YOHANES 19
19
1A'nogo isukwama re, at Pilatus hobuk kwisikhesik Yesus yei wasuageluk wogisasikhe. 2A'nogo wogisasikhemo, it ap tentara mene nen ap kaindek mene kware-kware ikfisagarek andi hak, alok weak mene maserogo Yesus ungguloba puget figik. Su elonggenggen kibi-kibi warek hangge kaindek labetfisagarek mene labetfigik isukwa. 3A'nogo isukwasik he, inebe hokhorogo peterogo kwikhi logolik he mel yagatukwa, ”Afuni Yahudi mene inoe kain Enupogot a'nogo harat higi o, wi?” iluk yagati logolik yei elokhenggen inenggi tap wati lagaukwa.
4A'nogo wati lagaukwama, at Pilatus a'nogo hobuk it ap Yahudi mene isa wulibi wagaikhesik he mel yagaisasikhe: ”Ap yi sani. Yethani! At wene oba fegep mene pilingiti menere, at weak ekhe hilingitemo higi mondok lek mene andi hit hinelu asubagaigen iluk wulakhisa wagi o,” iluk yagaisasikhemo, 5at Yesus alok mene kware-kware hak a'nogo ungguloba puksegengge, asu elokhonggen kibi-kibi warek hangge a'nogo uguat, wulibi wagaikhemo, at Pilatus nen he, ”Ap ari hineilenggen yet hani!” iluk yagaisasikhemo, 6it ap Allah eisewerek mene inogogwi kaindek inom, it ap Allah awi kagalek welagaikharek mene inom, Yesus ineilenggen hasukwasik inane hokhorogo paksilak ikhi logolik he, ”At ebe eba menfembik wa'no o! Eba menfembik wa'no o!” iluk inane ninghogo yagatukwama re, at Pilatus nen he, mel yagaisasikhe: ”An nen, at weak hilingite mene ekhe higi mondok lek andi nen he, hit hinonggwarek hinoba lombogen at ebe waganogo eba menfembik wa'no o,” iluk yagaisasikhemo, 7it ap Yahudi mene omanogo nen he, mel yagatukwa: ”Aren ikhi logolik, An nebe Allah amlogo, isikhe andi nen, wene Allah nen komotninafikhe wene, niren hilingitorek andi higithogoat ebe wasu higit aro. Halok he, wasugun anggikhi lago,” iluk yagatukwa.
8Wene a'nogo yagatukwama, at Pilatus esanggo holhikhesik he, ebenagaik ailo mondok agaikhe. 9A'nogo ailo agaikhesik, Yesus waluk ambotkwe o wene inoba figik, kotik, agarek oba kwisikhesik, mel yagatikhe: ”Hat hawi ero o koma,” iluk yagatikhe meneat he, at Yesus nen onggo igi'lek kamo isikhe. 10Ane igi'lek kamo isikhemo, at Pilatus nen hobuk mel yagatikhe, ”Hat an nemberek wene ane u habira? Hat hele fikhalogo herakhobagagin inom, nen, eba menhobagambik hoasigin inom, anat eise welagi andi, hat honggora?” iluk yagatikhemo, 11at Yesus nen he mel yagatikhe: ”At Allah nen he, Haren wene afuni inoba figik, kotik, ikhi logoino, iluk hat eisewerek fagailep le'ma re, haren wene noba fagain elole'k aro. Andi nen he, Haren weak hilingiten, iluk wene hoba endebat hak werek meneat he, at ekhe nen an nebe waganogo hat henggiba nobagai waga mene andi nek he, weak hilingite iluk wene hokho mene hak oba werego,” iluk yagatikhemo, 12at Pilatus esanggo holhikhesik he, Yesus hele fikhalogo feigeluk walhasikhe meneat he, it ap Yahudi mene omanogo inane hokhorogo paksilak ikhi logolik he, mel yagatukwa: ”Ap sa nen, An nebe kain Nenupogot, iluk onggwaregen ikhe halok he, ap Kaisar endawimo seramet fikhe ugun. Halok he, haren at ari hele fikhalogo wulakfagain halok he, hat ap Kaisar hemberek enggawe mene lego. Palek mene heogoin o,” iluk yagatukwama,
13at Pilatus esanggo holhikhesik, Yesus ebe waluk wulibi wagaikhesik he, o sili enu Helep ma. It afuni Ibrani mene inaneba re, enu Gabata ikhi lagaukwaba andoma e talek oba hurek logolik wene inoba figik kotik agarek oba hu'lagaikhe. 14Hu'lagaikhe andi sambul he, ohealekwe seni enu Paskah a'nogo nilik louwogeluk, yi mene ti mene andogorogo fugu kwelek, jam 12 hangge lingge tulem hu'lagaikhe. Hu'lagaikhesik, afuni Yahudi mene mel yagaisasikhe: ”Ap yi sani. Ap yi hit hinoe Enupogot yi hineilenggen hani!” iluk yagaisasikhemo, 15iren inane ninghogo paksilak ikhi logolik he, ”Ebe wa'no! Wa'no! Eba menfembik wa'no o!” isukwama, at Pilatus nen he, mel yagaisasikhe: ”An nen hit hinoe Enupogot yi eba menfembik wasuak anggikhi lagep?” iluk yagaisasikhemo, it ap Allah eisewerek inogogwi kaindegen he, mel yagatukwa: ”Nit ninoe enupogot ekhe lek. We, Kaisar alegaro,” iluk yagatukwama, 16at Pilatus nen Yesus ebe eba menfuluk wasuageluk wogisasikhe. A'nogo wogisasikhemo re, Yesus ebe waluk wulifukwa.
