Lucas 11

Yai Bada nija bä a̦ fabä

tä a̦ lä wäqueno wei tä a̦

1Ai däjä, Yai Bada nija Jesús a nö bayeli nacaoma. A wa̦ faö waicou däjä, cama ai a lä nocamabono wei e a̦ fama.

—Bada tä. Yai Bada nija yamacö a̦ fabä, tä a̦ yai da wäba. Fe ojomalewä Juan a lä cuinö, cama ebä lä nocamabono wei bä nija, tä a̦ wäa lä taqueno weinaja showawä —a cuma.

2Abinaja Jesúsnö bä nowa tama.

—Yai Bada nija wamacö nö bayeli nacao ja, abinaja wamacö yai cubä. “Fabe, cafä wa wa̦fa shino doblao wäyämobä wa. Eja yamalecö ca̦i bälöa da dodijiiquiyo. 3Yamacö nia lä iyaö wei täbä ja, showadi yamalecö da dobä. 4Yamacö doblou lä mlai, tä nowa ca̦i da mladamalö. Camiyä yamacö ma cuinö, yamalecö lä yabäcaö wejei bä nija yama tä nowa bluca malä mladamaö wei. Yamacö nö doblobö lä mlai jamö, yamalecö ca̦i da wasö.” Einaja Yai Bada nija wamacö cubä —Jesúsnö bä nowa tama.

5Ö̦jö däjä, abinaja Jesús a cuma.

—Abinaja tä cuwä. Ai wa lä cui, wa lä nofimaö wei a lä cui nija wa nacou ja, bäshäcuoladi wa aa jalulayou. ¿Ö̦jö tawä? Wa ublaa sibolanö abinaja wa e cuu. “¡Nofi!” wa e cuu, “Iba nii 3 bä da majöba. 6Camiyä nija iba nofi a waloquei lä cufe. Ya niibö baabä tä cuami”, wa e cuu.

7’Yafi u̦eshi jamö culanö a wa̦ faö. “Wale yabäca dijä. Ya yoca laa waiquiquema. Ijiluyä bä sho yamacö mia waiquia lä cule. Bäfä dobäbä ya nö itoblobimi”, a nia cuu. ¿Ö̦jö tawä? 8Ö̦jö ma cui, abinaja bämacö nowa taö lä cule. Ya̦cumö a fa itoblalunö, wa nia dobäö fe yadio. Wa nofimaö cudeenö mlai. Quilii mlai ja wa nacodii cudeenö, a nia ya̦cumö jocäblou. Wa bä lä bufii wei bä nia bluca jöböaö.

9’¿Ö̦jö tawä? —Jesús a cuma—. Bämacö nowa taö lä cule. Yai Bada nija bä da naco, wamacö dobäö cuquei. Dodijidawä tä da dayäaje, wama tä dablaö weicätä. Bei yoca da cloocaje, yoca caloblaö wä. ¿Ö̦jö tawä? 10Bä bluca lä nacou wei bä lä cui, bä malä dobämou wei. Inaja showawä, tä dodijidawä lä dayäaö wejei bä nija tä dodijididawä dablamou. Bei yoca lä cloocaö wejei bä ma cui, ö̦jö bä nija yoca caloblamou.

11’Cafä wamacö ijilubö lä cuinö, yuli a nacaöje ja, yuli mlai, ¿olu wama ecö nia jöböaö yacläo daanö? —a cuma—. 12Cadala nate nacaö ja, ¿sufi wama e nia jöböaö yacläo daanö? 13Wa̦lidiwä talewä wamacö ma cui, dodijidawä ijilufä wama bä dobäö daö waiquiwä ja lä, Fayä fedu jamö a lä culadi, ö̦jö bei a nia shino yai dodijaö fe balojoo. Cama Yai Bada tä Bufi lä nacaö wejei bä nija a Bufi jöbömoquei —Jesús a cuma.

