Lucas 13
13
Wa̦lidiwä tä ja bä bufi
lädamaö lä bufino wei tä a̦
1Ö̦jö däjä showawä, Jesús nija ai bä lä cuono wei bänö Calileateli bä a̦fa shämou wäyämaje. Biladonö bä nabä fa shömöcönö, Yai Bada nija yalo bä lä dodoblamou wei bä maqueblamobä täcö jamö, bä jo̦wa shäamalalema. Yalo i̦yäbö lä jilale jamö, cama bä i̦yäbö quea coyocomalemaje. 2Abinaja Jesúsnö bä nowa tama.
—Ö̦jö bä Calileateli shämou nö lä quiliano wei bä lä cui, ¿wedinaja wama bä nofi li tabou? “Calileateli ai bä dobloimi fe balojoo mlai, ö̦jö bä yai doblou fa mlacunö, Yai Bada tänö inaja bä li tablalema”, ¿wama bä nofi tabou tawä? 3Ma. Inaja tä cuonomi. Cafä bämacö nowa taö lä cule. Wa̦lidiwä tä ja wamacö bufi lädoimi ja, cafä wamacö ma cui, inaja showawä wamacö nia ca̦i shämou cuo mö feduo.
4’Siloe jamö a yafi ösöwä lä wäcälayono wei däjä, Jelusaleteli 18 bä lä shäblaliyono wei bä lä cui, ¿wedinaja wama bä nofi ö̦jö tabou? —a cuma—. “Jelusaleteli ai bä dobloimi fe balojoo mlai, ö̦jö bä nofi yai doblou fa mlacunö, bä li inaja tablamolayoma”, ¿wama bä nofi tabou tawä? 5Ma. Cafä bämacö nowa taö lä cule. Wa̦lidiwä tä ja wamacö bufi lädoimi ja, cafä wamacö ma cui, inaja showawä wamacö nia ca̦i shämou cuo mö feduo.
Yai Bada nija täbä
cadidou nö lä dabono wei tä a̦
6Bä bufi dayäamabä, Jesúsnö ico fi a̦fa wäyäö yacläoma.
—Ficali etäca lä cuono wei anö, uba too tobä cuobä jamö ico fi ublamaboma. Ö̦jö fi ja a iyabä, nii bä ma bomano wei ma cui bä cuonomi. 7Ficali etäca jamö a ojodamobä e nija abinaja e cuma. “Bei. Nii ya bä bomaö showai ja, lasha 3 ya famaö waiquia ma cule bä lalobloimi. ¿Ö̦jö tawä? Fi da diyälö. Cäcö fadalou mlai ja, fi ublaa bädaa”, a cuma.
8’A lä ojodamou wei abinaja e cuma. “Bada tä. Fi diyämaö jaödao bufi dijä. Bei fi cotä jamö mashita ya nia äbäjamaö. Yalo ya shibä nia löblaö. ¿Ö̦jö tawä? 9Lasha ai a lalou co̦o däjä, nii bä lalou ja, inaja lä waiquiwä. Bä laloimi showao ja, ö̦jö däjä yai. Ö̦jö däjä, fi yai diyämou showadaobä”, a nowa tama —Jesús a cuma.
Suwä a juu lä tolucuono wei tä a̦
10Judio bä yododabä ai a yafi jamö, täbä nia lä yanöcöo wei tä mö sábado jalu ja, Jesúsnö Yai Bada etä a̦ ja bä damama. 11Ö̦jamö a suwä juu lä tolucuono wei a cuoma. Inaja a cuwä showai ja, lasha 18 a ma famale ma cule, a juu wa̦lidio showaoma. A shaliliblou doblonomi. Fecula anö inaja a li taamama. 12Jesúsnö a fa dalalönö, a möamoblamalema. Abinaja a nowa tama.
—Ami. Wa juu lä tolucui bäfä jalomaö waiquia lä cule —a cuma.
13Jesús imicö fa maqueicunö a ublao fa shaliloimadunö, Yai Bada a nofi doablalema. 14Ö̦jö ma cui, judio bä yododabä yafi jamö a bada lä läono wei a jushudaliyoma. ¿Ö̦jö tawä? Täbä yanöcöobä tä mö jalu ja Jesúsnö a jalomama yalo, a jushudaliyoma. Bä lä yododono wei abinaja bä nowa tama.
