Popular Bible Verses from YESAYA 55

Share

Ki TUHAN in noguman, “Raian-Ku in deemanbí raianmu, bo daḷan-Ku in deemanbí daḷanmu.

Ná kinoyoyayú in ḷangit nongkon butá, dá natua doman in koḷantud in raian-Ku nongkon raianmu, bo daḷan-Ku kon ḻimonik in daḷanmu.

Pobuidon kon i TUHAN kon dodai in mokopobuipa; pokuanidon kon i-Nia kon dodai in Sia nodiugpa.

Igumon mako intau inta moraat in monompiadon kon kobobiagnea, bo momaḷui kon pororainea. Biódon mako in sia in mobui mangoi kon i TUHAN, sinbá mokouḻí kon totabi-Nea. Igumon mako sinbá sia in mamangoi bui kon i Allah naton, sin ki TUHAN in mongampung takin pia in gina.

KI TUHAN in noguman, “Igaidon in moiko komintan inta morogang, ponginumdon, tubig in sinadiadon. Angoidon in moiko inta diá kodoit, tarimadon in gandum inta diábí uboḻian, bo kaandon! Anggur bo susu in sinadiadon, tarimadon mako diábí uboḻian.

Naonda bo uyan nongkon ḷangit, bo diá mobui monik, táe momuntadbí kon butá, mopoḷumbá bo mopobiag in pinomuḷa mita, mopomungai in inta pomuḷaan bui bo inta kaanon, natua doman in tosingogon inta siningog-Ku diábí mobui kon i-Nakó takin diá in mangaḻenea, táe mokoaid kon onu inta kinoibog-Ku, bo mokodapot kon bayongan inta imakusud-Ku.

Moiko in monaḷámai kon Babel takin pia in gina, bo inatod iḻumuai takin nosaḷamat. Buḷud bo tombuḷudnea in moḷunganga bo morogiow, pangkoi in kayu mita kon gobá in mononggoḷokap.

Indongogaidon, ei bangusa-Ku, angoidon kon i-Nakó, moiko in ogoian-Ku in kobiagan inta mononoi. Pinodoyon kon tabi bo kososatia inta pinodandi-Ku kon i Daud, Akuoi in notogot kon dandi mononoi takin i monimu.