Popular Bible Verses from Lucas 12

Share

Cafä wamacö ma cui, showadi wamacö nö daobä, ö̦jö lä. Wamacö bufi cuu mlao däjä, camiyä ya lä yanowamöblaleyoluno wei ya nia malä bädou wei —a cuma.

Ö̦jö täbä ja wamacö bufi cuaablalou mlai ja, Yai Bada tänö cama ebä nia ca̦i lä cuo wei tä ja, bä bufi shino dayäo da shalilio. Inaja wamacö bufi shaliliwä cudio ja, ö̦jö täbä ca̦i showawä ma cui ja, wamacö nia dobämou —Jesús a cuma.

Bä lä co̦camono wei bä nija abinaja a cuma. —Bä da moyaweicu, ö̦jö lä, täbä bufi waiyou si lä ijejeoblou weinaja, wamacö cuaaö dicoo mlaobä. Täbä madofi bluca ma doaöje däjä, ö̦jö tänö täbä dodijidawä cudio malä mlai —a cuma.

¿Ö̦jö tawä? Afä wama täbä yai lä bufibou wei täbä lä cule jamö, ö̦jamö lä wamacö bufi nia malä cadididalou wei.

Wamacö demi nia lä cuo wei, Yai Bada tänö tä daö fe wädöa waiquia. Wamacö bufi lä jalujublalou wei tänö, wiisibö ma cui wamacö nö nia dedejedou majöomi.

Cama ebä lä nocamabono wei bä nija abinaja Jesús a ca̦i cuma. —Ö̦jö cudeenö bämacö nowa taö lä cule. Eja dodijidawä wamacö nia lä bälöo wei tä ja, bä bufi jo̦lijo dijä. ¿Ö̦jö tawä? Nii bä ma cui jamö, camishi bä ma cui jamö, bä bufi cuaablalo dijä.

¿Ö̦jö tawä? Bä nofi jo̦lio dijä. Bei wamacö feta u̦cu ma cui, Yai Bada tänö wamacö feta u̦cu bluca daö. Bä quili dijä, ö̦jö lä. Biyomö bä nowa lä culenaja mlai, Yai Bada tänö cafä wamacö nowa yai blucabou.

Abinaja Jesús a cuma. —Bolacadabö oweja bä lä yododoblamou weinaja wamacö cuwä ma cui, bä quili dijä. Wamacö nö wa̦lojabimi ma cui, Faafänö cama ebä ca̦i nia lä cuo wei jamö wamacö yädämabou bufi malä doblale. ¿Ö̦jö tawä?

’¿Ö̦jö tawä? —a cuma—. Male sibä ja bä bufi da jaducublalu. Mobä döaö ma mlajei ma cui bä iyaö. Nii bä taö ma mlajei ma cui, mobä shi̦liqui shimomaö ma mlajei ma cui, Yai Bada tänö bä malä iyamaö wei. Ö̦jö bä nowa ma tabole ma cui, cafä wamacö nowa shino yai blucabou fe balojowä.

’Wamacö nia lä iyaö wei tä jamö bä bufi cuaablalo dijä, ö̦jö lä —a cuma—. Wamacö bufi jalujublalou dodijio mlai.

Caje caje bä cudio ma mlai ma cui, bä ö̦shömaö ma nocamou wejei ma cui, bei bä jole fa fanö, bä mömou dodijidaobä Yai Bada tänö bä bayeliblaö. Ö̦jö bä ma bayeliblaö wei ma cui, ¿camishi bä ja cafä bei wamacö nia shino bayeliblamou ayaomi daanö? Yai Bada wama a nofi bejedi mölaboimi showawä.

Tä a̦ fei däjä wäyämamou lä ja̦too wei, wawädowä tä a̦ nia wäyämamou malä nomöjöo wei. Tä a̦ lä jo̦yabou wejei, tä a̦ nia jödödöwä wawäblamou malä cui.