Sadanasi a wa̦fa

lä wayoano wei tä a̦

14Ai däjä, Jesúsnö fecula a yashuma. A lä feculaböono wei a lä cui, fecula anö aca fa bolebömalönö, a wa̦ faö doblonomi. Ö̦jö ma cui, fecula e fa yashulunö, aca lä boleböono wei a wa̦ faö liyäjäblou co̦layoma. Bä lä co̦camono wei bä bufi bluca shädayaimoma. 15Ö̦jö ma cui, abinaja ai bä cuma.

—Fecula bada Sadanasi tä lojodenö bä li fecula yashuu —bä cuma.

16Ai bä mö feduwä lä cuinö Jesúsi a wa̦ nia bejedi fa wabajenö, abinaja bä cuma.

—Yai Bada wa e nö ö̦jöböamobä, tä nö lä quilijii tä da wawämalö —bä cuma.

17Ö̦jö ma cui, Jesúsnö bä bufi daö fa waiquionö, abinaja bä nowa tama.

—Bä bälöa lä yaile bä nofi wa̦liayou ja, bä bälöo dobloimi majöo. Cama bä mashi ma cui, inaja showawä, bä nofi wa̦liayou däjä bä nia bälöo lojodoo majöomi. 18Ma. Sadanasi ebä lä cui, cama bä nofi wa̦liayou dicolayou ja, ¿wedi jamö tänö bei ebä ca̦i li lojodoa nomöjöquei? Sadanasi a lojodenö ya bä jo̦wa fecula yashublaö yalo ya wa̦.

19’“Sadanasi a lojodenö bä li fecula yashublaö”, wamale nofi tabou ja lä, ¿inaja showawä afä wama bä nofi ca̦i tabou da culanö, fecula bä lä yashuu wejei bä lä cui? Mlaicätä. Ö̦jö cudeenö, inaja wamacö cuu dicoo ja, afä bä showawä lä cuinö wamacö jolemou jömaö cuqueije. 20Ö̦jö ma cui, Yai Bada a lojodenö ö̦jö ya bä li yai yashuu, Yai Bada tänö cama ebä ca̦i lä cuo wei wama tä dablaö fe yadiobä.

21’¿Ö̦jö tawä? —a cuma—. A lä waiteli wei a lä cuinö, cama madofi ebä nofi läbou däjä, etäbä nia yabäcamoimi. A ishobä etä madofi ca̦i läa ja, shomi täbä nia lucämaimi. 22Ö̦jö ma cui, a nö yai lä wa̦lojaö weinö a nabä fa queicunö, a nö bleaamaö ayao. Ö̦jö däjä, cama a nowamöobä etä nofi lä mölabou wei etä jucälei. Cama etäbä bluca lä tabou wei etäbä fa däalalönö, etäbä shedecaö. ¿Ö̦jö tawä?

23’Camiyä wale bayeliblaö lä mlai a lä cuinö, Sadanasi a li bayeliblaö waiquiwä. Iba ya bä co̦abä jamö bä co̦aö mö feduo lä mlai a lä cuinö bä yai sheleleblamaö—a cuma.

Fecula ebä bälöa

lä co̦aliyono wei tä a̦

24Abinaja Jesús a cuma.

—Fecula a yashublamou däjä, a lä tabou wei a daquefälöö. Ö̦jö däjä, tä ulifi bloque lä wejedii jamö a shoqueadii cuaaö bäa. A yanöcöobä tä ma dayäö wei ma cui, tä dablaimi. Ö̦jö däjä, abinaja a fecula cuu. “Ya da dacöi nija ya yai nia bälöo co̦o”, a cuu. 25Ö̦jö däjä, a lä daquefälöno wei a lä cui nija a waloa fa co̦iquiyonö, yafi wawädowä a dalalei. A yafi dodijidablaö jälayoma. 26Ö̦jö däjä, ai bä co̦ablaö aa fa co̦lunö, 7 bä ca̦i fecula waloa co̦queyoluu. Cama a wa̦lidiwä ma waiquii ma cui, bä yai wa̦lidiwä fe lä balojoi bä ca̦i waloa majöqueyoluu. Ö̦jö nija bä fa lucälönö, bä bälöaliyo. Bä lä tabou wei a lä cui, a nö jaba ma bleaano wei ma cui, ö̦jö lä däjä a nö yai bleaaö dodijiquei —a Jesús cuma.

