YOHANES 16

1At Yesus nen wene a'nogo yagaisasikhesik he, hobuk ekhe mel yagaisasikhe: ”Hit hinendawimo puk a'luk, At ebe ninabit, iluk, an nebe kofologo heraknobagainogo iluk, wene andi mondogat yagahisikhi lagi o. 2Afuni nen o samban agarek oba nen hit hinenggi lisogo wulak hinobagagunaro. Nen, hobuk it afuni hit hinoasugun mene inebe lombok inendawimo nen he, Allah faget fano inoato, iluk, ugun mene werek aro. 3Iren a'nogo hilinghinabugun andi re, an neisena nemberek ninebe inonggot andi nenat hilinghinabugun o. 4A'nogo hilinghinafa halok he, hinendawimo nen he, wene yi, aren attagat yaganisikhe a'nogo arat hilingninabi'lagwi yi, iluk hinendawimo ebesubagaigen iluk, wene andi mondogat yagahisigi o,” iluk yagaisasikhe.

Yesus nen, ”Allah Areagun nen yi'nogo hilinghinafi logogin,” iluk yagaisasikhe wene

At Yesus nen wene a'nogo yagaisasikhesik he, hobuk ekhe mel yagaisasikhe: ”An hit ninom yoma welago andi nen he, wene yi mondogat hit hinayonggo fikhi logolik yagahisigi'lek welagagi meneat he, 5hobuk, at an nebe laknobagai wagaikhe mene a'nogo oba lagain meneat he, hit ekhe nen, noe, hat o koma lagain, iluk noba heinok wo'niikhi lagep mondok lego. 6An nen wene yagahisigi andi nen, hit hinendawimo mondok weak aga meneat he, 7An nen wene ebe fakhogo yagahisago. An lagain lek logoilepma re, hit lebethisikhi logogin mene andi hinoba we'lep lek meneat he, an lagain andi nen nobali'mo at andi hinoba lakfei wesigin o. Halok he an lagain andi nen, hit faget fano mondok asigin, iluk eberogoat yagahisigi o. 8At andi ebe wesimbik he, it afuni kweangma mene nen hilingitarek mene faget fakhogo yagaisikhi logolik, hit hinendawimo ebeti lagep andi re, weak hilingitarek mene faget inom, higit hilingiti logogun mene faget inom, Allah nen wene inoba figik, kotik, ikherek mene faget inom, hinendawimo weak ebeti lagebo, iluk wene fakhogo yagahisa wesigin o. 9At wesimbik he, hiren hinendawinggen Yesus oba himbiret figi'lek welagep andi weak, iluk fakhogo yagahisa wesigin. 10Nen, ekhe re, an neisena were'ma lagunem, hit hineilenggen neogoin mondok lek andi nen, at lebethisikhi logogin mene andi wesimbik he, wene higithogo hilingiti logogun mene faget fakhogo yagahisa wesigin aro. 11Nen, ekhe re, Allah nen afuni kweangma mene inoe kain a'nogo wene oba fikhesik mabenet fikhemo werek andi nen, at lebethisikhi logogin mene andi wesimbik he, Allah nen wene inoba figik, kotik, ikherek mene andi faget fakhogo yagahisa wesigin aro.

12An nen wene hokhorogo yagahisa meneat he, hit yogondak ya wanuba re elo'lego. 13A'nogo meneat he, Allah Areagun, ebe wene ikherek mene andi wesimbik he, kwe inonggotma inelu mene nen yagaisagarek andi hak, ebe wene mondogat futfobagaigen iluk yagahisikhi logogin o. A'nogo yagahisikhi logogin andi re, wene at endawimo nen wenggelogo ikhi logogin lego. We, at esanggo holherek mene nek ikhi logolik he, hobuk hilinglasigin mene yagahisikhi logogin aro. 14An nane yagahisikhi lagi mene andi, aren wanimbik he, hit yagahisikhi logogin andi nen an agaugwet nobagakhi logogin o. 15Yi mene ti mene neisena mene mondagat he, an mene andi nen he, Allah Areagun andi an nane wanimbik, hit yagahisikhi logogin iluk yagahisigi andi o,” iluk yagaisasikhe.

Yesus nen, ”Hinendawimo weak asumo hobuk hinagaiyek asigin o,” iluk yagaisasikhe wene.

