YOHANES 15

At Yesus nen he, ”Hele anggur ero an nebe aro,” iluk yagaisasikhe wene

1At Yesus nen wene a'nogo yagaisasikhesik, hobuk ekhe mel yagaisasikhe: ”Hele anggur ero ebe mene re, an nebe aro. Nen ebe eisewerek he, an neisena aro. 2Hele enggisok ebe lombok, an noba hundik logolik enggen iti'lek halok, tekhogo lakfisagain o. Meneat he, enggisok ebe lombok enggen ite halok he, ekhe inomat iti logouwageluk wulfuk palogo wusa yogoligin o. 3Nen, hit he, an nen wene yagahisigirek andi nen he hinawulfuk hangge palogo wusa yogologo hinobagagimo welagebo. 4A'nogo hinawulfuk hangge palek welagep andi re, hit an ninom hundik, an hit ninom hundik logouwogo. Hele enggisok andi re, ebeba hundik lek halok, enggen isu mondok elo'lego. We ebeba hundik halok, enggen iterek andi hak he, hit an ninom hundik logogun lek halok he, fano mene hilingisu elo'lego. We, an nebeba hundik halogat, fano hilingisugun o.

5Hele ebe an aro. Nen, nenggisok hit aro. Hit an ninom hundik lek, we kobolek logolik, yi mene ti mene ekhe hilingisu mondok elo'lek andi nen he, at sa nen an nemberek hundik, nen, an at nemberek hundik, logogun halok he, at andi enggen hokhorogo isu hak, fano mene hokhorogo hilingisigin o. 6Nen, hele enggisok palogo lakfisagarek mene puk agunem he, afuni nen andogorogo fuluk endumo lakfisugunem endu ninggerek andi hak, at sa nen an nemberek hundik lek, kobolek logolik, a'nogoat palogo lakfoumo ebe endu nagain o. 7Hit an ninom hundik logolik nane hinendawimo werek halok, we, nena mene hit hinamolo mene an kino yaganesumo wokhisamo helogoin aro. 8Hit hinenggen hokhorogo isu hak fano mene hokhorogo hilingisugun halok, afuni nen an neisena fogerasugun o. Hit hinebe nagoromi ebe mene nane wanhi lagep mene logolik, a'nogoat hilingiti logogun o,” iluk yagaisasikhe.

9At Yesus nen wene a'nogo yagaisasikhesik ekhe mel yagaisasikhe: ”Neisena nen an endawinggen hundik welagarek andi hak, an nen hit nendawinggen hundik welagi o. A'nogo hit nendawinggen hundik welagi o. A'nogo hit nendawinggen hundik logoigen he, an ninom hundigat logoino o. 10Nen, an neisena nen, yi'nogo hilingi'no ti'nogo hilingi'no iluk yaganetikhe mene andi, an nen at ane hologo hilingitunem, aren an endawinggen hundik welagarek hak, hit a'nogoat an nen yi'nogo hilingi'no ti'nogo hilingi'no iluk yagahisikhi lagi mene andi, hiren an nane hologo hilingiti logogun halok he, an nen hit nendawinggen hundik logogin o. 11Nen, an nendawimo nagaiyek anggigirek hak, hit hinendawimo hinagaiyek hikhi logolik, hobuk hinendawimo hinagaiyek hokhorogo ikhi logobagaigen iluk, wene andi mondogat yagahisigi o. 12Hiren hilingiti logogun mene, wene ebe yiat komorogo yagahisak: An nen hit nendawinggen hundik welagi andi hak, hiren a'nogoat hit-hit nendawi-hendawirogo logobagaigen iluk yagahisigi o.#Yoh. 13:34, 15:17; 1Yoh. 3:23; 2Yoh. 5 13It ekhe inagaila'lak inom inendawinggen hundik welagaikharek andi re, we endebat hak meneat he, ap ekhe agaila'lak endawinggen hundigen it faget wa'lasigin andi nek he, mondok esin o. 14Nen, an nen komorogo, yi'nogo hilingi'no ti'nogo hilingi'no, iluk yagahisikhi lagi mene andi, nane hologo hilingiti logogun halok he, hit an nagaila'lak aro. 15It afuni inamingmingengge mene andi, inogogwi hilingitarek mene inonggot andi nen he, an nen huli yogondak yiba nen, hit an namingmingengge, iluk yagahisagain lego. Yi wene ti wene neisena nen yaganetikhe mene mondogat yagahisikhi lagi andi nen he, nagaila'lak, iluk yagahisikhi lagi andi o. 16Hiren an wena'nafigip fuk. We, an nen hit wenakhinafigi andi, e enggen iterek hak mondok logogin mene hilingiti logobagaigen iluk hinebe wenakhinafigisik menhinobagasigi. Andi nen he, we, nena mene, hit hinamolo mene an nenu hombuk palogo neisena kino yagasugun halok he, aren wokhisagain aro. 17Nen, an nen wene yagahisigi andi, ebe esin he, hit-hit nendawi-hendawirogo logoino, iluk yagahisigi andi aro,” iluk yagaisasikhe.

