2 Vakorinto 1
1
Kulosa
1 # Wona ni ka: Mith. 18:1. Ani Paulo, Mpostoli wa Jesu Kristu, ngu kuranda ka Txizimu, kumweko ni mwanathu Timoti, ha losa Dibanza da Txizimu di di ku Korinto, ni votshe vasawuleki va manekako ditikoni kotshe ka Akaya.
2Kateko ni kudikha si si tako ngu ka Txizimu Tate, ni ka Mkoma Jesu Kristu, si nave ni nanu.
Paulo a bonga Txizimu
3Txi na dhumiswe Txizimu, Tate wa Mkoma wathu Jesu Kristu, Tate wa wumbilu, Txizimu txa kotshe kuthavelela, 4txona txi hi thavelela ka sotshe sixaniso sathu, kasiku hi sikota kuthavelela ava va karatekako, ngu yona thavelelo ayi nathu hi thavelelwako ngu yona ngu Txizimu. 5Nguko, ngako sixaniso sa Kristu si hi talelako, ngu toneto, thavelelo yathu ni yona ya engeteleka ngu kota yakwe Kristu. 6Ngako hi txi xaniswa, hi xaniselwa ku anu mi txi mana kuthavelelwa ni kuhanyiswa. Se, ngako hi txi thavelelwa, anu mi mana kuthavelelwa nanu, aku ku mi ningako kutimisela ka sixaniso si nanathu hi timiselako ka sona. 7Ngu toneto, themba yathu kwanu yi tsani, ngu kuziva tito, ngako mi sengelako ni nathu kuxanisekani, mi na va kumweko ni nathu ni kona kuthavelelwani.
8 # Wona ni ka: 1 Vak. 15:32. Vanathu, kha hi ti lavi ku mi sisela kuxaniseka ku ku nga hi mana hi di Asiya. Koneyo, hi xanisilwe, ngu mpimo wa hombe ngutu kupinda mtamo wathu, ahawa hi nga ti si thembi ti to hi nga hanya. 9Hi ti pfite kha ditshuri hi di vathu va va nga abaniselwa kufa. Atiya, ti hi ningile ku hi si ti thembi athu hipune, aniko, hi themba Txizimu, atxi txi wusako vafi. 10I ku txona txi nga hi hulukisa, ngu txona kambe txi no hi hulukisa ka phango ya hombe ya lifo; ka txona hi vekile themba yiyo, txi na hi hulukisa yotshe mbimo. 11Txizimu txi na hi vhuna ngu mtamo wa mikombelo yanu, kasiku kateko yi hi nga ningwa ngu mhaka ya kukombelelwa ngu vavangi, yi bongwa ngu vathu vavangi ditinani kwathu.
Paulo a swela kutsula
12Nguko wudhumo wathu ngu wuwa: Wufakazi wa livhalo lathu waku, hi hanyile hagari ka vathu, ngu ditshuri ni kuthembeka ka Txizimu, na i si nga ngu wutxhari wa vathu, aniko ngu makatekwa a Txizimu, hi hanyile ha mafuni ngutu-ngutu kumweko ni nanu. 13Kunene, athu kha hi mi bhaleli timhaka timwani to hambana ni tile mi gondako, ati mi ti zivako mapapiloni kwathu. Se, na themba ti to mi na tiziva totshe kala magwito. 14Nguko, se ma hi ziva ngu phuho yimwani, kambe ma ti dhumisa ngu ngathu, kufana ni nathu hi nota ti dhumisa ngu nganu, ka ditshiku da Mkoma wathu Jesu.
15Ngu mhaka ya kuthemba kuwa, ni lavile kuthanga ngu nganu ni txi mi tela, kasiku mi ta amukela kateko ka wumbidi. 16Se, ni ti pimisa kupinda ngu kwanu, ni txi tsula Makedhoniya ni kuwuyani kambe, kasiku ni txi ta vhunwa ngu nganu ka dipfhumba da kuya Judheya. 17Ina mixuvo yi ni nga yi veka ngu kutsana, i ti yo sakana kani? Mwendo mixuvo yangu njo va i di ya wuthu dwe, ahawa koza ni txi ta maha wule wo “Im, im” ni ku “ahim-him, ahim-him” ngu mbimo yimweyo kani? 18Na tsanisa ngu kuthemba ka Txizimu ti to mapswi awa ni ma wombako kwanu kha ma hinduka ma txi maha ta “Im” ni “ahim-him” ngu mbimo yimweyo. 19#Wona ni ka: Mith. 18:5. Nguko Mwanana wa Txizimu, Jesu Kristu a nga txhumayelwa ngu ngathu, ani ni Silivhano ni Timoti, kha maha wa “Ina” ni “ahim-him,” aniko, mbwa “Ina” yotshe mbimo. 20Nguko, sotshe sithembiso sa Txizimu, si mani “Ina” wa sona kwakwe Jesu Kristu. Ngu toneto, hi pfalisako Txizimu ngu ngene hi txi “Amen.” 21Ngu txona Txizimu txi hi tsanisako athu ni nanu ka Kristu, txi txi hi sawulekisa ngu ku hi tota mafura. 22Txona ngu txona txi nga hi veka txivango ngu txixambanyo txa txona, txi txi zima timbiluni kwathu sitsaniso sa Moya.
23I di ani, fakazi yangu ngu Txizimu ka ti to ngu ku mi tsetsa kha na tshumela ni ta Korinto. 24Hi nga ti to lava kufumela likholo lanu: Aniko ho lava kuvhunetela litsako lanu dwe, nguko amu ka likholo, anu mi tsani.
Currently Selected:
2 Vakorinto 1: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.