YOHANES 20

Yesus ebe eluk agaikhe wene

(Mat. 28:1-8; Mrk. 16:1-8; Luk. 24:1-12)

1Warek a'nogo fesukwama nen, o hari Minggu ba, at he Maria awi o Magdalena mene a'nogo o mum werek kwelek hup siakhogo warek oumo fesukwaba a'nogo wagaikhesik eilenggen kwelakhasikhe hak he, kwe helep yagarogo fesukwa mene a'nogo, lenggakhogo lakfesukwama kwe hurik were'ma hasikhe. 2A'nogo weregen eilenggen haluk he, fungusek mondok ap Simon enu ekhe Petrus agarek a'nogo inom, Yesus agoromi ane wanhi lagaukwa mene ekhe at endawinggen hundik mene a'nogo inom, inoba lagaikhesik he, mel yagaisasikhe: ”Afuni nen ninoe Enupogot warek oumo nen waluk wulifasik koma fei lagaikha heatma re, nit ninendawinggen nonghong ikhe o, nerugwi,” iluk a'nogo yagaisasikhemo, 3at Petrus inom, Yesus agot ekhe a'nogo inom, emberek warek oumo fesukwaba a'nogo wagaukwa. 4A'nogo emberek misikwe fungusek wagaukwa meneat he, at Yesus agot ekhe a'nogo nen, at Petrus hobuget fisaluk he, at attak weak-weak oumo fesukwaba a'nogo wagaikhe. 5A'nogo arat wagaikhesik, oumo warek fesukwaba a'nogo ot soma iluk eilenggen sorogo kwelakhasikhe hak he, su kut mene a'nogo nek nonggolek kweangma were'ma eilenggen hasikhesigat he, ebe oumo elema kwigi'lek kamo isikhe. 6A'nogo kwigi'lek were'ma, at Simon enu ekhe Petrus agarek a'nogo hobuk at ombo'ne waga lagaikhesik pikhit at warek fesukwaba elonggoma kwisikhesik eilenggen kwelakhasikhe re, su kut mene a'nogo nek nonggolek kweangma were'ma hasikhe. 7A'nogo meneat he, su Yesus ungguloba puksek mene nonggolek a'nogo nek he, su kut mene nonggolek welagaikheba aremnogo inom misi'mo welagaikhe lek. We ale'ma hak yinggilogo were'ma eilenggen hasikhe. 8A'nogo hasikhemo nen, at Yesus ane wanhi lagaukwa mene ekhe attagat warek fesukwaba lagaikhe mene a'nogo hobuk elonggoma kwisikhesik eilenggen kwelakhasikhe re mondogat a'nogo were'ma eilenggen hasikhesik, eberogoat iluk futfesikhe. 9At a'nogo eilenggen higi'le'ma re, attak it ekhe nen Allah ane lisu palogo fikhi logolik he, ”At ebe wa'lasimbigen hobuk eluk asigin aro,” iluk isukwama lisu palek werek mene andi it futfigi'lek welagaukwasigen, andi sambul at eilenggen hasikhesik enek he, futfesikhe andi. 10A'nogo futfesikhesigen, it Yesus agoromi ane wanhi lagaukwa mene emberek a'nogo inambotkwe oloba lagaukwa.

At Yesus ebe he Maria awi o Magdalena mene a'nogo eilenggen hoageluk elokhoma menlagaikhe wene

(Mat. 28:9-10; Mrk. 16:9-11)

11It a'nogo lagaukwa meneat he, at he Maria nek he, hobuk wagaikhesik warek fesukwaba a'nogo era'lu mendek logolik eilenggen kwelabek logolik le agu welagaikhe. 12A'nogo le aga logolik, eilenggen kwelakhasikhe hak he, Yesus warek fesukwaba a'nogo malaikat inebe pire inasu kut mene. At ekhe Yesus warek fesukwaba unggulkwe higit, nen, at ekhe eisokwe higit, hurek were'ma eilenggen isasikhe. 13A'nogo isasikhemo, iren he, mel yagatukwa: ”He yi nerei e. Hat nenahalok le aga lagen,” iluk isukwama, aren he, mel yagaisasikhe: ”An noe Enupogot warek afuni nen waluk o koma fei lagaikha heat ma re, an nonggoren le aga lagi o, nerugwi,” iluk yagaisasikhesik, 14eilenggen ambotkwe hebekhogo yethasikhe hak he, at Yesus ebe mendek were'ma eilenggen hasikhe meneat he, ”Andi Yesus ebeat,” iluk futfigi'lek, 15futfigi'lek were'ma, at Yesus nen he, mel yagatikhe: ”He yi nerei e. Hat nenahalok le aga lagen. Nen, hat sa herati lagen,” iluk yagatikhemo, at endawimo nen he, ”Ap yi yabu eisewerek mene kagalek welagarek mene higi,” iluk anggasikhe. A'nogo anggasikhesik he, mel yagatikhe: ”Noe. At ebe warek hat wanhendik waluk ekhema fei lagenma halok he, ebe o koma fei lagenma. An wani lagen he, yaganom o,” iluk yagatikhemo, 16at Yesus nen yagati logolik he, ”He Maria,” iluk yagatunem, Maria elokhe hebekhogo Yesus wogetikhesik he, nit ninaneba, ”Guru noe,” u hak he, it Ibrani mene inaneba re, ”Rabuni,” iluk hai watikhe. 17A'nogo hai watikhemo re, at Yesus nen he, mel yagatikhe: ”An nebe neisena oba lagagi'lek oan welagi andi nen he, henggi abirogo fetnarek logogun o. An nagoromi wene yi'nogo iluk, yagaisa Ian o, An inom, hit inom, nineisena Allah oba himbirik welagorek mene a'nogo oba lagaigeluk ikhi lagi, ikhe iluk nagoromi yagaisa Ian o,” iluk yagatikhemo, 18at he Maria a'nogo Yesus agoromi ane wanhi lagaukwa mene omanogo inoba lagaikhesik he, mel yagaisasikhe: ”Yi sani! Ninoe Enupogot an neilenggen arat haluk wagi o,” iluk, yagaisikhi logolik wene yagatikhe mene a'nogo pilingisogo yagaisa lagaikhe.

