YOHANES 18
18
Yesus ebe fakfesukwa wene
(Mat. 26:47-56; Mrk. 14:43-50; Luk. 22:47-53)
1At Yesus nen samban a'nogo arat isikhesik he, at agoromi ane wanhi lagaukwa mene omanogo at ebe inom wulibi lagaukwasik, i enu Kidron aik elikwe yabu e enggen nenggarek mene awi yagokwe wulifukwasik Yesus agoromi inomat andoma kwisukwa. 2At Yesus agoromi ane wanhi lagaukwa mene omanogo inenggi ekhe sambul lagik, ekhe sambul lagik, andoma andogosi laga lagaukwama a'luk he, at Yudas Yesus wasuageluk yonggo lagaikhe mene a'nogo yabu andi elu welagaikhe. 3A'nogo elu andi nen he, it ap Allah eisewerek inogogwi kaindek inom, it Farisi mene inomen he, inagoromi Allah awi kagalek welagaikharek mene inayonggo fuluk lakfisasukwama, at Yudas nen tentara Roma mene esa hokhorogo ekhe inom woginarek, sikhe inom, sige inom, yi esage ti esage inom, waluk andoma lagaukwa. 4Lagaukwama, at Yesus nen: ”An nebe hobuk yi'nogo hilingnabugun,” iluk mondogat elu welagaikhe andi nen, inoba wagaikhesik he, mel yagaisasikhe: ”Hit sa herarik wagep,” iluk yagaisikhi lagaikhemo, 5iren he: ”Yesus awi Nasaret mene a'naga herarik wago o,” iluk yagatukwama, at Yesus nen he, ”Andi nebe an aro,” iluk yagaisasikhe. A'nogo ugu kwelek, at Yudas Yesus wasuageluk yonggo lagaikhe mene a'nogo inera'lu mendek welagaikhe. 6Nen, at Yesus nen he, ”Andi nebe an aro,” iluk yagaisugunem he, it omanogo maminghogo inalele fat-fat laga logolik he, inalele tagaurogo warilik lagaukwa. 7A'nogo lagu kwelek, at Yesus nen hobuk ekhe inom mel yagaisasikhe, ”Hit sa herarik wagep,” iluk yagaisasikhemo, iren he, ”Yesus awi Nasaret mene a'naga herarik wago o,” iluk yagatukwama, 8at Yesus nen he, mel yagaisasikhe: ”Andi nebe an aro, iluk fageat yagahisigi anggigi. Hit anat hera'nabik wagep halok he, an nagoromi yoma re, loagen hebisani o,” iluk yagaisasikhe. 9A'nogo yagaisasikhe andi re, oan hilinglagi'lek werek kwelek fageat, at Yesus nen Allah yagati logolik he: ”Allah neisena, afuni haren wo'netigin mene omanogo ekhe longgo igi'lego,” iluk isikhe mene a'nogo ane ebe asuageluk a'nogo yagaisasikhe andi. 10A'nogo yagaisugu kwelek, at Simon enu ekhe Petrus agarek a'nogo enggarok weim yafarek mene andi sambul fisogo were'ma lisogo wanhikhesik he, ap enupogot Allah eisewerek mene amingmingengge enu Malkus andi esanggo ebekwe sabelogo lakfesikhe. 11A'nogo lakfesikhemo, at Yesus nen he, mel yagatikhe: ”Petrus. Henggarok obali'mo hou a'ma kwelakfakhan o. Afuni nen i hinago wogisugunem nenggarek andi hak, an neisena nen, hat yi enggin ti enggin hilinghabugun o, iluk yaganetikhe mene andi higithogo, an hilingnafunem elo'lek anggegen a? Lego. Hilingnabugunaro,” iluk yagatikhe.#Mat. 26:39; Mrk. 14:36; Luk. 22:42
Yesus enggi hele warogo waluk ap enu Hanas oba wagaukwa wene
12Wene a'nogo iluk isikhemo re, it ap tentara mene esa hokhorogo omanogo inoe kain ekhe inomat, nen it ap Yahudi mene Allah awi kagalek welagaikharek mene inomen he, at Yesus ebe fakfesukwasik, enggi hele watukwa. 13Enggi hele warogo attak ap Hanas oba waluk wagaukwa. Ap Hanas andi ebe re, it ap Allah eisewerek mene inoe kain tahun andiba welagaikhe mene enu Kayafas andi eamal. 14At Kayafas andi ebe re, attagat it ap Yahudi mene yagaisikhi logolik he, ”We, nit mondogat faget ap misik agun ekhe wa'lasigin andi re, fano o,” iluk komorinafikhe mene a'nogo.#Yoh. 11:49-50
At Petrus nen, ”An nebe Yesus agot fuk,” iluk labelhikhe wene.
