Lucas 12

Faliseo bä owämaö

lä wasöno wei tä a̦

1Inaja cama bä ma cuaaö däjä, Jesús nija bluca dodijiwä bä co̦camou fa cuaayolunö, bei bä mashicoma. ¿Ö̦jo tawä? Inaja bä mashicou cuaaö showai ja, cama ebä lä nocamabono wei bä nija a wa̦ faö fa balöonö, abinaja a cuma.

—Bä da moyaweicu. Faliseo bä bada lä cui etä julumamodima wayu. Jole jole bä dodijaö bäa —a cuma—. 2Tä a̦ fei däjä wäyämamou lä ja̦too wei, wawädowä tä a̦ nia wäyämamou malä nomöjöo wei. Tä a̦ lä jo̦yabou wejei, tä a̦ nia jödödöwä wawäblamou malä cui. 3¿Ö̦jö tawä? Ö̦jö cudeenö, tä mö lä didile jamö wamacö a̦ faö ma ja̦toono wei ma cui, wawädowä tä a̦ nia ji̦liamou nomöjöo. U̦eshi yafi jamö wamacö a̦ wajado ma fano wei ma cui, bluca bä nija tä a̦ nia wawädowä wäamamou nomöjöo.

4’Cafä bämacö lä nofimale bämacö nowa taö lä cule —a cuma—. Yanowamö täbä nö quili ta dijejä. Bei wamacö shäö ma cujei, wamacö bufi nia wa̦liaimi. 5Ma. Ya wa̦ nia wawädoo. Yai Bada a nö shino quili yai da taje. Wamacö shäö fa balöonö, shobali wacö jamö wamacö nia shäyäjaö nomöjöo lä dao wei a. Awei. Ö̦jö wama a nö shino quili yai tabä. ¿Ö̦jö tawä? Bämacö nowa taö lä cule.

6’Blada bolacabö cäcö wai ja, biyomö 5 bä däamamou talei. ¿Ö̦jö tawä? —a cuma—. Biyomö bä nowa bluca ma mlai ma cui, Yai Bada tänö bä nofi bluca jaducubou. 7¿Ö̦jö tawä? Bä nofi jo̦lio dijä. Bei wamacö feta u̦cu ma cui, Yai Bada tänö wamacö feta u̦cu bluca daö. Bä quili dijä, ö̦jö lä. Biyomö bä nowa lä culenaja mlai, Yai Bada tänö cafä wamacö nowa yai blucabou.

Cama ebä a̦fa wawädowä

wäamaö lä bufino wei tä a̦

8’Cafä bämacö nowa taö lä cule —Jesús a cuma—. Yanowamö täbä nija quilii mlai ja, iba bä a̦fa wäamou lä wawädoo wei bä lä cui, iba ya bä a̦fa nia ca̦i wawädowä wäadayou. Camiyä ya lä yanowamöblaleyoluno wei ya lä cuinö, Yai Bada a̦jele etäbä lä cule jamö, iba ya bä a̦fa nia wawädowä wäadayou.

9’Ö̦jö ma cui, yanowamö täbä nija iba bä a̦fa wäamou lä quilii wei bä lä cui, Yai Bada a̦jele etäbä lä cule jamö, ö̦jö ya bä a̦fa nia ca̦i wäyäimi mö feduo. 10¿Ö̦jö tawä? Camiyä ya lä yanowamöblaleyoluno wei, wale nö ma waiblaö wejei ma cui tä nowa nia mladou. Ö̦jö ma cui, Yai Bada a Bufi nö lä waiblaö wejei bä lä cui, etä nia mladoimi waiquiwä.

11’Judio bada bänö wamacö doblomi jömabeje, bä yododabä yafi bä jamö wamacö ca̦i nia jublou cuaaöje —a cuma—. Ai bä bada lä läblai bä nija ca̦i. Wamacö ca̦i juuje däjä, wamacö nofi nia lä bäyäo wei tä a̦ ja, bä bufi jo̦lijou dicoo dijä. 12Wamacö a̦ moyawe juobä, ö̦jö lä däjä showawä, Yai Bada tä Bufinö wamacö a̦ nia malä bälaö wei —a cuma.

