukhata, ni mi gondisile tiya nani ni nga gondiswa: Ti ta ku Kristu a fite ngu mhaka ya sionho sathu, nga tiya yi wombisako tona Mibhalo. 4#Wona ni ka: Mas. 16:8-10; Mat. 12:40; Mith. 2:24-32. A keletwe, e tshumela e wuka ngu ditshiku da wuraru, nga ti yi wombako yona Mibhalo. 5#Wona ni ka: Mat. 28:16-17; Mar. 16:14; Luk. 24:34,36; Joh. 20:19. A ti wonekisile ka Khefasi, se ngu msana e wonwa ngu vale va digumi ni vambidi. 6Msana keto, a ti wonekisile ka vanathu vo pinda mtxhanu wa mazana, ngu txikhati tximwetxo; ava, hagari ka vona, vamwani va ku ngadi va txi hanya ni nyamsi, aniko vamwani se va fite. 7Msana keto, kambe a ti wonekisile ka Jakobe, se kugwita keto, a ti wonekisile ka votshe vapostoli. 8#Wona ni ka: Mith. 9:3-6. Se ngu magwito ka totshe, a ti wonekisile kwangu, ni ku mwanana wa tshole, a nga velekiswa kuhawulwa. 9Nguko ani ni m'dotho ka votshe vapostoli; kha ni fanekelwi ngu kudhanwa ngu ditina da mpostoli, nguko ni xanisile dibanza da Txizimu. 10Kambe konakuwa, ngu mtamo wa kateko ya Txizimu ni phindukile ni maha txi ni ku txona, kambe kateko yiya Txizimu txi nga ni ninga, kha ya maha txifule; nguko ni thumile ngutu kupinda vona votshe; kasi mweno hi nga ani, kambe i kateko ya Txizimu yi yi ku ni nani, yi nga thuma tona. 11Sekoko, mwendo ngani, mwendo ngu vona, ati hi txhumayelako ngu toneto; kambe ngu toneto nanu mi nga ti amukela.
Kuwuka ka vafi
12Ngako ku txi gondiswa ti to Kristu a wukile ngu ka vafi, i mhaka muni vamwanyani hagari kwanu va wombako ti to kha ku nga ho kuwuka ka vafi kani? 13Ngako ku si nga ho kuwuka ka vafi, Kristu nene kha wuka ka vafi. 14Se ngako Kristu a sa wuka ka vafi, kugondisa kwathu nga mahala, likholo lanu ni lona nda mahala. 15Se, ngu yiya nzila, hi tifakazi ta makuhu ta Txizimu, nguko ha txi fakazela ti to txona txi wusile Kristu, na txi sa m'wusa, ngako i di ditshuri ti to vafi kha va wuki kufani. 16Nguko, ngako vafi va si wuki ngu ka vafi, Kristu nene kha wuka; 17se ngako Kristu a sa wuka ka vafi, likholo lanu nda mahala, se mi ngadi sionhoni kwanu. 18Ngu toneto, ni vale va nga fela ka Kristu, va lovile ni vona. 19Ngako txithembo txathu ka Kristu i di txa kugwitela ka wona wutomi wa ha mafuni muwa dwe, tikomba ti to hi vathu va va fanelako kutsetswa ngu dotshe ditiko.
20Aniko hi nga tona! Kristu a wukile ngu ka vo fa, ngene matiwula a votshelele va va nga otela. 21Nguko, kufana ni kuwa lifo li nga vangwa ngu m'thu mmweyo, ngu toneto kuwuka ka vafi ni kona ku vangilwe ngu m'thu mmweyo. 22Kha ditshuri, ngako votshe va fako ngu ka Adhamu, ngu toneto kambe votshe va na tshumela ve hanya ngu ka Kristu. 23Aniko m'thu ni m'thu ngu txikhati txakwe: Kukhata, Kristu i ku matiwula a votshe; ngu msana ava va lumbako Kristu va na wuka ngu mbimo ya kuwuya kwakwe. 24Magwito ka totshe, ngu mbimo yi Kristu a no tshumela e ningela Mfumo ka Txizimu Tate, msana ka kuva a di fuvisile kotshe kufuma, ni wotshe wukoma ni yotshe mitamo. 25#Wona ni ka: Mas. 110:1. Nguko ta laveka ti to Kristu e fuma, kala kuza e veka votshe valala hahatshi ka mikondo yakwe. 26Se mlala wo gwitisa a fanelako kufuviswa, ngu lifo. 27#Wona ni ka: Mas. 110:1. Nguko, Txizimu txi vekile sotshe hahatshi ka mikondo ya Kristu. Aniko, ngako va txi kha vona: “Si vekilwe sotshe hahatshi kwakwe,” ti ha kubasani ti to kha txi balwi Txizimu i ku txona txi nga si veka hahatshi ka mikondo yakwe Kristu sotshe simaha.
28Msana ka kuva sotshe si di vekilwe hahatshi ka mikondo yakwe, ngu konaho kambe nene Mwanana a na ti veka hahatshi ka wule a nga mninga mtamo wa kufuma sotshe, kasiku Txizimu txi txi va i di sotshe ka votshelele.