(Mat. 26:69-70; Mrk. 14:66-68; Luk. 22:55-57)
15-16A'nogo waluk wagaukwama, at Simon enu ekhe Petrus agarek a'nogo nen, at Yesus agoromi ane wanhi lagaukwa mene ekhe inom Yesus ombo'ne wagaukwa. A'nogo wagaukwasik, at Petrus nek he, leget abel enda'ma kweba werek kwelek, at Yesus agot ekhe andi re, ap Allah eisewerek inoe kain a'nogo nen ebe elumo andi nen he, at Yesus emberek ap kain andi awi silimo kwisukwa. Kwisukwasik he, at Yesus agot, ap Allah eisewerek mene inoe kain nen ebe elu mene a'nogo, hobuk ambotkwe wulibi wagaikhe. Wulibi waga logolik, helenggerek kweba afuni wulifik kwigik ugunem kagalek welagarek mene andi emberek wene ane isukwasik he, Petrus waluk kwisikhe. 17A'nogo waluk kugunem, at helenggerek a'nogo nen Petrus yagati logolik: ”Hat he, at yi agoromi ane wili'lagwi mene omanogo mene lek nogo? At agoromi mene aro,” iluk yagatikhemo, at Petrus nen he, ”An he, lego,” isikhe. 18A'nogo isikhesik werek kwelek, o andi sambul he, sogoi hokho agaikhemo, it inamingmingengge mene inom, it ap Allah awi kagalek welagaikharek mene inom, endu nonggwal fesukwasik he, mendek logolik sogoi sakhikhi logolik were'ma, at Petrus inoba lagaikhesik inomat sogoi sakhikhi logolik mendek welagaukwa.
Ap Allah eisewerek mene inoe kain a'nogo nen Yesus anema wanhikhe wene.
(Mat. 26:59-66; Mrk. 14:55-64; Luk. 22:66-71)
19A'nogo sogoi sakhugunem, ap Allah eisewerek mene inoe kain a'nogo nen, at Yesus oba heinok wokhikhi logolik he, ”Hat hagoromi hane wili'lagwi mene andi sani? Nen, hat hane yagaisikhi lagen andi, ninggi'nogo nogo,” iluk oba heinok wokhasikhemo, 20at Yesus nen he, mel yagatikhe: ”An nen afuni kweangma mene wene yagaisikhi logolik he, fakhogo nek yagaisigirego. O it afuni Yahudi mene mondogat andoget fuluk samban agarek oba inom, Allah awi wuri'mo inom, andoma nek yagaisigirego. Wene hinagaisogo ekhe igirek mondok lek meneat he, 21an noba heinok wo'niikhi lagen andi nenahalok? An nen wene yagaisugunem it arat inesanggo holharesi'mo re, an nen wene yagaisikhi lagi mene andi, it ineluat werego. Halok he, it inoba heinok wogisan o,” iluk wene a'nogo ugunem he, 22ap Allah awi kagalek welagaikharek mene omanogo ekhe ebe andem mendek logolik, at enggi tap lambukhogo Yesus yei wati logolik he, mel yagatikhe: ”Ap Allah eisewerek mene inoe kain yi nen yagahetunem, haren wene a'nogo yagasu hak nogo? elo'lego,” iluk yagati lagaikhemo, 23at Yesus nen he, mel yagatikhe: ”An nane weak igi halok, wene weak igi mene fakhogo yaganom he! Nane higit igi mene fagerat, yei noaten andi, nenahalok,” iluk yagatikhemo, 24hobuk at Hanas nen he, at Yesus enggi hele warogo, ap Kayafas ebe ap Allah eisewerek mene inoe kain a'nogo oba waluk loageluk lakfei wagaikhe.
At Petrus nen, ”An nebe Yesus agot fuk,” iluk hobuk labelhikhe wene.
(Mat. 26:71-75; Mrk. 14:69-72; Luk. 22:55-62)
25A'nogo lakfei wagaikhemo wagaukwama re, at Simon enu ekhe Petrus agarek a'nogo endu nonggwale'ma aremnogoat sogoi sakhikhi logolik mendek were'ma, it afuni nen he, mel yagatukwa: ”Hat he, at agoromi ane wili'lagwi mene omanogo mene lek nogo? Hat at agoromi mene aro,” iluk yagatukwama, aren he, ”An lego,” iluk labelhikhe. 26Labelhi lagaikhemo re, ap Allah eisewerek inoe kain mene a'nogo amingmingengge mene ekhe, ap Petrus en esanggo sabelogo lakfesikhe mene a'nogo agailak ekhe nen he, ”Hat he, hebe at hinom yabu e enggen awi yagokwe were'ma neilenggen hiigi anggigi,” iluk yagatikhemo, 27at Petrus nen he, ”Lego,” iluk labelhikheat. A'nogo labelhu kwelek aremnogoat sue ayam ane isikhe.
Yesus waluk he, ap Pilatus wogosi wagaukwa wene.