A bufi jaducuwä lä

mlainö madofi bä nofi

lä yaibono wei tä a̦

13Ö̦jö däjä, bä lä co̦camono wei jamö ai a wa̦ falayoma.

—Tä a̦ wäyäle —a cuma—. A̦iwä nija a wa̦ da fa, fayä etäbä bluca lä jäblono wei täbä ja, wale dobäö mö feduobä —a cuma.

14Ö̦jö ma cui, abinaja Jesúsnö a nowa tama.

—Cafä wafäcö nija faafä ya etäbä sheleleblaö juobä wale läamanomije. Dodijidawä wafä etäbä shelelebou juobä yami —a nowa tama.

15Bä lä co̦camono wei bä nija abinaja a cuma.

—Bä da moyaweicu, ö̦jö lä, täbä bufi waiyou si lä ijejeoblou weinaja, wamacö cuaaö dicoo mlaobä. Täbä madofi bluca ma doaöje däjä, ö̦jö tänö täbä dodijidawä cudio malä mlai —a cuma.

16Ö̦jö däjä bä bufi dayäamabä, shominaja tä a̦ wäyäö yacläo co̦oma.

—A nö lä madofibö wei etäca ficali nö nijio fa dodijionö, 17abinaja a bufi cudaliyoma. “¿Wedinaja iba nii ya bä li taamabä? Ya bä nia lä shimomaö wei bä yafi cuami”, a bufi cudaliyoma. 18“Abinaja ya yai cuaabä”, a bufi cuu nomöjöoma. “Iba yafi ya bä wajaquemi fa wa̦lialönö, bada ya bä yafi nia yai i̦tamaö nomöjöo. Ö̦jamö lä iba madofi bä ma cui, iba nii bä ma cui, ya bä nia bluca nowamaö. 19Ö̦jö däjä, abinaja camiyä ya nowa nia shino yai tamamou. ‘Bei. Fei däjä dodijidawä ya bälödiobä, ya täbä bluca nowamöbou waiquia lä cule. Lasha bluca ya lalomaö co̦o ma cui, dodijidawä ya nia cuo shi wa̦lii. Fei däjä ya nia ojodamou co̦daaimi. Ya nia shino iyadii. Bufi doblalolanö yamacö iyabä, showadi ya bä nia nacadii. Fei däjä, ya nia yai dodijaö.’”

’Einaja a bufi cama cudaliyoma. ¿Ö̦jö tawä? —Jesús a cuma—. 20Einaja a bufi ma cuno wei ma cui, abinaja Yai Bada tänö a nowa tama. “¡Wa bufi nofi jaducuwämi dodijiwä yai!”, a nowa tama. “Fei tä didi showawä ma cui ja, bäfä bufi nia co̦aö. Ei wa bä bluca lä shimomalöfe, ai bänö bä nia ca̦i cuo juoje”, a nowa tama.

21’¿Ö̦jö tawä? —Jesús a cuma—. Inaja yanowamö täbä bluca cuaaö dicoo. Cama bä dodijidawä bälödiobä täbä ma nowamöbolajei ma cui, Yai Bada nija bä dodijidawä cuodayobä tä taboimije.

Täbä bufi lä wasöno wei tä a̦

22Cama ebä lä nocamabono wei bä nija abinaja Jesús a ca̦i cuma.

—Ö̦jö cudeenö bämacö nowa taö lä cule. Eja dodijidawä wamacö nia lä bälöo wei tä ja, bä bufi jo̦lijo dijä. ¿Ö̦jö tawä? Nii bä ma cui jamö, camishi bä ma cui jamö, bä bufi cuaablalo dijä. 23Wamacö demi lä cuo wei tä nowa yai bluca malä cui, nii wama bä lä waö wei bä nowa lä culenaja mlai. Bei wamacö nowa ca̦i bluca, camishi bä nowa lä culenaja mlai.

