2 Vakorinto 2
2
1Ani ni sungile ti to kha ni na mbiswa ni txi ta kwanu kambe ngu timhaka ta ku mi xanisa. 2Nguko, ni txi mi xanisa anu, i mani mmwani wu a no ni tsakisa, hahanze ka vona vale ni nga va xanisa kani? 3Ngu toneto, ni mi bhalete mhaka yiya na ni txi mahela tito, mbimo yi ni nota, ni si ta mana dikhodho txitimwi ka dikhodho ka vava ni nga ti dingana kutsakiswa ngu vona, nguko na mi themba motshe, na tiziva tito, litsako langu, litsako lanu nanu. 4Ngu toneto, ni mi bhalela ni di hagari ka sikarato sa hombe, na mbilu yi txi pandiseka, ni txi dila mirongo yayingi, i si nga kufela ku mi thela dikhodho, aniko ngu ti taku mi fela kuziva lirando la hombe ngutu li ni mi randako ngu lona.
Kudivalela muonhi
5Ngako m'thu a di mahile to henyisa mmwani, kha ti mahela ani, aniko a ti mahete anu, mwendo ngu mpimo wokari, ka vanganinyana va ka kwanu. 6Ka eneyo m'thu, ka m'dingana kusolwa ku a nga mahelwa ngu wungi wa vathu. 7Se hambi ka toneto, anu m'divaleleni mi txi mtsanisa, kasiku asi pandiseki ngutu aha koza e guma mtamo. 8Ngu toneto, na mi kombela ti to mi txi kombisa lirando lanu kwakwe. 9Nguko nani ni mi bhalete kasi ku mi duka ni txi na wona ti to mi vaengisi va totshe timhaka. 10Ka wule mi m'divalelako, nani na m'divalela. Nguko, ni txi divalela, ngako ku di ni to divalela, ni ti maha ngu kota yanu, masoni ka Kristu. 11Kasiku hi si kanganyiswi ngu Sathani, nguko ha ma ziva marindi akwe.
Kupandiseka ka Paulo a di Trowadhe
12 # Wona ni ka: Mith. 20:1. Ngako ni di hokile didhoropani ka Trowadhe kasiku ni txi ya txhumayela kona Evhangeli ya Kristu, ni woni ti to Mkoma a ni tulete nzila ya kuthuma mthumo wakwe konaho. 13Hambi keto, ani ni ti pandisekile ngutu nguko kha na sikota kumana ni mwanathu Titosi. Ngu toneto, ani ni va satisile ni txi teka nzila ya kuya Makedhoniya.
14Txi na bongwe Txizimu, atxi, ngu Kristu, txi hi guletako yotshe mbimo, kudhumiswani ka txona; atxi kambe ngu ngathu txi lavako kuhangalasa ka otshe makhalo kubhumula ka wuzivi wa txona. 15Nguko, athu hi kubhumula ka kunene ka Kristu masoni ka Txizimu, kubhumula ku ku hangalakako hagari ka vale va hanyiswako ni ka vale va lovako. 16Ka vale va lovako, ngu bhumula ko biha ku ku dayako; aniko, ka vale va hanyiswako, ngu bhumula ka kunene ku ningako wutomi. Se, i mani a fanelwako ngu mthumo wo ngeto kani? 17Nguko athu kha hi fanani ni vamwani vathu vavangi, ava va mahako dibhindu do biha ngu dipswi da Txizimu. Aniko ngu txona Txizimu txi nga hi ruma. Se ngu toneto, hi womba-womba ha kubasani mapswi o tuletelwa ngu Txizimu, nga sithumi sa Kristu.
Currently Selected:
2 Vakorinto 2: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.