Tä yai lä doblale tä a̦

27Jesúsnö ö̦jö tä a̦ wäyäö showalanö, bä lä co̦camono wei jamö, a wa̦ suwä i̦cali fama.

—Naafänö wa lä tablaleno wei a lä cui, wa lä shadimabono wei a lä cui, a bufi yai doblalobä a —a suwä cuma.

28Ö̦jö ma cui, abinaja Jesús a cuma.

—Ma. Yai Bada etä a̦ fa ji̦liajenö, tä a̦ nofi lä jaducubou wejei, ö̦jö bä bufi shino yai doblalobä bä li —a cuma.

Yai Bada tä mayo

wawäblamaö lä bufino wejei tä a̦

29Täbä lä co̦camono wei täbä mashicou showai ja, abinaja Jesús a cuma.

—Wamacö fei däjä lä bälöblai wamacö dobloimi fe balojowä. Yai Bada ya e nö ö̦jöböamobä, tä nö lä quilijii wama tä wawämaö bufi ma doblao wei ma cui, bämacö a̦ nia juaimi. Wama tä nia lä möö wei, Jonasi a lä taamano weinaja, inaja tä cuwä wama tä shino nia dablaö. 30Ninibeteli bänö Yai Bada tä lojode dablabeje, Jonasi a cuoma. Inaja showawä, cafä wamacö fei däjä lä bälöblai wamacö lä cuinö, Yai Bada wama a lojode dablaö nomöjöobä, ei cä ya, ya lä yanowamöblaleyoluno wei ya lä cui.

31’Wamacö fei däjä lä bälöblai wamacö jömadayobä jamö, Sabaateliyoma a bada bälöo lä dodijiono wei, a suwä nia ca̦i ublao yädäo mö feduo —a cuma—. Ö̦jö a ma cuinö wamacö nia dobloimi jömaö. Wamacö nia waimaö bufii. ¿Ö̦jö tawä? Bada tä Salomo a wa̦ ji̦liabä, ö̦jö a li suwä blajawä waloa fe malä yadiqueno wei. Salomo a bada ma cui, camiyä bei ya yai bada dodijiwä. Fei däjä, cafä wamacö nijamö camiyä ya yai cua ma cule, wamale a̦ ji̦liblaimi.

32’Wamacö fei däjä lä bälöblai wamacö jömadayobä jamö, Ninibeteli bä nia ca̦i ublao yädäo mö feduo. Ö̦jö bä ma cuinö wamacö nia ca̦i jömaöje —a cuma—. Wamacö ca̦i nia waimaö bufiije. Jonasi nija Yai Bada etä a̦ fa ji̦liläjenö, wa̦lidiwä tä ja bä bufi lädou malä showadalayono wei. ¿Ö̦jö tawä? Jonasi a bada ma cui, camiyä bei ya yai bada dodijiwä. Fei däjä, cafä wamacö nijamö camiyä ya yai cua ma cule, wamale a̦ ji̦liblaimi.

Yai Bada tä shi̦inö

bä bufi lä walalao wei tä a̦

33Inaja Jesús a cuma.

—Cowa wacö ömöamaöje däja, shomi jamö wacö jo̦yabou nomöjöomije. Wöö anö wacö fe nia ca̦i yojobou majöomije. Ma, wacö i̦taobä jamö wacö yai i̦tamabouje, ö̦jö tä shi̦inö, bä lä faö wei bänö wawädowä täbä dablabeje. ¿Ö̦jö tawä? 34Cowa wacö lä culenaja bei wamacö mamocu cuwä, wawädowä wama täbä dablabä. Wamacö mamocu demi ja, wama täbä bluca wawädoablaö cuquei. Ö̦jö ma cui, wamacö mamocu wa̦lidio däjä, wama täbä nia dablaimi.