24’¿Ö̦jö tawä? —a cuma—. Male sibä ja bä bufi da jaducublalu. Mobä döaö ma mlajei ma cui bä iyaö. Nii bä taö ma mlajei ma cui, mobä shi̦liqui shimomaö ma mlajei ma cui, Yai Bada tänö bä malä iyamaö wei. Ö̦jö bä nowa ma tabole ma cui, cafä wamacö nowa shino yai blucabou fe balojowä. 25Wamacö demi nia lä cuo wei, Yai Bada tänö tä daö fe wädöa waiquia. Wamacö bufi lä jalujublalou wei tänö, wiisibö ma cui wamacö nö nia dedejedou majöomi. 26¿Ö̦jö tawä? Wamacö bufi lä jalujublalou wei tänö, ö̦jö wiisibö ma cui ja wamacö bayeliblamou daomi waiquiwä ja lä, ¿wedi tabä ai tä bluca ma cui ja, wamacö bufi nö nia jushublao buo?

27’¿Ö̦jö tawä? —a cuma—. Jole jole bä bäwä ma cui ja, ö̦jö bä ja, bä bufi da jaducublalu. Bä badaö. Bä ojodamou ma mlai ma cui, shinalu ubä juducaö ma mlajei ma cui, bä liyäjäwä. ¿Ö̦jö tawä? Bämacö nowa taö lä cule. Bada tä Salomo a nö ma madofiböono wei ma cui, camishi ebä ma dodijidaono wei ma cui, ei jole jole bä lä cui bä shino yai mömou liyäjäwä dodijiwä. 28Caje caje bä cudio ma mlai ma cui, bä ö̦shömaö ma nocamou wejei ma cui, bei bä jole fa fanö, bä mömou dodijidaobä Yai Bada tänö bä bayeliblaö. Ö̦jö bä ma bayeliblaö wei ma cui, ¿camishi bä ja cafä bei wamacö nia shino bayeliblamou ayaomi daanö? Yai Bada wama a nofi bejedi mölaboimi showawä.

29’Wamacö nia lä iyaö wei tä jamö bä bufi cuaablalo dijä, ö̦jö lä —a cuma—. Wamacö bufi jalujublalou dodijio mlai. 30Bluca bä bälöjöwä lä yaiblai bä lä cui, inaja cama bä bufi li bluca cuaablalou. Ö̦jö ma cui, wamacö lä jo̦li wei, Faafä a lä culadinö wamacö li daö waiquia. 31Ö̦jö täbä ja wamacö bufi cuaablalou mlai ja, Yai Bada tänö cama ebä nia ca̦i lä cuo wei tä ja, bä bufi shino dayäo da shalilio. Inaja wamacö bufi shaliliwä cudio ja, ö̦jö täbä ca̦i showawä ma cui ja, wamacö nia dobämou —Jesús a cuma.

Fedu jamö täbä

shimomaö lä bufino wei tä a̦

32Abinaja Jesús a cuma.

—Bolacadabö oweja bä lä yododoblamou weinaja wamacö cuwä ma cui, bä quili dijä. Wamacö nö wa̦lojabimi ma cui, Faafänö cama ebä ca̦i nia lä cuo wei jamö wamacö yädämabou bufi malä doblale. ¿Ö̦jö tawä? 33Wama täbä madofi lä tabole wama täbä fa nomöjöanö, blada bä da luluaje, bä nö lä bleaaö wei wama bä dobäbä. Inaja wamacö cuaalanö, ba̦limi tä ja afä täbä nowa yai lä bluca wei bä fa tablamodunö, eja wamacö cua ma showale ma cui bä nia shimomaö balöodayou. ¿Ö̦jö tawä? Fedu jamö wama täbä lä nowamöbou wei täbä nia mlaö majöomi. Täbä nia tomöaimije. Täbä ca̦i nia wädömamoimi. 34¿Ö̦jö tawä? Afä wama täbä yai lä bufibou wei täbä lä cule jamö, ö̦jamö lä wamacö bufi nia malä cadididalou wei.

Bä nö damabou lä

bufino wei tä a̦

35Abinaja Jesús a cuma.

—Jai wamacö a̦ juo showadaobä, bä nö daa da cuicu. Camishi acadafu wama bä fa̦yocomabou showale wamacö nö daobä. Cowa wama wacö luamaö mlai wama tä i̦tabou showaobä. 36Cäcöbö lä doayou wei cäcöbö nofi co̦camoabeje jamö bada a juu däjä, a nö dabou lä juo wejeinaja wamacö cuaabä. Cama e yafi jamö a co̦a lä co̦bei wei däjä, yoca cloocaö ja, yoca caloblaö showadaobeje bä nö dao.

