YOHANES 14

Yesus nen, ”An o hit logogun oba tegeli lagain,” iluk wene warisasikhe wene

1At Yesus nen wene a'nogo yagaisasikhesik, hobuk he, ekhe mel yagaisasikhe: ”Nagainafuri, hit hinendawimo nen he, Eige, iluk hinendawinggen firogo logogubo. Hinendawinggen Allahba himbiret figik, an noba himbiret figik, ikhi logogin o. 2An neisena awiba andoma, o hit logogun oba obalik hokhorogo selek werego. A'nogo lek logoilepma re, an o hit logogun oba tegeli lagain, iluk yagahisele lego. 3An o andoma arat lambik he, hit hinaiba arat tegelogo fuluk, an logogin oba andoma ninom logouwogen iluk, nambotkwe wokhinabi wesigin o.

4Nen, o an lagain oba andi, kwe ebe hit hineluaro,” iluk yagaisasikhemo, 5at Tomas nen he, mel yagatikhe: ”Noe. O hat lagain oba andi ninonggotma re, kwe andi ninggi'nogo nen ninelu asigin o,” iluk yagatikhemo re, 6at Yesus nen he, mel yagatikhe: ”Kwe inom, ebe wene inom, afuni inelugerinafirek andi inom, An nebe aro. At sa nen an noba wagi'lek halok, neisena were'ma pikhit kwigin mondok lego,” iluk yagatikhesik, 7it mondogat yagaisikhi logolik he: ”Hit an nebe hinelu agep andi re, an neisena hinelu asigin aro. Hinelu asigin andi re, huli yogondak huli nen, at ebe agik, hineilenggen higik, arat hikhi lagebo,” iluk yagaisikhi lagaikhemo,

8at Filipus nen he, mel yagatikhe: ”Noe. Nineilenggen haluk ninendawinggen hambukhogo logouwageluk, hat heisena andi ebe yaganisan o,” iluk yagatikhemo, 9at Yesus nen he, mel yagatikhe: ”Filipus nagore. An o endamat a'lima nenat ninom welago meneat he, haren an nebe futnobabagagi'lek welagenma higi, i a? At sa nen an eilenggen niikhe andi re, An Neisena eilenggen hikhe o. A'nogo meneat he, haren, Heisena andi yaganisan o, iluk egen andi ninggi'nogo nen egen. 10An nen neisena nemberek hundik, nen, neisena nen an nemberek hundik, welagorek andi, hat futfikhi lagen lega?” iluk yagatikhesik he, it mondogat yagaisikhi logolik, ”An nen wene yagahisigirek andi, an nendawimo nen kagalogo yagahisigirek fuk. Lego. We an neisena nemberek hundik logolik, an naneba nen igik, nenggiba nen hilingitik, igirek mene andi, at onggwaregenat hilingiri'logo o. 11An nenat neisena nemberek hundik, nen, neisena nen an nemberek hundik welagorek igi andi, eberogoat iluk, hit futfeni o. Andi futfogoin elo'lek halok he, an hilingiti lagi mene andi hineilenggen hambik, futfeni o. 12At sa nen endawinggen an noba himbiret fikhe halok he, an hilingiti lagi mene andi, aren hilingiti logogin aro. An hilingiti lagi andi re, endebat hak meneat he, an neisena oba lagain andi nen he, at sa nen endawinggen an noba himbirik welagarek mene andi nen ebenagaikmo hokhorogo hilingiti logogin o, iluk nane eberogoat yagahisigi. 13Nen at sa nen, yi mene ti mene an nenu hombuk palogo Allah kino yagate halok he, an amlogo nen hilingitunem, it afuni nen neisena fogerasuageluk, an nen hilingisigin o. 14A'nogo hilingisigin andi nen he, hiren yi mene ti mene an nenu hombuk palogo kino yaganeti logoino. A'nogo kino yaganetep halok he, an nen hilingisigin o,” iluk wene warisasikhe.

Yesus nen, ”Allah Areagun wokhisagain,” iluk abok yagaisasikhe wene.