35’¿Ö̦jö tawä? —a cuma—. Bä da moyaweicu, ö̦jö lä. “Tä shi̦i cuobä jamö ya cua waiquia”, wamacö bufi jole cuu ja, wamacö mölaa bälayou. 36Ö̦jö cudeenö, wama täbä bluca wawädoablabä wamacö waiquiwä ja, mö didi wama tä coyocomaboimi ja, ¡bejedi lä wama täbä nia bluca wawädobou! Cowa wacö shi̦i cuobä jamö, wamacö wawädowä juu lä cuaaö weinaja showawä.

Jesúsnö faliseo bä nö

a̦fa bleaaö lä tano wei tä a̦

37Jesús a wa̦ waicou däjä, faliseo a badanö a nacalema, cama nija a nö liyobä. Ö̦jö cudeenö, ö̦jamö lä a fa junö, bä iyaö ca̦i loobä jamö a cuquema. 38Bä iyaö showao mlao däjä judio bä imicö showadi lä ya̦lömou wei, Jesús imicö ya̦lömou fa mlacunö, faliseo a bufi shädayaimoma.

39Ö̦jö däjä, abinaja Bada tä cuma.

—Cafä faliseo wamacö lä cui. Ji̦shima bä ma cui, ca̦ö fesibä ma cui, fesibä sibosi aumaö lä culajeinaja wamacö sibosi ma taamamou wei ma cui, bei wamacö u̦eshi shami fe balojowä. Madofi bä ja wamacö bufi shino yaimodii. Wamacö shino nabämou. 40¡Wamacö bufi jaducuwä lä mlai! Bei wamacö sibo lä tablaleno wei a showawänö, ¿bei wamacö ca̦i mötalö tablaö mö feduonomi daanö? 41Inaja wamacö cuaablalou mlai, abinaja wamacö yai cuaabä. Bä nö jo̦lili lä bleaaö wei wama bä nofi yai ojodabobä. Inaja wamacö yai cuaaö ja, “Ei bä au nö mlawä”, Yai Bada tänö wamacö nofi nia shino tabou.

42’Faliseo wamacö nö bada bleaaö dodijiobä wamacö —a cuma—. Afä nii wama bä bluca lä doaö wei, wajaquemi jenabä wai bädawä ma cui, *fe usucuwä 10 wama jenabä fa shedequeblalönö, ai moli jenabä wai ja, Yai Bada showadi wama a dobäö. Ö̦jö ma cui, wamacö yai dodijaö mlai ja, wama a ca̦i nofimaö mlalanö, wama a jole jole dobäö waiyoblalou bädao dicoo. Wamacö dodijalanö wama a dobäö fa cunoja, tä nö doblaobö wei. Wama a nofimalanö wama a dobäö fa cunoja, tä nö dodijidaobö wei.

43’Faliseo wamacö nö bleaaö dodijiobä wamacö —a cuma—. Judio bämacö yododabä jamö, bada bä lä döcäo wei jamö wamacö döcäo yaimou mö feduo talei. Nii bä lä lulaö wejei jamö ma cui, wamacö nö bada ca̦i ö̦jöböamou bufi doblao. 44Wamacö nö bleaaö dodijiobä wamacö. Nomawä bä didia lä ja̦tole jamö, tä ulifi jole mömou liyäjäwä lä culenaja, bei wamacö jole mömou dodijidawä cuwä bäwä. “Eja nomawä bä didia lä cule”, bä bufi cuu mlai ja, tä ulifi mojodili cabaöje —Jesús a cuma.

45Ö̦jö däjä, Moisesi tä a̦ yai lä daö wei ai a wa̦ juoma.

—Tä a̦ wäyäle. Faliseo bä bada lä cui, inaja wa bä nowa taö dicoo ja, camiyä yamacö ma cui yamalecö nö ca̦i waiblaö mö feduo dicoo —a cuma.

46Abinaja Jesús a cuu showadaoma.

