Popular Bible Verses from Romanɛ 12

Share

Nɔtɛ ɔzã nɛkpã asɛ kanɔ alɛ mɛanɛ, pɔ nɔkɔ Owusoso Akaa yɛetsyina wɔnɔ ekpeɖekpeɖe mɛ tɛbhɛbhɛtɛ yɛedzi avɔvɔ. Kɛlɛ̀ bakɔ ɔsɛ nɔpɔ̃ɛ Owusoso Akaa ebui tɔtɔɖɔɔ mɛ oɖi, kɛgɛ ɛpɛ nɛ̀ kɛgɛ yɛadɛmɛ nɔ, pɛ kɛlɛ ná piapii nɔ.

Mɛelɛ alɛ mɔ, nɛ Owusoso Akaa yɛashagabui nɛidi gɛeɖi ɔlɔ nɔ soɔ, ɛkpalà ɔnɔ ɔsɛ tɛ nɔlɔkɔ ishu ɔbhɛtɛ asɛ bɔdɔ̃ pɔpɔɛ gɛlɛ nɛkpã ana, gɛ ɛlɛishu dalɛ pɛ Owusoso Akaa adɛmɛ nɔɔ, kɛlɛinu wɔnɔ ɔfɔfuĩa mɛ ɛtakpu esi kpɛkpɛ.

Awɔ̃ lulu azã wɔnɔ same mɔmɔ mɛ, tɛdɔdɔ fɔ̃ɔ nɛ banɔ luhũ ikpɛ ibe, nɔlɔkɔ tɛyɛyɛkɛŋã okulu Akaa nɔ.

Nɔtɛkɔ kibui kpa ŋã wɔnɔ abha, pɔ nɔkɔ kibui gbangbã bhɛbhɛtɛ ŋã kibui kpa nabha boŋ.

Nɔlɔkɔ tɛpɛplɛnɔ ɔkɔ bagɔlɔ nɛ tɛdɛdɛmɛ nɔ̀ nɛ̀ bagɔlɔ mɛ, ɔmɔ asɛ bélɛɛ nɛ Kristo mɛ ana. Nɔkpɛ ɛtakpu esi ɔkɔ bagɔlɔ ɔdɛ wɔnɔ ahɔɛ ishu.

Nɔkɔ wɔnɔ tɛdɛdɛmɛ nɔ nɛ̀ banɔ nɔ̀ ode ɛya gbangbã mɛ. Nɔtɛ dɛmɛ nɔ nɛ kibui zizĩ, nɔnyana kibui gbangbã bhɛbhɛtɛ mɛ ovunɔ.

Onupɛ kɛbalà de wɔnɔ kawɔ̃pɛ mɛɛ, tɛnɔzã nɛ̀ anɔ ka nyia ka nɛ ishu yɔyɔ mɛ.

Mɛɔbhia alɛ mɔ, nɔtɛ obisi otití ɔkɔ ishu, pɔ nobu kidzo ɔkɔ Owusoso Akaa yɛɔmɔpɔɛ nɔ, ɔmɔsɛ bafɔnɔ kibuiɛ elu asɛ, “Mɛxɔ̃ɛ kinu ɔsɛ tɛ mɛibisi otití nɛ wɔnɔ ulũ, tɛ mɛpɔ̃ batɔ̃,” Apaleteɛ yɛaɖɔ ɛlɛ.

Nɔtɛ shrɛrɛ nɛ wɔnɔ axɔ̃ɛ wɔawɔa mɛ, pɔ nɔkɔ kifu zã wɔnɔ mɛ nɛ ɔfɔfuĩa nɔ mɛ, ɔkɔ axɔ̃ɛ dɛdɛ ɔkɔ Apaleteɛ.

Nɛ tibhui bhuibuɔ gɛ bakɔ mɛ nulũɔ, itseɖe wɔnɔ ɔmɛ anɔ ka nyia ka asɛ atɛ alɔkɔ yɛishu asɛ yɛadɛ. Nɛ kɛlɛ inye mɛɛ, nɔbhɛtɛ ekpeɖekpeɖe mɛ nɛ ishu esi zhizhinɔ ɛkpã zazãna shu boŋ, tɛ anɔ nyia anɔ ebhui ibui mɛ nɛ tɛyɛyɛkɛŋã nɛidi gɛ nɔyɛkɛ odenɔ Owusoso Akaa akɔ nɔɔ shu.

Nɔtɛ bhɛtɛ ibui kpa ɔkpɛ ibui kpa lũ ɔkɔ anɔ na nà. Nolu awɔ tɛ nɔbhɛtɛ ibui gɛinu kɛgbangbã nɛ anɔ ka nyia ka amɛ.

Nɔzã nɛ tenikpo bhɛbhɛtɛ mɛ nɛ̀ bagɔlɔ. Nɔtɛ ozofeke ishu, pɔ nɔdɛmɛ tɛ nɔzã tenikpo nɛ̀ bagɛ alɛ wɔnɔ esiɛ. Nɔtɛ ɔlɔkɔ ishu asɛ bebutianɛ nonu.

Nɛ kɛlɛ nɛinye mɛɛ, “Onupɛ bɔbhɛ iyi anunɔ gɛ atɛ dɛmɛ nɛ wɔɔ, wɔ kɔɛ ɛŋaŋã yɛaŋã, onupɛ oluwɔ̃ɛ oyi yɛɛ, kɔɛ kɛdɔ̃ tili yɛawɔ̃ɛ. Nɛ kidzo ɛlɛ nabhaa, kɛbazã asɛ gɛ ɔlɔkɔ afɔɛifu ɔtɔɖɔ yɛada mɛ.”

Noyula tutu esi ɔkɔ bagɛ atɔ̃nɔ wɔnɔ edeɛ, noyula ɔkɔ alɛ, pɔ nɔtɛɖɔ kibui ɔkpɛ alɛ. Nɔmɔ same nɛ̀ bagɛ amɔ same, kɛlɛ nobi yoyo nɛ̀ bagɛ ebieyoɔ.

Nɔplɛnɔ ɔhamɛeyi nɔnɔ́ gɛ kɛdɔ̃ nanà ma yɛahɔɛ. Nɔzã ɛyamɛ gbangbã tɛbhɛbhɛtɛ abha ɔkɔ befu.

Asɛ kɛlɛ́ɛ gɛ ishupi bɔwɔ̃pɛ lɛ bɔlɔ mɛ anɔ aka nyia aka ahɔɛɛ, pɔ anɛ kɛxɔ̃ɛ idi tinikpo bɔwɔa, kana ɛbe gana Kristo mɛɛ, bɔlɔ banɔ kpekpè alɛ pete bɔbhɛtɛ tenikpo, kɛlɛ bɔlɔ ishupi ɔwɔ̃pɛ nɔ kpɛ olũgbu nɛ bagɔlɔ mɛ.