—Wamacö ojodamodibä 6 tä mö jalu cua. Bämacö nia lä yanöcöo wei tä mö jalu cublou showaa mlai ja, wamacö jalomamou mö juimabä, ö̦jö lä, sábado däjä mlai —bä nowa tama.
15Ö̦jö däjä, Bada tä Jesús abinaja e cuu mö feduoma.
—¡Jole jole wamacö lä dodijidai! Wama bä wasöö ma cui, cafä inaja wamacö cuaaö mö feduwä malä showai. Täbä yanöcöobä tä mö jalu ma cui ja, ji̦imafä wama bä malä bayeliblaö wei. Baca bä ma cui, bulo bä ma cui, wama bä fa cushanö, wama bä amishi co̦amabä, wama bä malä lulubou wei. 16Inaja showawä, ei Ablaamö nodiwä a suwä lä cui, täbä yanöcöobä tä mö jalu ma cui ja, ya bayeliblabä a. Sadanasinö a o̦cabou lä waiquio wei däjä, lasha 18 a famaö malä waiquile —a Jesús cuma.
17Inaja a cuu ja, bä a̦ lä läono wei bä quililaliyoma. Bä lä yododoono wei bä lä cui, Jesús showadi a lä dodijano wei tä ja, bä bufi doblalou fe balojooma.
Nana shimono a̦fa
wäyäö lä yaclämono wei tä a̦
18Abinaja Jesús a cuu yacläoma.
—Yai Bada tänö cama ebä ca̦i lä cuo wei tä lä cui, ¿wedi tä cuwä lä dodijiinaja tä cuwä? ¿Wedinaja ya yai cubä? 19Abinaja. Nana shimono wai lä culenaja tä cuwä. Ficali etäca jamö, ai anö nana shimono wai döquema. Shimono fa caulunö, shifi falayoma. Shifi lä badalayou wei däjä, biyomö bä yabäcabö tamoyoluma —a cuma.
20Abinaja Jesús a cuu co̦oma.
—Yai Bada tänö cama ebä ca̦i lä cuo wei tä lä cui, ¿wedi tä cuwä lä dodijiinaja tä cuwä? 21Suwä anö nii bä lä julumano weinaja tä cuwä. Nii bä lä julumaö wei tä lä cui, nii 3 ji̦bä jamö wiisibö tä wai coyocoa ma bäqueno wei ma cui, ö̦jö tä wai bädawänö, bä bluca julumalema —a cuma.
Bolacadabö bä nia shino
yai jucäamou lä ayaono wei tä a̦
22Jelusale jamö Jesús a jufälöbä jamö, bluca täbä shabonobö jamö a jayuadalou fa cuaimadunö, täbä yömölaö cuaafälöma. 23Jesús a wa̦lii ja, abinaja ai a cuma.
—Tä a̦ wäyäle. Shobali wacö jamö bä juu mlaobä, Yai Bada tänö ¿bä nia bolacadabö shino jucäaö ayao tawä?
Inaja a fa cunö, abinaja Jesúsnö bä nowa tama.
24—Yai Bada tänö cama ebä ca̦i lä cuo wei jamö wamacö cuobä, wajaquemi yoca jamö bä faö fe da yadiofälö. ¿Ö̦jö tawä? Cafä bämacö nowa taö lä cule. Ö̦jamö bä cuobä, bluca bä nia faö ma wabäo wei ma cui, bä nia faö dobloimi. 25Yoca caloa showaa ma cule, cama yafi e lä cule a fa itoblalunö, yoca fe nia laaö. Ö̦jö däjä, sibo jamö wamacö cudia showaa dicoo ja, wama yoca cloocalanö wamacö a̦ nö nia bleaaö. “¡Bada tä!”, wamacö nia cuu. “¡Yamalecö da famaliyo!”, wamacö nia ma cuu wei ma cui, camanö abinaja wamacö nowa nia taö. “Bämacö daimi. Shomi wamacö”, a nia cuu.