(Mat. 27:1-2,11-14; Mrk. 15:1-5; Luk. 23:1-5)
28A'nogo hilingi'luk, sue ane isikhemo hup siakhogo at Yesus ap Kayafas were'ma nen, o wene inoba figik kotik agarek oba waluk lagaukwa. Waluk lagaukwasik he, Yesus enek oloba kwelakfesukwasik, ”Nit seni Paskah a'nogo mene ninggi logou ha'ma, ninabisak kumo re, nit ninebe weak fakhogo hanogo,” iluk he, o wene inoba figik, kotik agarek oba andoma kwigi'lek we o silimo kamo isukwa. 29O silimo kamo isukwama re, at Pilatus inoba wulibi wagaikhesik he, mel yagaisasikhe: ”Ap yi sani. Ap yi wene ninggi'nogo mene oba fegepsigen waluk wagep,” iluk yagaisasikhemo, 30iren he, mel yagatukwa: ”At yi weak hilingiti'lek logoilepma re, hat hoba waluk we'lo legaro,” iluk isukwama, 31at Pilatus nen he, mel yagaisasikhe: ”Ap yi waluk lambik he, hiren hilingiti lagep higithogoat hinonggwaregen wene oba figik, kotik, ino o,” iluk yagaisasikhemo, it ap Yahudi mene nen he, mel yagatukwa: ”Nit ninamu nen wene inoba fuluk inoasu elo'lek anggigi,” iluk yagatukwa. 32Inane a'nogo yagatukwa andi re, at Yesus nen wene fageat yagaisikhi logolik, ”An yi'nogo hilingnabimbik noasugun,” iluk ikhi lagaikhe mene a'nogo, it a'nogo hilingitukwama, at ane ebe agaikhe andi.#Yoh. 3:14, 12:32
33It Yahudi mene nen a'nogo yagatukwama, at Pilatus wene inoba figik, kotik agarek oba a'nogo ambotkwe kwisikhesik, at Yesus ane fakhasikhesik he, mel yagatikhe: ”Afuni Yahudi mene inoe kain Henupogot hara?” iluk yagatikhemo, 34at Yesus nen he, mel yagatikhe: ”Haren wene an nabok egen andi re, hat hendawimo nen kagalogo egen a? Athe, it afuni ekhe nen yagahetama nen egen a,” iluk yagatikhemo, 35at Pilatus nen he, mel yagatikhe: ”Wene yaganeten andi re, an nebe ap Yahudi mene nen yaganeten a? It ap honggwarek hogogwi hagoromi inom, ap Allah eisewerek inogogwi kaindek inom, inomen, hat hebe an wo'neta andi re, hat ninggi'nogo hilingitenma,” iluk yagatikhemo, 36at Yesus nen he, mel yagatikhe: ”An nen afuni nawe a'ma fisigirek andi re, afuni kweangma mene nen inawe a'ma fisagarek andi hak fuk. Lego. We, an nawe a'ma fisigirek andi re, kweangma mene logoilepma re, nagoromi nen an nebe it ap Yahudi mene wogisogoin lek iluk, nebe elele wo'nabuogeluk inom ilep meneat he, an nawe a'ma fisigirek andi kweangma mene lek andi nen he, elele wo'nabugun lego,” iluk yagatikhemo, 37at Pilatus nen he, ”Halok he, hat eberogoat kain Henupogot he a,” iluk ikhi lagaikhemo, at Yesus nen he, mel yagatikhe: ”An nebe kain Nenupogot hat egen andi aro. Andi fagerat an nen ebe wene abok fakhogo yagaisikhi logoigeluk nebe kweangma yoma pi wagagisik ta'lagagi o. Afuni wene ebe wene andi werekwe asi lagaikha mene nek inebe lombok an nane inesanggo holi'lagwi o,” iluk yagati lagaikhemo, 38at Pilatus nen he, ”Wene ebe wene andi nena wene nogo,” iluk yagatikhe.
Yesus ebe mondok wasuogeluk wene oba fesukwa wene
(Mat. 27:13-31; Mrk. 15:6-20; Luk. 23:13-25)
Wene a'nogo yagatikhesik he, at Pilatus hobuk ap Yahudi mene inoba wulibi wagaikhesik he, mel yagaisasikhemo: ”An nenat wene oba fegep mene pilingiti mene re, at weak ekhe hilingitemo higi mondok lego. 39A'nogo meneat he, seni Paskah ninggi logolik, ap hele warek mene ekhe hele fikhalhisoageluk kino yaganetunem, fikhalhisigirek a'nogo nen he, hit ap Yahudi mene hinoe kain Enupogot yi hele fikhalhisagain hinamolo a? Hinabira,” iluk yagaisasikhemo, 40iren inane hokhorogo pak silak ikhi logolik he, mel yagatukwa: ”Lego. At andi hele fikhalugun lego! We, at Barabas andiat hele fikhalnisan o” iluk isukwa. At Barabas andi re, obabut weak enggi abisak wanhi lagaikhe mene fagerat isukwa.
Currently Selected:
YOHANES 18: inohap
Highlight
Share
Copy
Want to have your highlights saved across all your devices? Sign up or sign in