—Moisesi wama tä a̦ yai lä daö wei wamacö nö ca̦i bleaaö mö feduobä wamacö. Yai Bada nija täbä dodijidawä cuobä, wama tä nabä bluca shömadii talei. Ö̦jö ma cui, wama bä doblamaö mlai, wama bä modaablamaö buo. Jai jude wama tä bälamaö bädao. Bä doblou fe yadiobä, moli ma cui wama bä bayeliblaö buomi. 47Wamacö nö bleaaö dodijiobä wamacö. Yai Bada a wa̦no wäyälewä bä lä cuono wei bä lä cui, ö̦jö wama bä a̦ nofi jaducubou ma mlai, wama bä dodijidawä didimabou bufi doblaa bädaa lä cule. Cafä wamacö nö badabö showawä lä cuinö bä shäö fa balöojenö, bä lä didile jamö wama tä ulifi baushibou bufi doblao nodio, dodijidawä wamacö mömou cuo fe yadiobä.

48’¿Ö̦jö tawä? —a cuma—. Cama wama ecö a̦fa nodiwä jilamou ja, cafä wamacö jömamou waiquiwä. Cafä wamacö nö badabö jaba doblou lä mlaono weinaja wamacö cuwä malä showai. Cama bänö bä a̦ waibolajenö bä shälemaje. Cafä wamacö linö wama bä a̦ waibou showalanö, bä lä didile jamö wama tä ulifi baushibou bädawä.

49’¿Ö̦jö tawä? —a cuma—. Ö̦jö cudeenö, Yai Bada a wa̦ faö moyawäo showaoma. Abinaja a cuma. “Cama bä nija wale wa̦no nia lä wäyäö wejei ya bä nia shömaö. Ya bä shömabä ya bä lä yaimabole, ö̦jö ya bä nia ca̦i shömaö mö feduo. Ö̦jö ma cui, ai bä nia shäöje. Ai bä nö nia bleaamaöje”, a cuma, 50cafä wamacö nija Yai Bada a wa̦no wäyälewä bä yanöcö shäö lä cuaano wejei bä bluca lä cui, cafä wamacö nija bä nowa bluca cuobä. ¿Ö̦jö tawä? Awei. Ei bita a lä tablamono wei däjä, bä jaba lä ishono wei tä ma cui, bä ishou lä nodiablalono wei tä ma cui, cafä wamacö nija tä nowa nia bluca jödödöwä cuo.

51’Abele a jaba shämolayoma —a cuma—. Ö̦jö däjä, Yai Bada ai ebä bluca yanöcö shäa jäa fa nomöjöabodujenö, ya̦cumö nofi bäyäalewä Sacalia a shäa nomöjölemaje. Yai Bada e yano je̦fa jamö a nabä quequemaje. Yalo bä ö̦shö lä maqueblaaö wejei täcö ajede ja, Yai Bada etä yano sibo mötale jamö a shälemaje. ¿Ö̦jö tawä? Awei, cafä bämacö nowa taö lä cule. Cafä wamacö fei däjä lä bälöle wamacö nija, ö̦jö tä nowa nia bluca jödödöwä cuo.

52’Moisesi wama tä a̦ yai lä daö wei wamacö nö bleaaö dodijiobä wamacö —a cuma—. Yanowamö bä nija Yai Bada a dablamou bufi ma doblao wei ma cui, wama bä bufi jaducublamaimi. Yai Bada cafä wamacönö wama a daimi waiquiwä. Ai bänö a daö bufi ma doblao wejei ma cui, cafä wamacö a̦nö wama bä doblamaimi —Jesús a cuma.

53Ö̦jö däjä, Jesús a aa lä co̦layofälöno wei däjä, Moisesi tä a̦ ja täbä lä damaö wejei bä ma cuinö, faliseo bä bada ma cuinö, a nofi jaba wawädowä wa̦libomaje. Bluca tä ma cui ja, showadi a wa̦lii fe blacäjomaje. 54A wa̦fa taö bufi fa doblaojenö, a wa̦ nia yaclämaö fe yadiomaje.

Currently Selected:

Lucas 11: GUU

Highlight

Copy