Yesus eba menfuluk watukwa wene
(Mat. 27:32-44; Mrk. 15:21-32; Luk. 23:26-43)
17Waluk wulibi wesuogeluk he, e Yesus ebe menfuluk wasugun mene a'nogo onggwaregen waluk loageluk omoloba fesukwasik, tom nit ninaneba re, enu inungguloak palek punuba u hak, it afuni Ibrani mene inaneba re, enu Golgota agarek oba andi wulibi wagaukwa. 18Wagaukwasik he, andoma Yesus ebe eba tulem menfesukwasik he, it ap ekhe hunogoat mene inom esanggo fena-fena menfisasukwa. 19A'nogo menfisasukwama re, at Pilatus nen he, lisu mel iluk palhikhe: ”Yesus awi o Nasaret mene afuni Yahudi mene inoe Enupogot,” iluk lisu palogo wogisasikhemo re, e Yesus menfesukwa mene a'nogo wurep oba to'morogo fesukwa. 20Lisu andi re, afuni Ibrani mene inom, Roma mene inom, Yunani mene inom, inaneba palogo fesikhemo were'ma re, o sili hokhoma nen he, Yesus eba menfuluk watukwaba andoma yatma fuk. We, horogat andi nen he, afuni Yahudi mene hokhorogoat lisu palek a'nogo enu salhi lagaukwa. 21Lisu a'nogo palhikhemo, it ap Allah eisewerek inogogwi kaindegen Pilatus mel yagatukwa: ”Afuni Yahudi mene inoe enupogot iluk, lisu palu fugo. We yi'nogo palin. Ap yi nen ikhi logolik, An afuni Yahudi mene inoe Nenupogot ikhe, iluk palin o,” iluk yagatukwa meneat he, 22at Pilatus nen he, mel yagaisasikhe: ”An lisu palhi mene andiat palek logouwago!” iluk yagaisasikhe.
23A'nogo yagaisasikhemo, it ap tentara mene nen he, Yesus ebe eba menfesukwasik he, asu nonggolek inebe lombok misiktek-misiktek sumburogo asuogeluk, su ebe 4 oba nen minggilogo fesukwa. Nen, asu endakwe mene kwatukwa mene fuk. Athe, pikhit uan kwatukwa mene laberek welagaikhe mene heluogeluk he, 24it-it ekhe nen ekhe yagaisikhi logolik he, ”Su yi tilibesugun lego. We sa hak helagain iluk oagengge walhouwogo,” iluk isukwa. A'nogo isukwa andi re, Allah ane lisu palogo fesukwama mene yi'nogo werek:
”An nasu nonggolek sumburagasik he,
nasu endakwe mene heluogeluk oagengge lakfaga o,”
iluk isukwa mene lisu palogo fesukwa mene werek higithogoat, it ap tentara mene nen a'nogoat hilingitukwama ebe agaikhe andi.#Mzm. 22:19
25A'nogo hilingitu kwelek, Yesus agaisa inom, agaisa agot inom, he Maria ap Klopas agwe inom, he Maria awi o Magdalena mene a'nogo inom, e Yesus ebe menfesukwaba era'lu mendek welagaukwa. 26At agaisa inom, agoromi ane wanhi lagaukwa mene ekhe endawinggen hundik mondok welagaikhe mene a'nogo inom, era'lu a'nogo mendek were'ma eilenggen isikhesik, at agaisa yagati logolik he, ”He yi nagaisa, hat heak ari aro,” iluk yagatikhesik, 27at agot a'nogo yagati logolik he, ”Nagot. Hat hagaisa ari aro,” iluk ugu kwelek aremnogoat Yesus agaisa a'nogo, at agot a'nogo ouwa'ma logouwageluk awiba waluk lagaikhe.