Yesus nen, ”Afuni kweangma mene nen inabit mondok hilinghinafi logogun,” iluk yagaisasikhe wene

18At Yesus nen wene a'nogo yagaisasikhesik, hobuk ekhe mel yagaisasikhe: ”It afuni kweangma mene nen inabit mondogat hilinghinafa halok he, omanggum an tak inabit mondok hilinginafukwa a'nogo hinendawimo ebe'no. 19Hit hinebe afuni kweangma mene logoilepma re, it afuni kweangma mene nen he, it he, nit ninagoromi, iluk inendawinggen hundik hilinghinabilep meneat he, hit hinebe it afuni kweangma mene were'ma wenakhinafigisik wokhinafisigi'mo re, hinebe it mene welagep fuk. Andi nen he, inabit mondok hilinghinabi'lagwi o. 20Nen, ap kain ekhe inawe a'ma hak werek kwelek, at amingmingengge mene esin hak welagarek lego, iluk yagahisasigi a'nogo hinendawimo ebe'ni o. Iren an weagetnafa halok he, hit a'nogoat weaget hinabugun aro. Nen iren an nane hologo hilingita halok he, hit hinane hologo hilingisugun aro.#Mat. 10:24; Luk. 6:40; Yoh. 13:16 21A'nogo meneat he, iren, at an laknobagai wagaikhe mene a'nogo ebe inonggot andi nen he, it yi at agoromi, iluk, wene yagahisigi andi mondogat hilinghinabugun o. 22An wagagisik, wene mondogat andi it yagaisigi'lek logoilema re, it weak iluk wene inoba fuluk logoilep lek anggigi. Meneat he, yogondak, wene yagaisa wagi andi nen, iren an weak hilingiti'lek, iluk, wene inoba mene nonggologoin elo'legat aga o. 23At sa nen an apsiri niikhe halok, an neisena ebeat apsirit fikhe o. 24It afuni fenakwe nen hilingitarek mondok lek mene, yi wene ti wene ineilhanem hilingiti lagagi a'nogo hilingiti logoile le'ma re, it weak, iluk ile lego. A'nogo meneat he, an nen wene andi mondogat hilingitunem ineilenggen neasukwasigen, an neisena nemberek inabiret ninobagali'lagwi o. 25A'nogo meneat he, Allah nen yi'nogo hilingi'no, ti'nogo hilingi'no, iluk komorinafikhe wene andiba, ane yi'nogo lisu palek werek: wene ero le'maat, iren an inabiret nobagasukwa, iluk isikhemo, lisu palogo fesukwa mene andi ebe asuageluk a'nogo hilingiri'lagwi o.#Mzm. 35:19, 69:5

26Hit lebethisikhi logouwageluk Allah Areagun ebe wene yagaisoageluk wagarek mene andi, an neisena were'ma nen hit hinoba lakfei wagunem he, aren an nabok fakhogo yagahisikhi logogin o. 27Aren an nabok a'nogo ugu kwelek, hit ogo re, an hit ninom attagen welagorek andi nen he, hiren fakhogo yagaisikhi logogun aro,” iluk yagaisasikhe.

Currently Selected:

YOHANES 15: inohap

Highlight

Copy