1 Vakorinto 16
16
Msengo wa kuvhuna dibanza da Jerusalema
1 # Wona ni ka: Var. 15:25-26. Ka mhaka ya msengo wa kuvhuna vasawuleki, na nanu mahani tonti ni nga rumela kumaha ka makholwa a mabanza a Galatiya. 2Ngu ditshiku do khata ka divhiki, mmweyo ni mmweyo kwanu, m'tini kwakwe, a na phawuse e veka ngu phuho asi a nga sikota kusiyeta, kasiku mi si rinzeli kuta senga ni di bwakile. 3Mbimo yi ni no bwaka, ni nata va ruma ni mapapilo avava anu mi no va sawula, ve tsula Jerusalema, kuheleketa msengo wanu. 4Se ngako ti di ni fanelo ku ni tsula navo, va nata tsula ni nani.
Makungo a dipfhumba
5 # Wona ni ka: Mith. 19:21. Ni na mi hokela, msana ka kuva ni di pindile ngu Makedhoniya. Ni no pinda ngu kona dwe. 6Kutilava ni nata zumba ni nanu, mwendo kambe ku ta heta mbimo ya wuxika ni di kheyo, kasiku mi ni heleketa amu ni endelako kona. 7Kha ni lavi ku ta mi wona, ni tekela kupinda, aniko ni pimisa ku ta fungala mbimo yokari ni nanu, ngako Mkoma a txi ni tumelela. 8#Wona ni ka: Levh. 23:15-21; Dhewut. 16:9-11. Kambe ni ngadi zumbile Efesu kala ditshiku da Pentekoste, 9nguko ahawa mthumo wangu wu tuletwe ditimba da hombe, na kasi valala mbavangi.
10 # Wona ni ka: 1 Vak. 4:17. Ngako Timoti a txi mi tela, ti lulamiseleni, kasiku asi ta va ni kuthava txilo, nguko nene wa khutala mthumoni, ka Mkoma, kufana ni nani. 11Ngu toneto, ku nga ve ni m'thu wa ku mkanyisa. Mu lulamiseleni dipfhumba dakwe ngu kuthutha kasi kueta kheno kwangu, nguko ani ni m'verete kumweko ni vanathu.
12Ngu didhawa da mwanathu Apolosi, ni mkombete ngutu, ti to e ta kheyo kwanu, mi ku vanawe. Aniko ene kha ti lava ku mi tela kunukunukuwa; a nata, ngako a txi mana mbimo.
Sileleto so gwitisa ni madungula
13Wonelelani, mi zumba mi di tsani mu ka likholo, mi hanyisa txiwamna, mi va ni mtamo. 14Totshe ti mi ti mahako, ti maheni ngu lirando.
15Tximwani txileleto, vanathu, ngu txiya: Ma tiziva ti to vathu va nyumba ya ka, Stefani ngu vona i ku vo thanga ditikoni ka Akaya, avava kambe va nga ti ningela kasi kuthumela vasawuleki. 16Ti ningeteleni na nanu ka vathu vo nga toneto ni ka votshe va va thumako ni kuxaniseka navo. 17Na tsaka ngu kuta ka Stefani, ni Fortunato, ni Akayiko, nguko vona va mi tsivetile kupwatekani kwanu. 18Va ti ta ninga kudikha moya wangu ni wanu. Vanani ni txithavo ni vathu vo ngeto.
19 # Wona ni ka: Mith. 18:2. Ma mi dingula otshe mabanza a Asiya. Akilasi ni Prisila kumweko ni msengeletano wu wu tshanganelako nyumbani kwakwe, va mi dingula ngutu. 20Va mi dingula votshe vanathu. Losanani ngu kupswopswana ko sawuleka.
21Madingula awa ngangu nipune: Paulo.
22Awu asi randiko Mkoma a nave kurukwani. Maranatha! Ngono, Mkoma!
23Kateko ya Mkoma Jesu yi nave ni nanu motshe. 24Lirando langu li nave ni nanu motshe ngu ka Kristu Jesu.
Currently Selected:
1 Vakorinto 16: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.