Yesus ebe wa'lagaikhe wene
(Mat. 27:45-56; Mrk. 15:33-41; Luk. 23:44-49)
28A'nogo arat hilingitukwasik oba nen, at Yesus endawimo nen he, ”Yi wene ti wene mondogat arat elugun warogo hilingiti,” iluk elu a'nogo nen he, Allah ane lisu palogo fesukwa mene higit asuageluk, ”An i nele,” isikhe.#Mzm. 22:16, 69:22 29A'nogo isikhemo, andoma iwak anggur enggen amusu ale weak mene hinago were'ma, hali esinggen hangge mene sobalogo eba tokhogo Yesus ambeba fesukwa. 30A'nogo wogetukwama, enduk mikhasikhesik he, mel isikhe: ”Arat hilingiti o!” iluk isikhesik, ot soma isikhesik he, ebe arat wa'lagaikhe.
Yesus abelenggenma sige taukhogo watukwa wene
31Andi sambul he, ohealekwe inenggi sabit oba Allah faget weat logouwogeluk isukwa. Meneat he, inenggi sabit oba Allah faget weat hundik-handik welagaikharek hangge fuk. We, hunogoat esin mene logouwogeluk a'luk he, mel isukwa: ”Ninenggi Allah faget weat werek kwelek it inebe eba menfisaga mene andi warek eba mondok logou re, ninabit,” iluk, ap warek andi inoak sombologo fuluk, kobokhogo pelakfei wesuogeluk, it ap Yahudi mene nen, at Pilatus kino yagasi lagaukwa. 32A'nogo kino yagasi lagaukwama, it ap tentara mene omanogo wagaukwasikhe, it ap Yesus inom eba menfisasukwa mene omanogo ekhe eisok sombologo figik, ekhe eisok sombologo figik, isukwa. 33A'nogo hilingitukwasik he, Yesus ineilenggen kumuthasukwa re arat wa'lagaikhemo hasukwasik he, eisok sombolhi'lek herakfesukwa. 34A'nogo herakfesukwa meneat he, ap tentara omanogo mene ekhe nen he, Yesus abelenggenma sige taukhogo watikhemo, elelekwe amep inom, i inom, wulibi wagaikhe. 35A'nogo hilinglagaikhe mene andi, hit futfobagaigeluk, ap ekhe eilenggen welagaikhe mene nen wene andi abok fakhogo ili'logo. Nen, aren ogo re, ”Eberogoat neilenggen furogoat higirik abok fakhogo yagaisigi,” iluk, at elu aro. 36Wene a'nogo hilinglagaikhe andi re, Allah aneba lisu mel iluk palogo fesukwama werek: ”At oak sombolugun mondok lego,” iluk isukwa.#Kel. 12:46; Bil. 9:12; Mzm. 34:21
37Nen, ekhe re: ”At ebe sige taukhogo watfuluk ineilenggen logogun,” iluk, isukwama Allah aneba lisu palogo fesukwa mene were'ma higit asuageluk a'nogo hilingitukwa andi.#Za. 12:10; Why. 1:7
Yesus ebe warek oumo fei lagaukwa wene
(Mat. 27:57-61; Mrk. 15:42-47; Luk. 23:50-56)
38A'nogo hilingitukwama, ap Yusuf, awi o Arimatea mene, Yesus agot agaikhesik meneat he, ap Yahudi mene ailo nen he, ane hinagaisogo wanhi lagaikhe mene andi nen, Yesus warek wanigeluk ap Pilatus kino yagasi lagaikhe. A'nogo kino yagatikhemo, at Pilatus nen he: ”Io. Fano,” iluk yagatikhemo, at Yusuf en Yesus warek a'nogo wani wagaikhe. 39A'nogo wani wagaikhemo, at Nikodemus, attagat hubanggo Yesus oba wagaikhe mene a'nogo nen, e mur enggen amusu inom, e ekhe amusu amben fano mene inom, nanggelek-hanggelek hilingisogo enggin he 30 kilo hangge waluk Yusuf emberek wagaukwa.#Yoh. 3:1-2 40Emberek a'nogo wagaukwasik he, it afuni Yahudi mene nen warek salinafarek hagat amusu warogo su kut meneba yinggilogo fesukwa. 41At Yesus eba menfuluk watukwaba era'lu andoma e enggen yabu ekhe welagaikhe. Yabumo andoma oumo kerat anggwe folelogo fesukwasik warek ekhe fisigi'lek mene ekhe welagaikhe. 42A'nogo were'ma, ohealekwe re. it afuni Yahudi mene inenggi sabit oba Allah faget weat logouwogeluk, oumo a'nogo horogat andi nen he, warek a'nogo oumo andi fei lagaukwa.
Currently Selected:
YOHANES 19: inohap
Highlight
Share
Copy
Want to have your highlights saved across all your devices? Sign up or sign in
