Popular Bible Verses from Abhaëfësö 6

Share

Nkobhatëëbhya ndë igho ko bhoora igha, riihë reno tukwitana, ti-irya kinyabhantö hë, kasi nkwitana törë riihë na ëbhëntö bheno bhetakomaahwa, ibhya ubhwera na obhotoro. Nkwitana törë riihë na abhanene abha amangʼana amaghogho, bhano bhakotonga ekebhara keno. Nkwitana törë riihë na amasambwa ghonswe igho ghano ghakokora amangʼana amaghogho, na amatöngi agha ahasë hano hatakomaahwa.

Mosaasaamenga nkaagha syonswe igho, kya bhono Umwika Ömöhörëëru akobhatangata, okore mwiraarerre. Möghëndërri okosaasaamera abhantö abha Waryobha bhonswe igho.

Momanore ibhyöghë bhyonswe igho ibhya riihë, bheno Waryobha akobhahaana, okore mobhe na obhotoro ubhwa okorebherra obhongʼaini ngʼaini ubhwa Oghosambwa.

Ku bhuyö ni-igha mogheghe ibhyöghë bhyonswe igho ibhya ukwitanera riihë bheno mokohaanwa na Waryobha, okore hano risambwa reraashe, unyoore moona obhotoro ubhwa okorerebherra, na hano moraamare ghayö, monaghe këmwë.

Ëkëntö ikyëndë ni-igha, mogheghe ingubha. Ingubha iyö, nu-mukumo ghono moonagho ku-Waryobha. Iyö yo eraabhatöörri ukurimya imighwë ighya omorro gheno mokorekerrwa na Oghosambwa. Motoore sëngöfiira isya ikyoma, sëngöfiira siyö, nsyo öbhöhönia ubhwënyu. Mogheghe na umushonge ghono Umwika Ömöhörëëru akobhahaana, umushonge, ghuyö ne-ngʼana iya Waryobha.

Ku bhuyö ni-igha mwisëëmi ukwitana riihë. Mwibhohe umushibhi mo-bhokende. Umushibhi ghuyö no-bhoheene ubhwa Waryobha. Motoore idirii mu-kikubha. Idirii iyö, no-kokora amangʼana agha heene. Okotoora amabhuuti n-kya ukwisëëmya okoraareka Amangʼana Amaiya agha omorembe.

Amangʼana aghaane ghano nkobhatëëbhya agha okomarërrya ni-igha, monaghe ko-Monene Yëësu, mutighe abhahaane singuru na obhotoro ubhwaye obhonene.

Ko bhoora mo-Maandeko Amahörëëru yandëkirwë-mo igha, “Osooke suwëënyu na nyakuwëënyu.” Ghuyö ngwo umughiro ghono ghwaabhaayë ughwa mbere ukwëngëribhwa-ko riraghano reno igha, “Hano uraaighwere abhaibhöri abhaaho, amangʼana ngaraabhe bhuuya ku-uwe, kora oghote wingʼuure ko-kebhara kono.”

Bhëënyu abhaana, ko bhoora igha mmoona öbhömwë ko-Monene Yëësu, ni-igha mwighwere abhaibhöri abhëënyu. Kiyö nkyo ëkëntö ikiiya ikya okokora.