At Yesus ebe agoromi ane wanhi lagaukwa mene omanogo ineilenggen hoageluk inelokhoma menlagaikhe wene

(Mat. 28:16-20; Mrk. 16:14-18; Luk. 24:36-49)

19A'nogo yagaisa wagaikhemo nen, o hari Minggu welagaukwa andi sambul hubanggo at Yesus agoromi ane wanhi lagaukwa mene omanogo, it ap Yahudi mene inailo nen he, o ekhema misi'mo kwe mondogat kolok warogo kwisukwasik welagaukwa. A'nogo were'ma, at Yesus lagaikhesik inanggele'ma menlagaikhesik he, mel yagaisasikhe: ”Nagoromi. Hina'manggen lagup,” iluk a'nogo yagaisasikhesik, 20enggi inom, abelenggen inom, watukwa mene a'nogo agambut inugisasikhe. A'nogo inugisasikhemo ineilenggen hasukwasik he, ”Ninoe ebe aro,” iluk inendawimo inagaiyek hokhorogo agaukwa. 21A'nogo inagaiyek agaukwama, at Yesus nen wene ekhe inom hobuk yi'nogo yagaisasikhe ”Nagoromi hinalabok, hina'manggen lagup. An neisena nen laknobagai wagaikhe andi hak, an nen hit a'nogoat lakhinobagagin o,” iluk yagaisasikhe. 22A'nogo yagaisasikhesik he, eleage inoba furogo lakfikhi logolik he, yi'nogo yagaisasikhe: ”Allah Areagun helani o. 23Nen, hiren afuni weak hilingitarek mene sebelogo legetfisegep halok he, at Allah nen sebelogo legetfisagain aro. Nen, it afuni ekhe weak hilingitarek mene, hiren sebelogo legetfisegep lek halok he, at Allah nen sebelogo legetfisagain legaro,” iluk yagaisasikhe.#Mat. 16:19, 18:18

Yesus nen ebe watukwa mene sige anggwe ap Tomas inukhasikhe wene

24At Yesus ebe agoromi inelokhoma menlagaikhe andi sambul he, inebe nesanggo nen omanogo mene it fena nek were'ma. Nen, at Tomas enu ekhe Hulipmio mene agarek a'nogo ebe inom le'ma wagaikhe. 25A'nogo ebe le'ma a'luk he, it Yesus agoromi fenakwe nen he, mel yagatukwa: ”Tomas nagailak. Nit ninoe Enupogot a'nogo arat nineilenggen hogo,” iluk yagatukwa meneat he, at Tomas nen he, mel yagaisasikhe: ”An nen at enggiba posiemanggen wata mene anggwe neilenggen furogo higi'lek, nen agambut nenggi fakfigi'lek, abelenggenma sige anggwe kwe nenggi turn lakfigi'lek halok he, eberogoat iluk anggagain mondok lego,” iluk yagaisasikhe. 26A'nogo yagaisasikhesik oba nen he, inenggi 7 nen welagaukwasigen ekheba it Yesus agoromi ane wanhi lagaukwa mene omanogo Tomas inomat, o a'nogoat andogotukwasik, kwe mondogat kolok watfuluk welagaukwa meneat he, at Yesus wagaikhesik inanggele'ma menlagaikhesik he, mel yagaisasikhe: ”Nagoromi. Hinalabok, hina'manggen lagup,” iluk a'nogo yagaisasikhesik, 27hobuk at Tomas yagati logolik he, mel yagatikhe: ”Hat hendawimo nen eberogoat iluk hendawinggen noba himbiret figi'lek welagen andi hak logogun. Eberogoat iluk angganogen he, henggi fa'nealuk, nenggiba heilenggen niigik, nabelenggen sige anggwe henggi tum kwelakfigik, imbik he, hendawinggen noba eberogoat himbiret feino o,” iluk yagatikhe. 28A'nogo yagatikhemo, at Tomas nen he, ”Eige! Noe, hebe henupogot Allah at hiigi o,” iluk yagatikhemo, 29at Yesus nen he, yi'nogo yagatikhe: ”Hat he, heilenggen arat neegendigen eberogoat iluk hendawinggen noba himbiret fegen. A'nogo meneat he, it afuni ekhe ineilenggen niigi'lek meneat he, inendawinggen noba eberogoat himbiret fogoin halok he, inendawimo inagaiyek hogoin o, iluk eberogoat yagaheti,” iluk yagatikhe.

Buku yi ebe yi'nogo faget iluk lisu palhikhe wene

30At Yesus nen it agoromi ane wanhi lagaukwa mene nen at ebe futfouwageluk ineilhanem elalin hilingiti lagaikhe mene fena hokhorogoat hilingitikhe meneat he, buku yiba lisu palhikhe lek. 31A'nogo meneat he, lisu palek werek yi mondogat he, hiren he, Yesus andi Allah amlogo, nit afuni telninabuageluk wenagaisogo lakfei wagaikhe a'nogo eberogoat iluk futfuluk hinendawinggen at oba eberogoat himbiret fuluk At enu hombuk palhunem hineluk mondok logobagaigeniluk lisu palogo figi o.

Currently Selected:

YOHANES 20: inohap

Highlight

Copy