26’¿Ö̦jö tawä? —a cuma—. Ö̦jö däjä, abinaja wamacö nia cuu. “Cafä sho bämacö mada iyablei. Camiyä yamacö shabonobö jamö wa tä a̦ ca̦i mada wäyäblei”, wamacö nia cuu ma cui, 27abinaja a nia cuu. “Bämacö nowa taö waiquia lä cule. Bämacö daimi. Shomi wamacö. Wa̦lidiwä talewä wamacö lä cui, bä da alufälö”, a nia cuu.
28’¿Ö̦jö tawä? Yai Bada tänö cama ebä ca̦i nia lä cuo wei jamö, ai wama bä nia blajawä dablaö ayao. Ablaamö a ma cui, Isaacö a ma cui, Jacobo a ma cui, Yai Bada a wa̦no wäyälewä bä ma cui, ö̦jö wama bä blajawä nia ma möö wei ma cui, cafä wamacö nia sibomabou. Ö̦jö däjä wamacö nia ö̦cöö. Wamacö nö beblalou ja, wamacö nia lalöö. 29Yai Bada tänö cama ebä ca̦i cuobä jamö, shomi täbä lä bälöblai täbä nia waloblayoluu. Motoca a lä faö wei jamö ma cui, a lä queo wei jamö ma cui, a faö lä mlai jamö ma cui, a queo lä mlai jamö ma cui, ö̦jamö bä cuoma bä bluca fa co̦camoliyonö, bä nia iyaö ca̦i loo.
30’¿Ö̦jö tawä? —a cuma—. Ö̦jamö täbä cua lä bädao wei täbä ma cui, bada bä nofi tabou lä cuaaö wejeinaja Yai Bada tänö bä nofi nia tabou. Inaja showawä, ai täbä nofi bada ma tabou wejei ma cui, Yai Bada tänö inaja bä nofi nia taboimi.
Elodenö Jesús a nia
jo̦wa lä shämano wei tä a̦
31Ö̦jö däjä, faliseo ai bä bada fa waloicunö, Jesús a yömölamaje.
—A da doculufälö. Bada tä Elode a lä cuinö wa shämaö bufi doblaa waiquia —a nowa tamaje.
32Abinaja Jesúsnö bä nowa tama.
—Wamacö fa alufälönö, ö̦jö a nofi wa̦li lä jushuadii wei nija wamale a̦no da wäcudu. Fei däjä ma cui, fena ja ma cui, fecula ya bä nia yashubladii showao. Jalili ya bä nia jalomadii showao. Ö̦jö tä fena ja ya nia shino waicou. 33Wale nia ma shämaö däjä ma cui, ya juu fe yadiofälöbä cä ya. Eja mlai, Jelusale jamö Yai Bada a wa̦no wäyälewä showadi bä shino malä shäö wejei —a Jesús cuma.
Jesúsnö Jelusaleteli
bä nomöa lä bono wei tä a̦
34Jesús a wa̦ blajawä faö ja, abinaja Jelusaleteli bä nowa tama.
—¡Shädayai, Jelusaleteli wamacö! Yai Bada a wa̦no wäyälewä wama bä lä shäö wei wamacö. Cafä wamacö nija Yai Bada tänö bä lä shömaö wei, maa mabänö wama bä lä shäyäö wei wamacö. Cadala bänö bä ijilubö ebä fe yojobou lä cuaaö wejeinaja, inaja showawä cafä showadi bämacö tabou bufi ma doblaono wei ma cui, camiyä nija wamacö nowamamou bufionomi dicowä.
35’Ja̦o. Inaja lä waiquiwä. Fei däjä bämacö nia daaö. Wamacö yafibö nia blocoaö. Abinaja bämacö nowa ca̦i taö showadao. Wamale nofi doaö bao showao mlao däjä, wamale nia dablaö co̦daaimi. “Yai Bada a wa̦nö a lä juimi a lä cui, Yai Bada nija, ¡ö̦jö lä a shino yai bayeliblamobä a!”, wamacö cuolanö wamale nia shino yai dablaö co̦o —bä nowa tama.
Currently Selected:
Lucas 13: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
