YOHANES 17
17
At Yesus nen agoromi faget samban isikhe wene.
1-2At Yesus nen wene a'nogo yagaisasikhesik he, at ot legeisogo eilenggen pogoroba liakhasikhesik he, mel isikhe:
”Neisena. An hilingnabugun a'nogo arat horogasi waga o. Haren attagat afuni ekhe wo'netigin mene halok inebe lombok an hamlogo nen hilinginabumo ineluk mondok logouwageluk afuni mondogat nenggiba fesigin andi nen he, hat hebe esinet hobagaigen, an hamlogo esinet nobagaime o, neisena. 3It afuni nen he, Allah ami amuat eberogo fogerasu mene werek iluk, hebe inelu agik, nen an Yesus Kristus laknobagai wagenma wagi mene yi nebe inelu agik, ili'lagwi andi re, ineluk mondok welagaikharek ero andi aro. 4An nen o kweangma yi wene ti wene hilingisuageluk mennobagasigin a'nogo yabu ebe arat hilingiti lagarik, mondok higithogo hilingiti andiba nen esinet hobagagi o. 5Neisena. Kweang oan elalhi'lek logolik, nemberegat esin welagagu a'nogo mene yogondak hat were'ma andoma esinet nobagain o.
6Afuni kweangma mene haren attagat wo'netigin mene nek mondogat, hat hebe inelu asuageluk yagaisigi o. It inebe hat mene an wo'netenma andi nen he, iren hat hane hologo hilingitarego. 7Yogondak yi mene ti mene mondogat haren wo'netigin mene andi, iren he, Allah nenat wogetikhemo, iluk arat futfaga o. 8Wene haren yaganetigin mene omanogo it arat yagaisigimo, arat wanhasik, an faget ikhi logolik he, Allah nen lakfei wagama, at were'ma andoma nen eberogoat waga, iluk inelu agaikhasik he, nebe futnobagaga o. 9An nen samban ikhi lagi andi re, it afuni kweangma mene faget ikhi lagi fuk. We, it hat hagainafuri mene wo'neten mene andi nen, it faget samban ikhi lagi o. 10An mene mondogat he, hat mene aro. Nen, hat mene mondogat he, an mene aro. It hilingiri'lagwi andiba an esinet nobagali'lagwi o. 11Yogondak an he, kweangma yoma inukhogo logogin lego. We, hat hoba wesigin meneat he, it enek he, kweangma yoma logogun o. Hat weak hilingiti'lek tegelek mondok welagendek mene, Neisena. Nit nemberek ninebe misigat welagorek a'nogo hak, it a'nogoat inebe misigat logouwagen he, hat henu esin mene an salnafigin andiba, it ferinarek logoino, neisena. 12An it ninom yoma logolik he, it inebe longgoinogo iluk, hat henu mene an salnafigin a'nogoba, ferinarek were'ma, it ekhe longgo igi'lego. We, at andi longgo igin, iluk, hat hane isigin mene lisu palogo fesukwa mene a'nogo ebe asuageluk, longgo u hagat longgo ikhe.#Mzm. 41:10; Yoh. 13:18
13An nebe hat hoba wesigin meneat he, yogondak kweangma ya logolik, an nendawimo nagaiyek higirek andi hak, it inendawimo inagaiyek mondok anggoageluk, wene mondogat andi yagaheti o. 14Hat hane a'nogo it arat yagaisigi. Nen, an nebe kweangma mene fuk, andi hak he it ogo kweangma mene legat andi nen he, it afuni kweangma mene nen inabiret ninobagali'lagwi o. 15Haren, it afuni kweangma mene inanggele'ma nen it enek kigilogo woginabinogen iluk kino yagaheti lagi fuk. We, at weak mene a'nogo nen weagerinabigeluk inoba wagunem, haren kwelaginarek logoinogen iluk yagaheti lagi o. 16An nebe kweangma mene lek, andi hak he, it ogo, kweangma mene legaro. 17Hat hane ikhi lagen mene andi re, ebe wenearo. Nen, hane ebe wene andiba, it inebe hat honggwarek fagerat logouwagen wenagaisogo fisan o. 18Haren an nebe afuni kweangma mene inoba laknobagai wagagin a'nogo hak, an nen it a'nogoat afuni kweangma mene inoba lakfisigi o. 19It inebe hat honggwarek faget ebe weneba tegelek logouwageluk he, an it faget nebe tegelogo fisigirik welagi o.
20Neisena. It andi inalegat faget enek samban ikhi lagi fuk. Lego. It ekhe hunogoat mene, iren wene yagaisa logoin oba inendawinggen an noba eberogo himbiret fogoin mene inomat faget samban ikhi lagi o. 21Neisena, An nen kino yagaheti lagi yi re, mel iluk. An nen neisena hat nemberek hundik, nen, neisena haren an nemberek hundik welagorek andi hak, it a'nogoat inebe mondogat misigat logouwageluk kino yagaheti lagi o. A'nogo were'ma, it afuni kweangma mene nen ikhi logolik he, at andi re, eisena nenat eberogo nen lakfei wagaikhe higi, iluk futfouwageluk, it inebe nit ninom hundigat logouwogo. 22Nit ninebe misigat welagorek andi hak, it a'nogoat inebe misigat logouwageluk, an nebe haren esinetnafigin hak, an nen it arat esinet fisigi o. 23It eberogoat inebe misigat logouwagen he, it he an ninom hundik, nen hat he an ninom hundik logouwogo. A'nogo logogun halok, it afuni kweangma mene nen ikhi logolik he, At andi re, eisena nen lakfei wagaikhesik ebe endawinggen hundik welagarek andi hak, it inebe at, faget tegelek were'ma endawi hundik hilinginaferego, iluk inelu asimbik futfogoin o.
24Allah neisena, haren kweang oan elalhi'lek logolik, an nebe hendawinggen hundik welagagin andi nen he, fogethafi logouwageluk esinetnafigin a'nogo, it haren fageat wo'netigin mene omanogo ineilenggen neoageluk, o an logogin oba andoma, it ninomat logogun namolo o. 25Allah higithogo nek hilingiti lagen mene, neisena. It afuni kweangma mene hat hebe inonggot meneat he, an enek he, hat nelu o. Nen, it haren wo'netigin mene nek he, Aren lakfei wagaikhe iluk, inelu aro. 26Neisena, haren an hendawitnafigin a'nogo, it-it a'nogoat nendawi-hendawirogo logolik, an nebe it ninom hundik logouwogeluk, hat henu iluk hawene yagaisikhi lagirik ekhe inomat yagaisikhi logogin aro,” iluk samban isikhe.
Currently Selected:
YOHANES 17: inohap
Highlight
Share
Copy
Want to have your highlights saved across all your devices? Sign up or sign in