37’Bada a co̦blou co̦lanö, a nosie juamobä ebä lä la̦le bä lä cui bä bufi nia shino doblalou mö bao —a cuma—. Cafä wamacö nija ei ya wa̦ lä cui, bejedi lä ya wa̦. Ö̦jö bä lä cui bä nia yai bayeliblamou. Bada a ma cuinö, acadafu cäcö a̦yoa fa majölönö, bä iyabä bä nia ajedamaö. Cama a showawänö, bä niibö nia bablaayoluu. 38¿Ö̦jö tawä? Bäshäcuoladi a ma co̦o wei ma cui, tä jalu ajede däjä a ma co̦o wei ma cui, bä nö dao dablaö ja, bä bufi doblalobä ö̦jö bei bä dodijiwä.

39’¿Ö̦jö tawä? —a cuma—. Cama e yano jamö a lä cule, a moyawäo fa cunoja, a tomömou lä juimi a nö famabö mlai. “Ö̦jö däjä a juimaö”, a bufi cuu fa cunoja, a nö lucämabö mlai. 40Cafä wamacö ma cui, showadi wamacö nö daobä, ö̦jö lä. Wamacö bufi cuu mlao däjä, camiyä ya lä yanowamöblaleyoluno wei ya nia malä bädou wei —a cuma.

Dodijidawä bä a̦ lä juo wei tä a̦

41Jesús a wa̦ fa ji̦lilänö, abinaja Pedro a cuma.

—Tä a̦ wäyäle. Afä yamalecö a̦fa yai wayoaö ayaobä, ¿ö̦jö wa tä a̦ wäyäö yacläo da cufanö? Ma, ¿yanowamö bluca yamalecö a̦fa wayoabä tä a̦ daanö? —a cuma.

42Bada tä Jesús abinaja a cuma.

—Camiyä wamale nosie lä juaö wei wamacö lä cui, ¿wedi jamö wa lä cui wa shino yai dodijaö daanö? Abinaja tä cuwä. Shomi jamö a bada nia lä juno wei a bada cuoma. A lä dodijaö wei a läo juobä a nosiemafälöma. Abinaja a nowa talefälöma. “Dodijidawä iba bä ca̦i cua da jeicu. Bä iyabä tä cuo däjä, dodijidawä wa bä iyamabä”, a nowa talefälöma.

43’¿Ö̦jö tawä? —a cuma—. Bada e lä nosiemofälöno weinaja a cuaaö showao däjä e bada waloamaö co̦o ja, a bufi doblalolanö a nia co̦blamaö co̦o. 44Cafä wamacö nija ei ya wa̦ lä cui, bejedi lä ya wa̦. A nosie juaö cadidioma yalo, ö̦jö bada a lä cuinö a nia bada läamaö nomöjöo, cama etäbä bluca lä tabou wei etäbä nofi tabobä.

45’Ö̦jö ma cui, ai a lä cui, bada a nosie juabä a ma cui, abinaja a bufi nia cuu dicoo. “Cuo buo. Bada tä co̦o jaöo malä mlai”, a bufi nia cuu dicoo —Jesús a cuma—. Bada a nosie juamobä ebä mö feduwä lä cui, bä si nia shino yafelimaö juo dicoo. Täbä iyaö lä co̦camou wei jamö a nia shino judii, bä shi wa̦lii bufi lä doblao wei bä nijamö. 46Inaja a cuaaö showao däjä, a nofi lä badabou wei e nia co̦blou co̦o ja̦toyoluu. “Fei däjä a co̦bei”, a bufi cuu mlao däjä, a nia co̦blou co̦a ja̦tolayou. A lä shominajaano wei etä fa dalalönö, bada anö a nö nia bleaamaö. Yai Bada a wa̦ bejedi bufii lä mlajei bä nijamö a nia coyocomabou. Ö̦jamö lä bä nia ö̦cöö. Bä nö beblalou yalo, bä nia lalöö.

