Popular Bible Verses from YOHANES 14

Share

Halok, hit hinendawinggen hambukhogo logouwageluk an nendawinggen hambukhogo welagirek mene wokhisaluk lagain o. Andi re, afuni kweangma mene nen wogisagarek hak wokhisagain lek andi nen he, hinendawinggen fiti logolik hinailo agubo.

at Yesus nen he, mel yagatikhe: ”Kwe inom, ebe wene inom, afuni inelugerinafirek andi inom, An nebe aro. At sa nen an noba wagi'lek halok, neisena were'ma pikhit kwigin mondok lego,” iluk yagatikhesik

At Yesus nen wene a'nogo yagaisasikhesik, hobuk he, ekhe mel yagaisasikhe: ”Nagainafuri, hit hinendawimo nen he, Eige, iluk hinendawinggen firogo logogubo. Hinendawinggen Allahba himbiret figik, an noba himbiret figik, ikhi logogin o.

Wene andi an nebe hit ninom logolik yagahisikhi lagi. Meneat he, an neisena nen at Areagun hit lebethisikhi logouwageluk, an nenuba pelakhisa wesumo re, aren yi wene ti wene mondogat yagahisigik, an nen yagahisikhi lagi mene andi mondogat ebehisigik, ikhi logogin o.

At sa nen, an nen, yi'nogo hilingiti logoin o, ti'nogo hilingiti logoin o, iluk yagahisigi mene andi, nane hologo hilingiterek halok, an nebe endawinggen hundik mene at andi aro. Nen, neisena nen at andi endawinggen hundigat. Nen, an nen at andi nendawinggen hundik logolik, nebe futnobagauwageluk yagasigin o,” iluk yagaisasikhemo

A'nogo hilingitunem, hit lebethisikhi logolik, hinom mondok logobagaigen iluk, an nen neisena kino yagasumo, aren ap ekhe pelakhisa wesigin o. At andi ebe re, Allah Areagun ebe wene yagahisikhi logogin mene. A'nogo hinoba pelakhisa wesumo, it afuni kweangma mene nen, at andi ebe inonggorat. Nen, ebe ineilenggen hogoin legat, andi nen he, ebe wanugun elo'lego. A'nogo meneat he, hit enek he, at ebe hinom logolik, hinendawimo mondok logogin andi nen he, at ebe hinelu logogun o.

Nen at sa nen, yi mene ti mene an nenu hombuk palogo Allah kino yagate halok he, an amlogo nen hilingitunem, it afuni nen neisena fogerasuageluk, an nen hilingisigin o. A'nogo hilingisigin andi nen he, hiren yi mene ti mene an nenu hombuk palogo kino yaganeti logoino. A'nogo kino yaganetep halok he, an nen hilingisigin o,” iluk wene warisasikhe.

At Yesus nen wene a'nogo warisasikhesik he, wene ekhe mel yagaisasikhe: ”Hit an hinendawinggen hundik halok he, an nen hit yi'nogo hilingiti logoino, ti'nogo hilingiti logoino, iluk yagahisikhi lagi mene andi hilingiti logogun o.

An neisena awiba andoma, o hit logogun oba obalik hokhorogo selek werego. A'nogo lek logoilepma re, an o hit logogun oba tegeli lagain, iluk yagahisele lego.

An o andoma arat lambik he, hit hinaiba arat tegelogo fuluk, an logogin oba andoma ninom logouwogen iluk, nambotkwe wokhinabi wesigin o.

at Tomas nen he, mel yagatikhe: ”Noe. O hat lagain oba andi ninonggotma re, kwe andi ninggi'nogo nen ninelu asigin o,” iluk yagatikhemo re