16At Yesus nen wene a'nogo yagaisasikhesik, ekhe mel yagaisasikhe: ”Ninenggi endebat logombigen he, an nebe hineilenggen neogoin lego. A'nogo hineileggen niigi'lek hinenggi endebat ekhe logombigen, hobuk hineilenggen neogoin o,” iluk yagaisasikhemo inesanggo holhukwasik he, 17at agoromi ane wanhi lagaukwa mene omanogo fena nen, it-it wene ikhi logolik he, mel isukwa: ”Aren he, ninenggi endebat logombigen he, an nebe hineilenggen neogoin lego. A'nogo hineilenggen niigi'lek hinenggi endebat ekhe logombigen, hobuk hineilenggen neogoin o, igik, An neisena oba lagain, igik, ikhe andi, wene ebe ninggi'nogo mene faget ikhe anggegep? 18An nenggi we endebat logogin, iluk ikhe andi, ebe nenamene faget yaganisikhe anggegep? Nit he, futfogo mondok lego,” iluk isukwa. 19A'nogo isukwama, at Yesus nen: ”It yi wene an noba heinok wo'neowogeluk ili'lagwi higi,” iluk enegat futfisasikhesik he, mel yagaisasikhe: ”Nagaila'lak. Ninenggi endebat logombigen he, an nebe hineilenggen niigi'lek logogun o. Nen, hinenggi endebat ekhe logombigen hobuk an nebe hineilenggen neogoin o, iluk yagahisigi andi faget hit-hit ikhi lageba? 20Hobuk hit hinendawimo nen he li le aga logogun meneat he, it afuni kweangma mene inendawimo inagaiyek asigin o. A'nogo meneat he, hit hinendawimo weak logogun mene andi, hobuk fano agunem hinendawimo hinagaiyek hokhorogo asigin o, iluk eberogoat yagahisigi. 21He ekhe eak tasigin horokse'ma heinet weakhogo wasigin oba hokhorogo waterek meneat he, eak a'nogo arat takhikheresik he, neak arat takhigi, iluk endawimo agaiyek hokhorogo hikhi logolik he, heinet weak waterek mene a'nogo onggot agarego. 22Hit a'nogoat, yogondak hinendawimo weak welagep meneat he, hobuk an ninom ambi asugun andi sambul, hinendawimo hinagaiyek asugun o. Hit hinendawimo hinagaiyek andi, it afuni ekhe nen legetfisogoin mondok lego. 23Huli andi huli arat asi lambik he, hiren wene ekhe an noba heinok wo'neogoin mondok lego. Halok, an nen wene ekhe yagahisak: Hiren yi mene ti mene an nenu hombuk palogo neisena kino yagasugun halok he, aren wokhisagain aro, iluk eberogoat yagahisigi. 24O attagaren huli yogondak huli, an nenu hombuk palogo yi mene ti mene ekhe kino igi'lek welagepma o. Halok he, hinendawimo hinagaiyek hokhorogo asubagaigen he, at kino yagati logoino. A'nogo yagati logoumo, wokhisikhi logogin aro,” iluk yagaisasikhe.

Yesus nen, ”Kweangma mondogat mabenet fisigi,” iluk yagaisasikhe wene.

25At Yesus nen wene a'nogo yagaisasikhesik ekhe mel yagaisasikhe: ”Wene mondogat andi re, oba lirogo nek yagahisikhi lagi meneat he, hobuk neisena abok ikhi logolik, oba lirogo yagahisagain lego. We, fakhogo nek yagahisagain oba werego. 26-27Hiren he, Yesus ebe Allah were'ma nen wagaikhe mene, iluk futnobagakhi logolik, hinendawitnafigip andi nen, neisena nen hit endawithinaferegaro. Hit faget an nen neisena kino yagasigin iluk yagahisikhi lagi lego. We, o andi sambul he, hit hinonggwaregen an nenu hombuk palogo neisena kino yagasugun o. 28An nebe Allah were'ma nen afuni kweangma mene inoba pi wagagi meneat he. Yogondak it kweangma yoma fisaluk neisena oba nambotkwe lagagin o,” iluk yagaisasikhemo, 29at Yesus agoromi ane wanhi lagaukwa mene omanogo nen he, mel yagatukwa: ”Noe. Yogondak haren wene oba lirogo yaganisigi'lek. We, fakhogo nek yaganisegen o. 30Hat he, afuni nen wene ekhe heinok wokhiigi'lek halok he, wene ebe honggot fugo. Hat he yi wene ti wene mondogat helu nek heogo o. Hat hebe eberogoat Allah nen lakhobagai wagaikhemo wagagin, iluk yogondagen futhobagago,” iluk yagatukwa.

31A'nogo yagatukwama, at Yesus nen he, ”Yogondagen arat futnobagageba?” iluk yagaisasikhe. 32A'nogo yagaisasikhesik he, ekhe mel yagaisasikhe: ”Hit mondogat pugulogo wulakhinobagaumo, an namu nek heraknobaluk hinawilokwe lombok pugulugun oba oan welago meneat he, yogondak arat asi waga o. Hit a'nogo pugulumo, an neisena nemberek logogun andi nen he, nalegat logogin lego, iluk eberogoat yagahisigi,” iluk yagaisasikhesik, 33ekhe mel yagaisasikhe: ”Hit an ninom hundik logolik, hinendawinggen hambukhogo logobagaigen iluk, wene andi mondogat yagahisigi o. Hit hinebe kweangma logolik yi enggin ti enggin hikhi logogun o. Mene re, kweangma mene mondogat mabenet fisigimo werek andi nen he hinailo lekhogo logoino o,” iluk yagaisasikhe.

Currently Selected:

YOHANES 16: inohap

Highlight

Copy