29Ngako i si nga toneto, nji txani va ndino wuyelwa ngu txona ava va bhabhatiswako, ngu kubhabhatiselwa vafi, kani? Ngako vafi va si wuki, nji txani vathu va txi ti bhabhatisela ngu vona kani? 30Hambi athu nje, ti hi vhuna txani kutsana hi txi ti ningetela mu tiphangoni, yotshe mbimo kani? 31Vanathu, yotshe mbimo na fa, ngu mhaka ya kupfaliswa kuwa ni nga kumana kwanu, ngu ka Kristu Jesu Mkoma Wathu. 32Idiku kulwa kwangu ni sikakaka ditikoni ka Efesu ni to lwela nduma ya mafu dwe,
ti ni vhuna txani toneto, ngako ku si nga ho kuwuka ka vafi kani?
“He dyeni hi sela, nguko mangwana ha fa.”
33Mi nga ti kanganyiseni: “Vangana vo biha va onhetela mikhuwo ya yinene.” 34Wukani ta tinene, mi nga yeni masoni ngu kuonha. Vamwani kwanu va hanya va si zivi ni txilo ka timhaka ta Txizimu. Ni womba tiya kasiku mi tipfa tingana.
Kuwuka ka mmidi
35Aniko mmwani a na khene: Va wukisa kutxani vafi kani? Va wuya ni wuhi mmidi kani? 36Txiphukuphuku we! Atxi u phayako, kha txi mili, ngako txi sa thanga ngu kufa. 37Se atxi u phayako, hi nga wona mndonga wupune, wu tshumelako wu mila, aniko i nyingi ya fulaho dwe, mwendo ya yimwani mbewu. 38Aniko Txizimu txa ninga mmidi mbewu yiya, madingano ni kuranda ka txona; yimwani ni yimwani txi yi ninga mmidi wu wu dinganako yona. 39Mimidi yotshe hi nga mimidi ya lixaka limwelo, aniko wu ho mmidi wa m'thu, wu ho mmidi wa sihari sa mune wa minenge, wu ho mmidi wa sinyana, ni mmidi wa sihaka. 40Ku na ni mimidi ya nzumani ni mimidi ya ha mafuni, aniko kuphatima ka mimidi ya nzumani kha kufani ni kuphatima ka mimidi ya ha mafuni; 41ditambo di ni kuphatima ka dona, mtxima ni wona wu ni kuphatima ka wona; tinyeleti ni tona tina ni kuphatima ka tona; kambe hagari ka tona, kuphatima ka yimwani kuhambana ni kuphatima ka yimwani nyeleti.
42Kuwuka ka vafi ni kona ku na mahisa toneto: Kuphaywa mmidi wu wu sinako, ku txi wuka mmidi wu wu si siniko; 43kuphaywa mmidi wu wu solekako, ku txi wuka mmidi wa kupfaliswa; kuphaywa mmidi wu wu ku si nga ni mtamo, ku txi wuka mmidi wu wu ku ni mtamo; 44kuphaywa mmidi wa mtumbuluko, ku txi wuka mmidi wa moya; wu ho mmidi wa mtumbuluko, kambe wu ho mmidi wa moya ni wona. 45Ngu konaho, kubhatwe, va txi kha vona: “M'thu wo thanga, Adhamu, a mahilwe txiwumbwa txi txi hanyako.” Aniko Adhamu wu wo gwitisa a mahilwe moya wu wu hanyisako. 46Aniko so khata hi nga sile sa moya, kambe ngu sile sa mmidi; asile i ku sa moya si tile ngu msana. 47M'thu wo khata a nga wumbwa ngu mafu, mbwa mafu; m'thu wa wumbidi a ta ngu nzumani. 48Vathu va va nga wumbwa ngu mafu, va fana ni wule wa mafu; vathu va va nga ta ngu nzumani, va fana ni wule wa nzumani. 49Ngako hi nga ningwa kuambala txifaniso txa m'thu wa mafu, hi na ningwa kambe kuambala txifaniso txa m'thu wule wa kuta ngu nzumani.
50Ati ni wombako tona, vanathu, ni khani: Mmidi ni mnoha kha si na mbi dya thomba ya Mfumo wa Txizimu, hambi kusina kha ku na mbi dya thomba ya si si si siniko. 51Ni lava ku mi gela misisalo: Hi nga hotshethu hi no fa, aniko hotshethu hi na hinduluswa txiemo. 52#Wona ni ka: 1 Vat. 4:15-17. Ngu txikhatianyana txo fana ni kuphanima ka diso, ngu kuvetwa ka mpundu wo gwitisa, nguko kha ditshuri wu na vetwa mpundu, vafi va na wuka va si swi va di ni kusina, athu hi na hinduluswa. 53Ta laveka ti to mmidi wu wu sinako wu txi ambala ku ambi sina, ni mmidi wu wu fako wu txi ambala ku ambi fa. 54Mbimo yi mmidi wuwa wu sinako wu no ambala ku ambi sina, ni mbimo yi mmidi wu wu fako wu no ambala ku ambi fa, ka txonetxo txikhati ku na tatiseka ati ti ku mu ka Mibhalo, ati taku: Lifo li mitilwe ngu kuxula. 55Awe lifo, kuxula kwako ku hani? Awe lifo, mndombo wako wu hani, kani?
56Mndombo wa lifo ngu txionho, ani mtamo wa txionho ngu mlayo. 57Txi na bongwe Txizimu txi hi ningako kuxula ngu Mkoma wathu Jesu Kristu. 58Se ngu toneto, vanathu vo randeka, zumbani mi di tsani, mi si xulwi ngu txilo. Khutalani miya masoni ka mthumo wa Mkoma, na mi txi tiziva tito, masoni ka Mkoma, mthumo wanu hi nga wa mahala.
Currently Selected:
1 Vakorinto 15: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.