15At Yesus nen wene a'nogo warisasikhesik he, wene ekhe mel yagaisasikhe: ”Hit an hinendawinggen hundik halok he, an nen hit yi'nogo hilingiti logoino, ti'nogo hilingiti logoino, iluk yagahisikhi lagi mene andi hilingiti logogun o. 16-17A'nogo hilingitunem, hit lebethisikhi logolik, hinom mondok logobagaigen iluk, an nen neisena kino yagasumo, aren ap ekhe pelakhisa wesigin o. At andi ebe re, Allah Areagun ebe wene yagahisikhi logogin mene. A'nogo hinoba pelakhisa wesumo, it afuni kweangma mene nen, at andi ebe inonggorat. Nen, ebe ineilenggen hogoin legat, andi nen he, ebe wanugun elo'lego. A'nogo meneat he, hit enek he, at ebe hinom logolik, hinendawimo mondok logogin andi nen he, at ebe hinelu logogun o.

18An ogo re, hit hinebe yenggerugwi suarek mene hak herakhinobagaluk lagain lego. We, hobuk nambotkwe hisa wesigin aro. 19Ninenggi endebat logombik he, afuni kweangma mene ineilenggen neogoin mondok lek meneat he, hit enek he, an nelugat logogin. Nen hit hobuk hinelugat logogun andi nen he, hineilenggen neogoin o. 20A'nogo hineilenggen neogoin andi sambul, an neisena nemberek hundik welago, nen, hit an hinom hundik, nen, an hit ninom hundik welago mene andi, hinelu asigin o.

21At sa nen, an nen, yi'nogo hilingiti logoin o, ti'nogo hilingiti logoin o, iluk yagahisigi mene andi, nane hologo hilingiterek halok, an nebe endawinggen hundik mene at andi aro. Nen, neisena nen at andi endawinggen hundigat. Nen, an nen at andi nendawinggen hundik logolik, nebe futnobagauwageluk yagasigin o,” iluk yagaisasikhemo, 22ap Yudas Iskariot a'nogo fuk. Athe, Yudas hunogoat mene ekhe nen he, mel yagatikhe: ”Noe. hat hebe futhobagauwogeluk afuni mondogat yagaisigi'lek he, nit enek yaganisagain andi nenahalogen,” iluk yagati lagaikhemo, 23at Yesus nen he, mel yagaisasikhe: ”At sa nen an nebe endawinggen hundik halok he, nane hologo hilingiti logogin o. Nane hologo hilingiti logoumo, neisena nen at andi endawinggen hundik logogin o. A'nogo logolik, an neisena nemberek ap andi oba we'luk, at ninom mondok logogun o. 24Nen, at sa nen, an endawinggen hundik lek halok he, an nane hologo hilingiterek lek andi aro. An nane hit holhi lagep andi re, an nane mene fuk. We, an neisena laknobagai wagaikhe menen a'nogo ane o.

25-26Wene andi an nebe hit ninom logolik yagahisikhi lagi. Meneat he, an neisena nen at Areagun hit lebethisikhi logouwageluk, an nenuba pelakhisa wesumo re, aren yi wene ti wene mondogat yagahisigik, an nen yagahisikhi lagi mene andi mondogat ebehisigik, ikhi logogin o. 27Halok, hit hinendawinggen hambukhogo logouwageluk an nendawinggen hambukhogo welagirek mene wokhisaluk lagain o. Andi re, afuni kweangma mene nen wogisagarek hak wokhisagain lek andi nen he, hinendawinggen fiti logolik hinailo agubo.

28An lagain meneat he, hobuk nambotkwe hinoba wesigin o, iluk yagahisigi a'nogo arat hinesanggo holhep anggigi. An nebe hinendawinggen hundik logoilepma re, an neisena ebe esin, nen an nebe re elo'lek andi nen he, an neisena oba lagain andi faget hinagaiyek a'lebo. 29Wene mondogat yagahisigi andi ebe hilinglaga halok, hiren he, wene yaganisasikhe a'nogo arat hilinglaga yi, iluk futfembik, hinendawinggen an noba himbiret fobagaigeluk, wene andi ebe oan hilinglagi'lek werek kwelek, abok tak yagahisigi. 30Afuni kweangma mene inoe kain a'nogo ebe weri'logo andi nen he, an wene hokhorogat yagahisagain lego. At andi wesigin meneat he, an at enggiba welagi lego. 31A'nogo meneat he, an neisena nendawinggen hundik welagirek andi afuni kweangma mene inelu asuageluk, an neisena nen komorogo yaganeterek meneat hilingiti lagi o,” iluk yagaisasikhesik he, ”Nagoromi. Louwogen siakhogo menla'ni o,” iluk yagaisasikhe.

Currently Selected:

YOHANES 14: inohap

Highlight

Copy