47’¿Ö̦jö tawä? —Jesús a cuma—. Bada a nosie juamobä a lä cuinö, a taamaö lä bufii wei tä daö ma waiquiono wei ma cui, tä tanomi yalo a nö nia bleaamaö dodijio. 48Ö̦jö ma cui, bada a nosie juamobä ai a mö feduwä lä cuinö, tä tamaö lä bufii wei tä daö fe balojowämi. Tä daimi cudeenö a dobloimi. A dobloimi yalo, a nö bleaamabä a ma cui, a bufi jaducuwä fe balojowämi cudeenö, a nö nia bleaamaö fe balojoomi. ¿Ö̦jö tawä? Tä nowa lä bluca wei tä ja a lä dobäö wejei a lä cui, ö̦jö a nia yai wa̦limamou. Inaja showawä, tä nowa lä bluca wei jamö a lä läamaö wejei a lä cui, ö̦jö a nowa nia shino yai taöje —a cuma.

49A wa̦ faö showai ja, abinaja a cuu co̦oma.

—Bita jamö cowa ya wacö ömöamaö mö juma, täbä doblou lä mlai bä nö bleaabä. Wacö ömöo waiquio fa cunoja, ya bufi nö doblaobö wei. 50Ö̦jö ma cui, camiyä wale nö nia bleaamaö balöoje. Bä fe ojoblamou ja, mau ubänö bä jödödöblou lä culenaja, nini nini bänö ya nia jödödöblou cuo. Ö̦jö ya tä nö dabou showalanö ya bufi nö bleaaö. 51Bita jamö yanowamö ya täbä bufi yanöcöblamabä ya junomi. ¿Ö̦jö tawä? Cafä bämacö nowa taö lä cule. Ya bä bufi yai sheleleblamabä ya juma.

52’Abinaja tä nia fei däjä cuo majöo —a cuma—. Moli a yano showawä ja bä lä cui, bä nia sheleleblou. 3 bä nijamö, bolacabö cäcöbö a̦ nia läo. Bolacabö cäcöbö nijamö, 3 bä a̦ nia ca̦i läo mö feduo. 53Bä nia sheleleblou. Bä ijilubö nija bä fö̦ö e a̦ nia läo. Bä fö̦ö nija bä ijilubö e a̦ nia läo mö feduo. Bä tää nija bä nöö e a̦ nia läo. Bä nöö nija bä tää e a̦ nia läo mö feduo. Bä tatä nija bä yesi e a̦ nia läo. Bä yesi nija bä tatä e a̦ nia läo mö feduo —Jesús a cuma.

54Bä lä co̦camono wei bä nija abinaja a cuma.

—Motoca a lä queo wei jamö ölajashi a faö däjä, “Maa a elemashi juu lä cuimi”, wamacö cuu showadao. ¿Ö̦jö tawä? Inaja showawä a maa juu cuaaö. 55Motoca a cuaaö lä mlai jamö wadoli a juimaö däjä, “¡Jo yai! ¡Fei däjä yobli yobli tänö bämacö nö nia bleaaö!”, wamacö ca̦i cuu. Inaja showawä tä yobli cublou. 56¡Jole jole wamacö lä dodijidai! Judu mösö ma cui ja, bita a ma cui ja, wamacö moyawä ma waiquii, ¿wedi tabä camiyä fei däjä ya lä cuaale tä ja, wamacö bufi jaducudaloimi? —Jesús a cuma.

Tä dodijidablaö bufii

lä showadaono wei tä a̦

57Abinaja Jesús a cuu co̦oma.

—Yai Bada tänö tä tamaö lä bufii wei wama tä dabä wamacö waiquiwä ma cui, ¿wedi tabä wama tä li taimi? 58Wa wa̦fa nia dobloimi lä wäyäö wei a lä cuinö, bada nijamö wa ca̦i juu showaofälöö däjä, lobe wa tä cadejeblabä a wa̦ nö wäa da showadaicu. Bada a nija wa juwäamaö fa dicoonö, wa nö bleaamaö mlaobä. ¿Ö̦jö tawä? Bä fe lä lamaö wei a nija wa juwäa majöa fa dicoblamalänö, wa fe laamaö dicoo mlaobä. 59Cafä bäfä nowa taö lä cule. Tä nowa lä cule wa tä nowa bluca co̦amaö showao mlao däjä, wa nia famaö co̦o buomije —a cuma.

Currently Selected:

Lucas 12: GUU

Highlight

Copy