Popular Bible Verses from ROMA 2

Share

Tapulara mu Tuahhu-tuahhu mu miha ne do tao ne lai-lai do lii mu tado hala he pa ddau do wala! Ne penge ri mu, do ta ludu ke mu ngati dhara lua wolo Deo? We do ddhei ta bahhe ri mu ne lua ruba dhara Deo nga lua marai nge nga dhara No ne mina harre lema nga lua makka tee-makka wangnge No do mina harre ne worawwu mone-ae? Do tatu ke ta do toi ma ri mu ta do ne pedhelo ma ri Deo ne lua woie penge nga danni ade No, rowi do ddhei No mita ie ke mu ta jharra ngati lubhu harro nga menyilu mu.

Rowi do mina harre ke Tuahhu-tuahhu, nadu ke au dhe hakku ddhei au ta pebui hala pa ddau do wala? Bhule dho tuahhu nga ne nga-nga tu ta pemola-anni! Rowi ki pebui ke hala ri Tuahhu pa ddau do wala, jhe Tuahhu lema do tao ne wui ai-wui tao do mii do tao ri ro he, moko Tuahhu dhangnge ma ne do pebui lua wolo tu ngi'u au miha.

Rowi do hela'u we hari-hari ddau pa dhara namada Deo.

Rowi ne ddau do nara ta peie bhale wari nga Deo adho taga tari do toi ke ri ddau do naanne ne uku aigama Yahudi ne, tapulara taga tari do tao rowi no ne nga ne do hure do bhuke pa dhara uku do naanne.

Rowi do ta bhale ri Deo pa heddau-heddau pe dutu nga wui ai-wui tao no ma.

Tapulara ddau do pehenge nga ngi'u miha we, jhe do dho pedhanno nga Deo, do ddhei ta pedutu lua apa nga kedhaha he, ddau-ddau do dhai tarra Deo ne kkai-kena dhara nga ro.

Tapulara do dhai tarra mu ne keti-ketinga, jhe do dho wae ta lari-anni. Rowi do mina harre ke, ri mu ma miha ne do pemejanne ta perihi mejanni ne lua wolo tu mu pa Lodho Pedakka Rahi Raiwawa, kinga dhai ke Deo ta pedhelo ne lua paddhu nga kete bubu dhara No, jhe pebui ne lua wolo do dho i'a bibhi hebhakka ne.